ချင်းပြည်နယ် ပလက်ဝမြို့နယ်တွင် စစ်ကောင်စီတပ်ဖွဲ့နှင့် ချင်းကာကွယ်ရေးတပ်ဖွဲ့အကြား ဇန်နဝါရီလအတွင်းက တိုက်ပွဲပေါင်းအနည်းဆုံး ၅ ကြိမ်ဖြစ်ပွားခဲ့ပြီး စစ်ကောင်စီတပ်ဖွဲ့ဘက်က ၁၆ ယောက် သေဆုံး အများအပြား ဒဏ်ရာရရှိခဲ့သည်ဟု CDF-Paletwa က ထုတ်ပြန်သည်။
ပလက်ဝမြို့နယ် CDF-Paletwa တပ်ရင်း-၂ ထိန်းချုပ်နယ်မြေနယ်အတွင်းရှိ ရှင်းလက်ဝဂိတ်၊ ခုံရွာ၊ ရှင်းလက်ဝနှင့် ခုံရွာကြားတို့တွင် စစ်ကောင်စီတပ်ဖွဲ့ နှင့် CDF-Paletwa, CNA, CJDC -Special Force စသည့် ချင်းကာကွယ်ရေး ပူးပေါင်းတပ်ဖွဲ့တို့ တိုက်ပွဲခဲ့ကြပြီး စစ်ကောင်စီဘက်က ၁၆ ယောက်သေ ဆုံးကာ ၁၅ ဦးထက်မနည်း ထိခိုက်ဒဏ်ရာရရှိခဲ့သည်ဟု CDF-Paletwa က ယနေ့ထုတ်ပြန်သည်။
အဆိုပါတိုက်ပွဲများအတွင်း ချင်းကာကွယ်ရေးတပ်ဖွဲ့များမှ MA-1 (၁) လက် သိမ်းဆည်းရမိပြီး ရဲဘော် (၂) ဦး ပြင်းထန်စွာ ထိခိုက်ဒဏ်ရာရရှိခဲ့သည်။
ထို့အပြင် စစ်ကောင်စီတပ်ဖွဲ့များ၏ ပစ်ခတ်မှုကြောင့် အပြစ်မဲ့ပြည်သူတစ်ဦး အသက်ဆုံးရှုံးခဲ့ရသည်ဟုဆိုသည်။
ယင်း စစ်ဆင်ရေး နယ်မြေများတွင် စစ်ကောင်စီတပ်ဖွဲ့ဘက်က အချိန်မရွေး စစ်ကြောင်းထိုးနိုင်သဖြင့် ပြည်သူများ သတိရှိစွာဖြင့် သွားလာ လှုပ်ရှားရန် CDF-Paletwa က အသိပေးထုတ်ပြန်ထားသည်။
