စစ်ကောင်စီတပ်ဖွဲ့က အပြင်းအထန် ထိုးစစ်ဆင်တိုက်ခိုက်ခဲ့သည့် ကလေးမြို့မြောက်ပိုင်း ပျဉ်းတောဦးကျေးရွာတွင် ယနေ့မနက်ပိုင်းက ရုပ်အလောင်း ၃ လောင်း တွေ့ရှိခဲ့ကြသည်ဟု သိရသည်။
ယနေ့ဧပြီလ ၆ ရက်နေ့မနက်ပိုင်းတွင် ပြည်သူ့ကာကွယ်ရေးတပ်ဖွဲ့များက ပျဉ်းတောဦးကျေးရွာထဲကို နယ်မြေရှင်းလင်းရေးဝင်ရောက်ချိန်တွင် ပျဉ်းတောဦးမှ နန်းစောင်းပုရွာဘက်သွားသောလမ်းတွင် ရုပ်အလောင်း ၃ လောင်း တွေ့ရှိခဲ့ကြသည်ဟု သိရသည်။
အဆိုပါရုပ်အလောင်း ၃ လောင်းထဲက တစ်ဦးမှာ ပြည်သူ့ကာကွယ်ရေးတပ်ဖွဲ့ဝင်တစ်ဦးဖြစ်သည်ဟု သိရပြီး ကျန် ၂ ဦးမှာ အရပ်သားပြည်သူဖြစ်နိုင်သည်ဟု ယူဆကြသည်။
၎င်းတို့သည် ရုပ်ပျက်ဆင်းပျက်ဖြစ်အောင် ညှင်းပန်းနှိပ်စက်ခံထားရသောကြောင့် မည်သူမည်ဝါမှန်း မသိနိုင်သေးကြောင်း သိရသည်။
စစ်ကောင်စီတပ်ဖွဲ့သည် ပျဉ်းတောဦးကျေးရွာထဲက နှစ်ခြင်းအသင်းတော်ဘုရားကျောင်းတစ်ကျောင်းအပါအဝင် လူနေအိမ်များလည်း ဖျက်ဆီးခဲ့ကြသည်။
