(004SS)
ဖလမ်း (ချင်း) ဘာသာစကားကို စာသားရိုက်ထည့်ရန်မလိုတော့ဘဲ မိမိပြောလိုက်သည့်အသံကို AI နည်းပညာဖြင့် အင်္ဂလိပ် ဘာသာသို့ တိုက်ရိုက်ဘာသာပြန်ဆိုပေးနိုင်သည့် ChinSpeak App ကို စတင်အသုံးပြုနိုင်ပြီဖြစ်ကြောင်း သိရသည်။
အဆိုပါ အက်ပလီကေးရှင်းသည် ချင်းဘာသာစကားသမိုင်းတွင် အသံဖြင့် တိုက်ရိုက်စကားပြောဆို ဆက်သွယ်နိုင်သည့် ပထမဆုံး AI ဘာသာပြန်စနစ်ဖြစ်ပြီး၊ အသံမှ စာသားပြောင်းပေးသည့်စနစ် (Speech-to-Text) နှင့် စာသားမှ အသံထွက် ပေးသည့်စနစ် (Text-to-Speech) နည်းပညာများကို အခြေခံ၍ ရေးဆွဲထားခြင်းဟု တည်ထောင်သူ Salai Nung Lian Sum က ပြောသည်။
“ဒီ App မှာ အဓိက နည်းပညာ ၃ မျိုး ပေါင်းစပ်အသုံးပြုထားတာပါ။ စကားပြန်စနစ် (Translation Technology) ကို ၂၀၂၄ ကတည်းက စတင်ခဲ့ပြီး ၂၀၂၅ ဖေဖော်ဝါရီမှာ Chin Translator အဖြစ် ထွက်ရှိခဲ့တာပါ။ အခု ChinSpeak မှာတော့ အသံနဲ့ တိုက်ရိုက် စကားပြောဆိုနိုင်ဖို့ လိုအပ်တဲ့ Data တွေကို ၁ နှစ်နီးပါး ကောက်ယူ အသံသွင်းပြီးမှ AI App အဖြစ် အကောင် အထည်ဖော်နိုင်ခဲ့တာ ဖြစ်ပါတယ်။ လက်ရှိမှာတော့ ဖလမ်း ချင်းဘာသာစကား တစ်ခုတည်းပဲ ပြောနိုင်သေးတာပါ။ တခြား မျိုးနွယ်စု ဘာသာစကားတွေအတွက်ဆိုရင်တော့ ကျွန်တော့်ကို ကူညီပေးနိုင်တဲ့ အဖွဲ့အစည်းပဲဖြစ်ဖြစ် ရှိခဲ့မယ်ဆိုရင် အပြည့်အဝ ကူညီပေးဖို့ အဆင်သင့်ရှိပါတယ်။ အဲ့လိုမျိုး မရှိဘူးဆိုရင်တော့ ကျွန်တော့်အတွက် ဘာသာစကားပိုင်းဆိုင်ရာ ဒေတာစုဆောင်းရယူမှုမှာ အခက်တွေ့နိုင်ပါတယ်” ဟု အက်ပလီကေးရှင်း ဖန်တီးခဲ့သူ Salai Nung Lian Sum က ပြော သည်။
ChinSpeak App တွင် အသုံးပြုထားသည့် Audio Resource များကို Za Hlei Thang Audiobook နှင့် Falam Media Network တို့က ပံ့ပိုးပေးထားခြင်းဖြစ်ပြီး လက်ရှိတွင် iOS (iPhone) စက်များ၌ စတင် ဒေါင်းလုဒ်ဆွဲ အသုံးပြုနိုင်ပြီ ဖြစ်သည်။
Android စနစ်အတွက်ကိုမူ Testing ပြုလုပ်လျက်ရှိကာ မကြာမီ ထွက်ရှိလာမည်ဖြစ်သည်။
ChinSpeak အက်ပလီကေးရှင်းကို ဖန်တီးခဲ့သူ Salai Nung Lian Sum သည် စင်ကာပူနိုင်ငံတွင် Analytics နှင့် AI နယ်ပယ်၌ ၁၅ နှစ်နီးပါး အတွေ့အကြုံရှိသော Data Scientist တစ်ဦးဖြစ်ပြီး Analytics & AI Director အဖြစ် တာဝန်ထမ်းဆောင်နေသူ နည်းပညာရှင်တစ်ဦး ဖြစ်သည်။
ထို့ပြင် ၎င်းသည် ချင်းလူမျိုးများအကြား ခေတ်မီ AI နည်းပညာများ ပြန့်ပွားရေးအတွက် တက်ကြွစွာ ဆောင်ရွက်နေသူ ဖြစ်ပြီး Chin TV Award ဆုကိုလည်း ရရှိထားသူဖြစ်သည်။
ChinSpeak App ၏ ထူးခြားချက်မှာ လူနှစ်ဦး တိုက်ရိုက်စကားပြောဆိုရာတွင် အဆင်ပြေစေသည့် Conversation Mode ပါဝင်ခြင်းဖြစ်ပြီး ချင်းဘာသာပြောသူနှင့် အင်္ဂလိပ်ဘာသာပြောသူတို့အကြား အသံဖြင့် အပြန်အလှန် လွယ်ကူစွာ စကား ပြောဆိုနိုင်မည် ဖြစ်သည်။
ထို့ပြင် အဆိုပါ အက်ပလီကေးရှင်းကို ပြည်သူများ အခမဲ့ သုံးစွဲနိုင်ရန် ဆောင်ရွက်ပေးထားကြောင်း သိရသည်။
“ဒါက Chin Pawlpi, USA အဖွဲ့က ကျခံပေးတာဖြစ်တဲ့အတွက် Free App ပါ။ ပြည်သူတွေအနေနဲ့ အခမဲ့ အသုံးပြုလို့ရပါ တယ်။ ကျွန်တော်တို့ ချင်းပြည်သူတွေ နည်းပညာကို ပိုမို သုံးစွဲလာနိုင်ဖို့အတွက် လောလောဆယ်မှာ ပြည်သူတွေ Free ပဲ အသုံးပြုဖို့ လိုပါသေးတယ်” ဟု အက်ပလီကေးရှင်း ဖန်တီးခဲ့သူ Salai Nung Lian Sum က ဆိုသည်။
အက်ပလီကေးရှင်း တစ်ခုလုံးအတွက် သုံးစွဲခဲ့ရသည့် ကုန်ကျစရိတ်၊ ပေးဆပ်ခဲ့ရသည့် ကြိုးပမ်းအားထုတ်မှုနှင့် ပေးခဲ့ရသည့် အချိန်ပမာဏများကို တိတိကျကျ ပြောဆိုရန် ခက်ခဲကြောင်းနှင့် အနာဂတ် Project များအတွက် လိုအပ်သည့် Resource နှင့် Data များပေါ်မူတည်၍ ကုန်ကျစရိတ် မည်မျှရှိမည်ကို အကြံဉာဏ်ပေးနိုင်ကြောင်း ၎င်းက ဆက်လက်ပြောဆိုသည်။
စစ်အာဏာသိမ်းပြီးနောက်ပိုင်း ကြုံတွေ့နေရသည့် အခက်အခဲများကြားမှ ချင်းလူငယ်များအနေဖြင့် AI နှင့် နည်းပညာပိုင်း ဆိုင်ရာများကို လက်မလျှော့ဘဲ ဆက်လက်လေ့လာကြရန်လည်း ၎င်းက တိုက်တွန်းထားသည်။
လူငယ်များ ကိုယ်တိုင် လေ့လာနိုင်ရန်အတွက်လည်း Chinland InfoTech Academy (www.chinlandinfotech.com/academy) ဆိုသည့် Self-Learning Platform ကိုပါ ဖန်တီးပေးထားကြောင်း သိရသည်။
