By လားနွန် – ချင်းပြည်နယ်၏ ပညာရေး၊ ကျန်းမာရေးနှင့် လမ်းပန်းဆက်သွယ်ရေးကဏ္ဍများ ဖွံ့ဖြိုးတိုးတက်ရေးအတွက် အသုံးပြုရန် အိန္ဒိယအစိုးရက တစ်နှစ်ကို အမေရိကန်ဒေါ်လာ (၅) သန်း ကူညီထောက်ပံ့မည်ဟု ချင်းပြည်နယ်အစိုးရ ပြောရေးဆိုခွင့်ရှိသူ စည်ပင်ဝန်ကြီး ဦးစိုးထက်ကပြောသည်။
အိန္ဒိယနိုင်ငံသံရုံးမှ သံအမတ်ကြီး H.E.Mr.Vickram Misri နှင့် အိန္ဒိယကောင်စစ်ဝန်ချုပ်ရုံးမှ ကောင်စစ်ဝန်ချုပ် Dr. Kumar Praveen တို့သည့် နိုဝင်ဘာလ (၂၀) ရက်နေ့က ချင်းပြည်နယ်၊ ဟားခါးမြို့သို့ ရောက်ရှိလာပြီး ယနေ့မနက်က ချင်းပြည်နယ်အစိုးရနှင့် တွေ့ဆုံဆွေးနွေးခဲ့သည့်အချိန်တွင် ချင်းပြည်နယ်၏ ကျန်းမာရေး၊ ပညာရေးနှင့် လမ်းပန်းဆက်သွယ်ရေးလိုအပ်ချက်များတွင် အသုံးပြုနိုင်ရန် တစ်နှစ်လျင် အမေရိကန်ဒေါ်လာ (၅) သန်းကို သုံးနှစ်ဆက်တိုက် ကူညီထောက်ပံ့မည်ဟု ပြောဆိုခဲ့ခြင်းဖြစ်သည်။
စည်ပင်ဝန်ကြီး ဦးစိုးထက်က “ကျွန်တော်တို့လိုချင်တဲ့ လမ်းတွေကိုအဆင့်မြှင့်ဖို့၊ ပညာရေးနဲ့ ကျန်းမာရေးမှာ ကူညီပေးဖို့၊ ပညာရေးကျောင်းတွေကိုဆောက်ဖို့၊ နောက်ပြီးတော့ ပညာရေးနဲ့ ကျန်းမာရေးနဲ့ဆိုင်တာ အဓိက ကတော့ သူတို့ကတော့ ဒီအလုပ်အကိုင်အခွင့်အလမ်းအတွက်ကို ကျောင်းတွေကိုကူညီပေးနိုင်တယ်၊ သုံးနှစ်ဆက်တိုက်ပေးဖို့ သူတို့စီစဉ်ထားတယ် အဲဒီအတွက်ကို ဒီကလိုအပ်တဲ့နေရာတွေကိုပြောပြီးတော့ လိုအပ်တဲ့နေရာတွေမှာ ကူညီပေးမယ်” ဟု ပြောသည်။
ထို့အပြင် ချင်းပြည်နယ်၏ နယ်စပ်ဂိတ်များဖြစ်သည့် ရိဒ်ခေါဒါရ်နှင့် ကျီခါး နယ်စပ်ကုန်သွယ်ရေး စခန်းများမှတဆင့် ကုန်သွယ်ရေးလုပ်ငန်းများ ပိုမိုအရှိန်ကောင်းလာရန်နှင့် ပလက်ဝမြို့မှ ရေနက်ဆိပ်ကမ်းကိုလည်း နှစ်နှစ်ခွဲအတွင်း အပြီးဆောင်ရွက်နိုင်ရန် ကြိုးစားသွားမည်ဖြစ်ကြောင်း အိန္ဒိယသံအမတ်က ပြောဆိုခဲ့ကြောင်းသိရသည်။
