(006SV)
ချင်းပြည်နယ်၊ ပလက်ဝမြို့ကို စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်မှုများကြောင့် စစ်သုံပန်းများအဖြစ် ဖမ်းဆီးထိန်းသိမ်းထားသည့် စစ်ကောင်စီတပ်ဖွဲ့ဝင်တချို့ သေဆုံးပြီး တချို့ ပြင်းထန်ဒဏ်ရာများ ရရှိခဲ့ကြောင်း ရက္ခိုင်တပ်တော် AA က သတင်းထုတ်ပြန်သည်။
ဖေဖော်ဝါရီလ ၁၁ ရက် ညနေ ၄ နာရီ မီနစ် ၅၀ ခန့်တွင် ရက္ခိုင်တပ်တော်က ပလက်ဝမြို့ကို စစ်ကောင်စီက ဂျက်ဖိုက်တာ (၁) စီးဖြင့် ၂ ကြိမ် လာရောက်၍ ဗုံးကြဲတိုက်ခိုက်မူများ ပြုလုပ်ခဲ့ပြီး လေယာဉ်ပေါ်မှ စစ်သေနတ်များဖြင့်ပါ ပစ်ခတ်တိုက်ခိုက်ခဲ့သည်ဟု ညီနောင်မဟာမိတ် (၃) ဖွဲ့က သတင်းထုတ်ပြန်သည်။
ယင်းတိုက်ခိုက်မှုတွင် အသက် ၈ နှစ်အရွယ် ကလေးငယ် (၁) အပါအဝင် အရပ်သားပြည်သူ (၂) ဦး ပွဲချင်းပြီးသေဆုံးခဲ့ကာ ဒေသခံပြည်သူ ၄ ဦးထက်မနည်း ထိခိုက်ဒဏ်ရာများ ရရှိခဲ့ကြောင်း သိရသည်။
ထို့အပြင် လေကြောင်းတိုက်ခိုက်မှုကြောင့် ပလက်ဝမြို့တွင် စစ်သုံပန်းဥပဒေအရ ရက္ခိုင့်တပ်တော်၏ ဖမ်းဆီးထိန်းသိမ်းထားပြီး ကျန်းမာရေးစောင့်ရှောက်မှုပေးနေသည့် စစ်ကောင်စီတပ်ဖွဲ့ဝင်တချို့ သေဆုံးကာ တချို့ ပြင်းထန်ဒဏ်ရာများ ရရှိခဲ့ကြောင်း သိရသည်။
ပြီးခဲ့သည့် ဇန်နဝါရီလကုန်ပိုင်းကလည်း ပလက်ဝမြို့နယ်၊ CDF Daai ထိန်းချုပ်နယ်မြေအတွင်းက ဟုမ်းကျေးရွာကို စစ်ကောင်စီက လေကြောင်းက ၃ ကြိမ် ဗုံးကြဲတိုက်ခိုက်ရာ အရပ်သား ၇ ဦး သေဆုံးခဲ့ပြီး နေအိမ်များလည်း ထိခိုက်ပျက်စီးခဲ့ရသည်။
ချင်းပြည်နယ်၊ ပလက်ဝမြို့နယ်တစ်ခုလုံးရှိ စစ်ကောင်စီတပ်စခန်းနှင့် ရဲစခန်းအားလုံးကို ရက္ခိုင်တပ်တော် AA က ယခုနှစ် ဇန်နဝါရီလလယ်တွင် အပြီးသတ်သိမ်းပိုက်ပြီးနောက် စစ်ကောင်စီ ကင်းစင်နယ်မြေအဖြစ် ကြေညာကာ ယနေ့အချိန်ထိ ထိန်းချုပ်စိုးမိုးထားသည်။
