စစ်ကော်မရှင် ထိုးစစ်များသည် ဖလမ်းမြို့နှင့် ဆုရ်းဘုန်လေဆိပ်သို့ ဦးတည်ဟု ICA သုံးသပ်
(006SV)
အာဏာသိမ်းစစ်ကော်မရှင်၏ ချင်းပြည်နယ်မြောက်ပိုင်း၊ ဖလမ်းမြို့သို့ ၄ လကြာ ထိုးစစ်ဆင်နေသည့် တိုက်ပွဲများတွင် စစ်ကော်မရှင်တပ်ဖွဲ့ဝင် ၂၀၀ ကျော် သေဆုံးပြီး စစ်သုံ့ပန်းအဖြစ် ဖမ်းဆီးခံရသူ ၄၀ ကျော် ရှိနေကြောင်း ချင်းရေးရာ အဖွဲ့ချုပ် (ICA) ထံမှ သိရသည်။
ပြီးခဲ့သည့် နိုဝင်ဘာလမှ စတင်၍ ဝေဘူလ- ဖလမ်းနှင့် သိုင်းငင်း- ဖလမ်းလမ်းကြောင်းတို့မှတက်လာသော အင်အား ၁၀၀၀ ခန့်ရှိ စစ်ကော်မရှင်တပ်သည် ဖလမ်းမြို့အတွင်းစစ်ဆင်ရေးမှာ ချင်းတော်လှန်ရေး ပူးပေါင်းတပ်များက ဒရုန်းအပါအဝင် နည်းမျိုးစုံဖြင့် ခုခံတွန်းလှန်မှုကြောင့် စစ်ကော်မရှင်တပ်ဖွဲ့ဝင် ၂၀၀ ကျော် သေဆုံးသည်ဟု ဆိုသည်။
“ကျနော်တို့ အပေါ်ယံကြည့်မယ်ဆိုရင်၊ ကျနော်တို့ ထဲထဲ ဝင်ဝင်တော့ ဒါက စစ်ရေးကိစ္စဆိုတော့ မသိဘူးပေါ့။ ဒါပေမယ့် လေ့လာသုံးသပ်ကြည့်ရတာတော့ ဒရုန်းနဲ့ တိုက်ခိုက်မှုမှာ စကမတွေ အတော်လေး အထိနာတာ တွေ့ရတယ်။ နောက်တစ်ခုက စနိုက်ဘာပေါ့နော်။ ဒီ ၂ ခုကတော့ သိသိသာသာ ထင်ထင်ရှားရှား တွေ့ရတယ်။ ထွက်ပြေးတာက သူတို့က စစ်မတိုက်ချင်တော့လို့ ထွက်ပြေးရင် လမ်းမှာ အဖမ်းခံရတာတို့၊ ကျနော်တို့ ဒေတာ ပြုစုတဲ့အထဲ မပါရှိနိုင်တာက ဖမ်းဆီးမခံရဘဲ ထွက်ပြေးသွားနိုင်တဲ့ လူတွေလည်း တော်တော်များများ ရှိနိုင်တယ်။ အဲလိုအခြေအနေ ရှိတယ်” ဟု ICA မှ ပြောရေးဆိုခွင့်ရှိသူ Salai Van Sui San က ပြောသည်။
စစ်ကော်မရှင်တပ်ဖွဲ့မှ ထိခိုက်ဒဏ်ရာ ရရှိသူ ၂၅၀ ကျော် ရှိပြီး စစ်သုံ့ပန်းအဖြစ် ဖမ်းဆီးခံရသူ ၄၀ ကျော် ရှိခဲ့ကြောင်း၊ တချို့ဖြစ် ရပ်များတွင် စစ်ကော်မရှင်တပ်သည် တိုက်ပွဲအပြီး လက်နက်ချခြင်းဖြစ်ကြောင်း သိရသည်။
၂၀၂၅ နိုဝင်ဘာလမှ ၂၀၂၆ ဖေဖော်ဝါရီလအထိ ချင်းမြောက်ပိုင်းဒေသ တိုက်ပွဲများတွင် CNA ၊ CNDF ၊ CDFs များ အပါအဝင် ချင်းတော်လှန်ရေးတပ်ဖွဲ့ဝင် ၄၂ ဦးထက်မနည်းလည်း ကျဆုံးပြီး ၁၀၀ ကျော် ထိခိုက်ဒဏ်ရာများ ရရှိကြောင်း ICA ၏ စာရင်းများ အရ သိရသည်။
လေကြောင်းတိုက်ခိုက်မှုနှင့် ဒရုန်းဗုံးကြဲမှုများက ချင်းကာကွယ်ရေးတပ်ဖွဲ့ဝင်များအပေါ် အဓိက ထိခိုက်မှု ဖြစ်စေကြောင်း လေ့လာတွေ့ရှိရသည်ဟု သိရသည်။
“တော်လှန်ရေးတပ်သားတွေ ထိခိုက်သေဆုံးမှုတွေက မြေပြင်ကနေ တတ်နိုင်သလောက် အချက်အလက် စုစည်းထားတာ ဖြစ်တယ်။ အမှန်မှာ ဒီထက်ပိုများကောင်း၊ များနိုင်ပါတယ်။ ကျနော်တို့ ရရှိထားတဲ့ အချက်အလက်တွေက ဆိုရှယ်မီဒီယာပေါ် တက်လာတဲ့ ဒေတာတွေနဲ့ မြေပြင်မှာ ရနိုင်သလောက် ကောက်ယူထားတဲ့ ဒေတာတွေ ဖြစ်ပါတယ်” ဟု ချင်းရေးရာအဖွဲ့ချုပ် (ICA) မှ ပြောရေးဆိုခွင့်ရှိသူ Salai Van Sui San က ပြောသည်။
စစ်ကော်မရှင်၏ လက်ရှိ အင်အားအလုံးအရင်းဖြင့် ရက်ရှည်လများ ထိုးစစ်ဆင်နေမှုသည် ဖလမ်းမြို့၏ ပထဝီအရ မဟာဗျူဟာ အရေးပါမှုနှင့် အုပ်ချုပ်ရေး၊ စစ်ရေးဆိုင်ရာ လိုအပ်ချက်များအတွက် ဖလမ်းမြို့နှင့် မြို့အနီးရှိ ဆုရ်းဘုန်လေဆိပ်ကို သိမ်းပိုက် နိုင်ရေး ရည်ရွယ်လုပ်ဆောင်နေသည်ဟု ICA က သုံးသပ်ထားသည်။
တိုက်ပွဲများတွင် စစ်ကော်မရှင်တပ်သည် ဆက်လက်ရှေးမတိုးနိုင်ပါက ရောက်ရှိနေသော တောတောင်နေရာများတွင် ခံတပ်အဖြစ် ကတုတ်ကျင်းများ တူဖော်းပြီး အခိုင်အမာတပ်စွဲမှု ပြုလုပ်နေကြောင်း၊ လေတပ်မှလည်း နေ့စဉ်နီးပါး ရိက္ခာနှင့် ပစ္စည်းများ ပို့ဆောင်ပေးနေကြောင်း သိရသည်။
“စကမက ဖလမ်းမြို့နဲ့ ဆုရ်းဘုန်လေဆိပ်ကို ပြန်လည် ရရှိရေးအတွက် အလုံအရင်းနဲ့ ကြိုးစားလာတာ။ ဆူရ်းဘုန် လေဆိပ်ကို ပြန်လည်ထိန်းချုပ်နိုင်ခြင်းအားဖြင့် သူတို့က ချင်းပြည်နယ်မြောက်ပိုင်းမှာ လေကြောင်း ထောက်ပံ့မှုတွေ အပြည့်အဝ ပြန်လည်း ရရှိနိုင်မယ်ပေါ့နော်။ နောက်တချက်က ဖလမ်းမြို့ကို သူတို့ ပြန်လည်ထိန်းချုပ်ထားခြင်းအားဖြင့် နယ်စပ်လုံခြုံရေးအထိပါ တိုးချဲ့ လာနိုင်မယ်ပေါ့နော်။ နောက်တချက်က သူတို့ ရွေးကောက်ပွဲလည်း ပြီးသွားပြီဆိုတော့ မကြာခင် ဧပြီလထဲမှာ အစိုးရ သစ်ပြန် လည် လည်ပတ်ဖို့ ကြိုးစားနေတဲ့ပေါ်မှာလည်း အများကြီး သက်ဆိုင်နေမယ် ထင်ပါတယ်” ဟု ICA မှ ပြောရေးဆိုခွင့်ရှိသူ Salai Van Sui San က ပြောသည်။
ဖလမ်းတိုက်ပွဲများတွင် စစ်ကော်မရှင်တပ်၏ လေကြောင်းတိုက်ခိုက်မှုသည် ထင်ရှားစွာ မြင့်တက်လာနေပြီး ဒရုန်းဗုံးကြဲမှု၊ အသေခံဒရုန်းအသုံးပြုမှု အပါအဝင် လေကြောင်းမှ ဗုံးကြဲမှု ၂၅၀၀ ကျော် ပြုလုပ်ခဲ့ကြောင်း၊ မြေပြင်တိုက်ပွဲအပြင် အဝေးထိန်းစနစ်အသုံးပြု စစ်ရေး မဟာဗျူဟာကို တိုးမြှင့်အသုံးပြုနေကြောင်း သိရသည်။
တိုက်ပွဲအတွင်း လူနေအိမ်၊ ကျောင်း၊ ဘုရားကျောင်း၊ ဆေးရုံအပါအဝင် အဆောက်အဦး ၆၀ ထက်မနည်း ထိခိုက်ပျက်စီးကြောင်း သိရသည်။
