(006SV)
ချင်းပြည်နယ်၊ ဖလမ်းမြို့သိမ်းတိုက်ပွဲအတွင်း ခလရ – ၂၆၈ တပ်ရင်းမှူးနှင့် ဒုတပ်ရင်းမှူးတို့ သေဆုံးကြောင်း စစ်ကောင်စီ တပ်တွင်းသတင်းရင်းမြစ်များကို ကိုးကားပြီး CDM ဗိုလ်ကြီးဇင်ယော်က ပြောသည်။
“ခလရ ၂၆၈ က တပ်ရင်းမှူး ဒုတိယဗိုလ်မှူးကြီး ဝေလင်းထွန်းနဲ့ ဒုတပ်ရင်းမှူး ဗိုလ်မှူး အောင်သီဟတို့ ကျဆုံးသွားတာ ဖြစ်ပါတယ်။ ဒုတပ်ရင်းမှူးက တပ်ရင်းမှူးထက်အရင် ကျဆုံးတယ်လို့ သုံးသပ်ရပါတယ်။ တပ်ရင်းမှူးက ၁၇ ရက်နေ့မှာ ကျတယ်။ တိုက်ပွဲဖြစ်စဉ်ကိုတော့ အသေးစိတ် မသိပါဘူး။ တပ်ရင်းမှူးနဲ့အတူ အယောက် ၂၀ လောက်ကျတယ်” ဟု ဗိုလ်ကြီးဇင်ယော်က ခိုနူမ်းသုန်သတင်းဌာနကို ပြောသည်။
မတ်လ ၁၇ ရက်က ဖလမ်းမြို့တိုက်ပွဲမှာ ခလရ – ၂၆၈ တပ်ရင်းမှူး ဒုတိယဗိုလ်မှူးကြီး ဝေလင်းထွန်း သေဆုံးပြီး တပ်ရင်းမှူး မကျဆုံးမှီ ဒုတပ်ရင်းမှူး အောင်သီဟ သေဆုံးကြောင်း၊ လတ်တလောတွင် စစ်ကောင်စီတပ်သား ၈ ဦးခန့်လည်း ပျောက်ဆုံးနေသည်ဟု သိရသည်။
ခလရ – ၂၆၈ တပ်ရင်းမှူးနှင့် ဒုတပ်ရင်းမှူးတို့ သေဆုံးမှုနှင့် ပတ်သက်၍ CNDF ပြောရေးဆိုခွင့်ရှိသူများထံ ဆက်သွယ်မေးမြန်းသော်လည်း တစုံတရာ ဖြေဆိုအတည်ပြုခြင်း မပြုပါ။
တပ်ရင်းမှူး ဒုတိယဗိုလ်မှူးကြီး ဝေလင်းထွန်း၏ ဇနီးသည် ဖလမ်းမြို့တပ်တွင် လိုက်ပါနေထိုင်ခြင်းမရှိဘဲ မော်လမြိုင်မှာ နေထိုင်ကြောင်း၊ လက်ရှိတွင် နာရေးရက်လည်ကို မော်လမြိုင်တွင် ပြုလုပ်ရန် ပြင်ဆင်နေသည်ဟု သိရသည်။
ဖလမ်းမြို့တိုက်ပွဲတွင် စစ်ကောင်စီမှ ဗျူဟာမှူး သို့မဟုတ် စစ်ဦးစီး ပထမတန်းအဆင့် စသဖြင့် တပ်ရင်းမှူးများထက် ရာထူးကြီးသူက လာရောက်ကွက်ကဲနေသည်ဟု ယူဆရကြောင်း ဗိုလ်ကြီးဇင်ယော်က ပြောသည်။
လက်ရှိတွင် ရန်ကုန်တိုင်း၊ ထောက်ကြန့်အခြေစိုက် ခလရ – ၃၉၁ မှ စစ်တက္ကသိုလ် အပတ်စဉ် ၄၆ ကျောင်းဆင်း တပ်ရင်းမှူး မင်းခန့်အောင်နှင့် ဒု-တပ်ရင်းမှူး (စုံစမ်းဆဲ) တို့သည် အင်အား ၅၀ ခန့်ဖြင့် ဖလမ်းမြို့တိုက်ပွဲကို စစ်ကူရောက်နေပြီး စစ်တိုက်ရန် ငြင်းဆန်မှုဖြင့် အချုပ်ထဲရောက်နေသည်ဟု ဗိုလ်ကြီးဇင်ယော်က ပြောသည်။
“လက်ရှိရောက်နေတဲ့ ထောက်ကြန့်အခြေစိုက် ခလရ ၃၉၁ က တပ်ရင်းမှူးနဲ့ ဒုတပ်ရင်းမှူးလည်း အချုပ်ထဲကို ရောက်နေတယ်လို့ သိရတယ်။ နှစ်ယောက်စလုံး အချုပ်ထဲကို ရောက်နေတယ်ဆိုတော့ ဒါဟာ စစ်တိုက်ရန် ငြင်းဆန်မှုလို့ပဲ သုံးသပ်တယ်” ဟု ဗိုလ်ကြီးဇင်ယော်က တပ်တွင်းသတင်းရင်းများကို ကိုးကားပြီး ပြောသည်။
ချင်းညီနောင် စစ်ဆင်ရေးအဖြစ် ဖော်ဆောင်နေသည့် ဖလမ်းမြို့သိမ်းတိုက်ပွဲတွင် စစ်ကောင်စီ ဂျက်ဖိုက်တာ အပါအဝင် လေယာဉ်မျိုးစုံဖြင့် အပြင်းအထန် ဗုံးကြဲတိုက်ခိုက်နေပြီး မတ်လ ၁၅ ရက်ထဲမှာပင် ဗုံးကြဲမှု ၁၆၀ နီးပါး ပြုလုပ်သည်ဟု CNDF ကာကွယ်ရေးဌာန အတွင်းရေးမှူး Mai Olivia Thawng Luai က ပြောသည်။
မတ်လ ၁၁ ရက်မှ စတင်၍ စစ်ကောင်စီက နေ့စဉ်နှင့်အမျှ ဂျက်ဖိုက်တာအပါအဝင် Y12 လေယာဉ်နှင့် Mi 35 စသည့် လေယာဉ်များဖြင့် ပေါင် ၅၀၀ ဗုံးအပါအဝင် ဗုံးကြဲမှုများ ပြင်းပြင်းထန်ထန် ပြုလုပ်နေသည်ဟု သိရသည်။
CDM ဗိုလ်ကြီး ဇင်ယော်က လက်ရှိ ဖလမ်းမြို့စစ်ရေးအခြေအနေမှာ အပြင်းထန်ဆုံးအဆင့်ကို ရောက်နေသည်ဟု ပြောသည်။
“ဖလမ်းဘက်မှာက စစ်ရေးအခြေအနေက အပြင်းထန်ဆုံးအဆင့်ကို ရောက်နေတယ်လို့ပဲ လောလောဆယ် သိရှိထားရတယ်။ ဖလမ်းမှာက အဲတပ်ရင်းဌာနချုပ် တခုလေးပဲ ကွက်ကွက်လေး ကျန်တော့တာပေါ့။ လက်နက်ချဖို့ လည်း ချင်းတိုင်ရင်းသားတွေက တောင်းဆိုနေတာ ရှိတယ်။ သူတို့ ကြာရင်တော့ လက်နက်ချမယ့် သဘောရှိပါတယ်။ သူတို့ တင်းခံနေရင်လည်း တိုက်ပွဲက ကြာ မယ်။ သူတို့ပဲ ငတ်မယ်။ လက်နက်ချလိုက်တာမှ သူတို့ အေးအေးဆေးဆေး လွတ်လွတ်လပ်လပ်နေရမယ်ဆိုတဲ့ဟာ လက်ခံ လာအောင် ချင်းတပ်စုပေါင်းက ကြိုးစားနေတယ်” ဟု CDM ဗိုလ်ကြီး ဇင်ယော်က ပြောသည်။
၂၀၂၄ နိုဝင်ဘာလ ၉ ရက်မှစတင်၍ ဖလမ်းမြို့ကို ချင်းညီနောင်နှင့် တော်လှန်ရေး ပူးပေါင်းတပ်များက ထိုးစစ်ဆင်ခဲ့ရာ မြို့ပေါ်ရှိ စစ်ကောင်စီစခန်းအားလုံးကို သိမ်းပိုက်ထားပြီး နောက်ဆုံးကျန်ရှိနေသေးသော ခလရ – ၂၆၈ တပ်ရင်းကို အပြီးသတ် သိမ်းနိုင်ရေးအတွက် ဝိုင်းဝန်ပိတ်ဆို့၊ ဖြတ်တောက်ကာ တိုက်ခိုက်လျက်ရှိသည်။
ဖလမ်းမြို့တိုက်ပွဲတွင် စစ်ကောင်စီတပ်ဖွဲ့ဝင်အချို့ ထွက်ပြေးသူများရှိသည့်အပြင် စစ်သုံ့ပန်များအဖြစ် ဖမ်းဆီးခံရသူများနှင့် တိုက်ပွဲအတွင်းအကျအဆုံးများကြောင်း၊ တော်လှန်ရေးပူးပေါင်းတပ်ဖွဲ့ကလည်း ထိခိုက်ကျဆုံးမှုများ ရှိနေကြောင်း သိရသည်။
