(005MK)
အာရက္ခတပ်တော် ULA/AA ထိန်းချုပ်ထားသော ချင်းပြည်နယ်တောင်ပိုင်းဒေသ ပလက်ဝမြို့နယ် စိမ်းညင်းဝကျေးရွာ ကို စစ်တပ်ကဗုံးကြဲတိုက်ခိုက်ရာတွင် ကလေးငယ်အပါဝင်ပြည်သူ ၅ ယောက်သေဆုံးပြီး ၁၇ ယောက်ဒဏ်ရာရရှိ ကြောင်း သိရသည်။
စိမ်းညင်းဝကျေးရွာကို ယနေ့ သြဂုတ် ၂၄ ရက် နေ့လည် ၁၁ နာရီ ၉ မိနစ်၊ ၁၁ နာရီ ၁၂ မိနစ် နှင့် ၁၁ နာရီ ၁၆ မိနစ်တို့ တွင် သုံးကြိမ် တိုင်တိုင် စစ်တပ်က ဂျက်ဖိုက်တာ ၂ စီးနှင့် ပေါင် ၅၀၀ ဗုံးနှစ်လုံး၊ ပေါင် ၃၀၀ ဗုံးတစ်လုံးနဲ့ ရော့ကတ်သီး ၈ လုံးတို့ဖြင့် ဗုံးကြဲတိုက်ခိုက်ခဲ့သည်ဟု Paletwa Times ကဖော်ပြသည်။
လေကြောင်းတိုက်ခိုက်မှုအတွင်း ဗုံး ၅ လုံးမှာ ရွာဘုန်းကြီးကျောင်း ဓမ္မာရုံအဆောင်မှာ ၁ လုံး၊ ရွာအလယ်မှာ ၃ လုံးနှင့် ရွာအဆုံးမှာ ၁ လုံး ကျရောက်ပေါက်ကွဲခဲ့သည်ဟု ဆိုသည်။
ဗုံးကြဲတိုက်ခိုက်မှုကြောင့် ဒေါ်သန္တာဖြူ ၇၁ နှစ်၊ မြတ်ကျော်နိုင် ၁၀ နှစ်၊ ဒေါ်ခိုင်ခိုင်စိုး ၄၆ နှစ်၊ ဒေါ်မသန်းဝင်း ၃၆ နှစ်၊ မောင်ထက်မြတ်ကျော် ၁ နှစ်တို့ နေရာမှာတင် ပွဲချင်းသေဆုံးသွားပြီး ကလေးငယ် ၈ ဦးအပါအဝင် ပြည်သူ ၁၇ ဦး အသေးစား နှင့် အလတ်စားဒဏ်ရာရရှိခဲ့ကြောင်း သိရသည်။
ထို့အပြင် လူနေအိမ် ၁၉ လုံး၊ ဘုန်းတော်ကြီးကျောင်း၊ ဓမ္မာရုံအဆောင်နှင့် ဆွမ်းစားဆောင်တို့ ပျက်စီးသွားပြီး ကာလ တန်ဖိုး ငွေကျပ် ၉၀၀ ကျော်အထိ ဆုံးရှုံးပျက်စီသွားသည်ဟု Paletwa Times ကဖော်ပြသည်။
အာဏာသိမ်းစစ်တပ်သည် သြဂုတ် ၁၁ ရက်နေ့ကလည်း ပလက်ဝမြို့ကို လေကြောင်းတိုက်ခိုက်ရာတွင် ဆယ်ကျော် သက်အရွယ်မိန်းကလေးနှစ်ယောက် ထိခိုက်ဒဏ်ရာရရှိခဲ့ပြီး သြဂုတ်လ ၁၂ ရက်နေ့ကလည်း ဆမီးမြို့ကို ဗုံးကြဲ တိုက်ခိုက်ခဲ့ရာ ဆယ်ကျော်သက်အရွယ် မိန်းကလေးတစ်ယောက် သေဆုံးကာ ကိုးယောက် ထိခိုက်ဒဏ်ရာရရှိခဲ့ကြောင်း သိရသည်။
