⏹️စစ်ကော်မရှင်မှ ၈ ဦးထက်မနည်းသေဆုံး၊ စစ်သုံ့ပန်အဖြစ် ၂ ဦးဖမ်းဆီးရမိ
(006SV)
ချင်းပြည်နယ်၊ ဖလမ်းမြို့နယ်၊ Khuangli ရွာတွင် တပ်စွဲထားသော စစ်ကော်မရှင်စစ်ကြောင်းကို ယမန်နေ့က ချင်းတော်လှန်ရေး ပူးပေါင်းတပ်က ထိုးစစ်ဆင်တိုက်ခိုက်ရာ စစ်ကော်မရှင်တပ် ထိခိုက်သေဆုံးမှု များပြားကြောင်း ချင်းလဲန်းကောင်စီ၊ ချင်းပြည်အစိုးရ၊ ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူက ပြောသည်။
ဇန်နဝါရီလ ၅ ရက် Khuangli ရွာတွင် တပ်စွဲထားသော စစ်ကော်မရှင်တပ်ကို ချင်းပူးပေါင်းတပ်က ထိုးစစ်ဆင်တိုက်ခိုက်ရာ မနက် ၆ နာရီမှ ၁၀ နာရီခန့်အထိ တိုက်ပွဲ အပြင်းအထန်ဖြစ်ပွားသည်ဟု သိရသည်။
“မနေ့က မနက် ၆ နာရီကနေ ၁၀ နာရီ ခွန်လီရွာမှာ တိုက်ပွဲပြင်းထန်ခဲ့တာပါ။ အဓိကက ကျနော်တို့က သူတို့ကို ထိုးစစ်ဆင်တာပါ။ သူတို့ရှိတဲ့ နေရာကို ထိုးစစ်ဆင်ပြီး တိုက်ခိုက်တာပါ။ ဂျက်ဖိုက်တာနဲ့က ၂ ကြိမ်လာပြီးတော့ ဗုံး ၆ လုံးလောက် လာကြဲသွားတယ်။ ဒါပေမယ့် တော်လှန်ရေးသမားတွေကတော့ ထိခိုက်တာ မရှိပေမယ့် အဲဒီ ခွန်လီရွာက အိမ်တော်တော်များများက အိမ်မီးလောင် ပျက်စီးတာ ရှိတယ်” ဟု ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူက Salai Nai John Kim က ပြောသည်။
ထိုးစစ်ဆင်တိုက်ပွဲအတွင်း စစ်ကော်မရှင်တပ်ဖွဲ့ဝင် ၈ ဦးထက်မနည်း သေဆုံးပြီး ထိခိုက်ဒဏ်ရာသူလည်း များကြောင်း၊ စစ်သုံ့ပန်း ၂ ဦးကိုလည်း ထပ်မံ ဖမ်းဆီးရမိကြောင်း သိရသည်။
လက်နက်ကြီးတချို့နှင့် လက်နက်ငယ် ၁၀ လက်အပါအဝင် ခဲယမ်းအများအပြားကိုလည်း သိမ်းဆည်းရမိသည်ဟု Salai Nai John Kim က ပြောသည်။
ဇန်နဝါရီလ ၃ ရက်ကလည်း Khuangli ရွာတွင် တပ်စွဲထားသော စစ်ကော်မရှင်တပ်သည် ဖလမ်းသို့ စစ်ကြောင်း ထိုးဝင်ရန် ကြိုးစားသောကြောင့် ချင်းပူးပေါင်းတပ်နှင့် တိုက်ပွဲ ဖြစ်ပွားပြီး စစ်ကော်မရှင်တပ်မှ ၅ ဦးသေဆုံး၊ စစ်သုံ့ပန်း ၂ ဦးကို ဖမ်းဆီးရမိကြောင်း၊ လက်နက်ခဲယမ်းများ သိမ်းဆည်းရမိကြောင်း သိရသည်။
စစ်ကော်မရှင်တပ်သည် ဖလမ်းမြို့မှ ၁၃ မိုင်ခန့်အကွာတွင် တည်ရှိသော Khuangli ရွာတွင် တပ်စွဲထားသည်မှာ တစ်လဝန်း ကျင်ရှိနေပြီးဖြစ်ကာ ၎င်းစစ်ကြောင်းတွင် အင်အား ၂၀၀ မှ ၃၀၀ ကျော်အထိ ရှိနေပြီး ချင်းပူးပေါင်းတပ်ဖွဲ့များနှင့် တိုက်ပွဲများ မကြာခဏ ဖြစ်ပွားနေသည်ဟု သိရသည်။
Khuangli ရွာတွင် ရောက်နေသော စစ်ကော်မရှင်စစ်ကြောင်းသည် ၂၀၂၅ ခုနှစ် အောက်တိုဘာလထဲတွင် ကလေးမြောက် ပိုင်းမှတဆင့် သိုင်းငင်းသို့ စစ်ကြောင်းထိုးလာပြီး ယင်းမှ ဖလမ်းမြို့ အနောက်မြောက်ကနေ ဖလမ်းမြို့ကို ဦးတည် လာနေခြင်းဖြစ်သည်ဟု သိရသည်။
ကလေးမြို့တောင်ပိုင်း- ဝေဘူလမြို့မှ ဖလမ်းမြို့အနောက်တောင်ကနေ ဖလမ်းမြို့ကို ဦးတည်၍လည်း စစ်ကော်မရှင်တပ်သည် အင်အား၂၀၀- ၃၀၀ ခန့်ဖြင့်လည်း စစ်ကြောင်းထိုးနေသည်ဟု သိရသည်။
