ချင်းပြည်နယ် မင်းတပ်မြို့ပေါ်တွင် ယနေ့နံနက်ပိုင်းကစ၍ စစ်ကောင်စီတပ်နှင့် CDF-မင်းတပ်တို့အကြား မြို့တွင်းပစ်ခတ်မှုဖြစ်ပွားကာ စစ်ကောင်စီတပ်သား ၅ ဦးခန့် သေဆုံးခဲ့သည်ဟု သိရသည်။
စစ်ကောင်စီတပ်ဖွဲ့များတပ်စွဲထားသော မင်းတပ်မြို့ဝင်ဂိတ်ကို ယနေ့နံနက်ပိုင်း ၇ နာရီခန့်က CDF-မင်းတပ်က သွားရောက်ပစ်ခတ်ရာ အပြန်အလှန်ပစ်ခတ်မှု ဖြစ်ပွားခဲ့ပြီးနောက် စစ်ကူရန်လာကြသော စစ်ကောင်စီတပ်ဖွဲ့ကို လဝကရုံးနားမှ ကြားဖြတ်တိုက်ခိုက်ခဲ့ရာ ၃ ဦးသေဆုံးကာ ၅ ဦး ဒဏ်ရာရရှိခဲ့သည်ဟု CDF-မင်းတပ်က သတင်းထုတ်ပြန်သည်။
ထို့နောက် နံနက်ပိုင်း ၉ နာရီခွဲ ဝန်းကျင်ခန့်တွင် စစ်ကောင်စီနှင့် CDF-မင်းတပ်တို့ ပစ်ခတ်မှုဆက်လက်ဖြစ်ပွားရာ စစ်ကောင်စီဘက်က ၂ ဦးသေဆုံးကာ ၃ ဦးထက်မနည်း ဒဏ်ရာရရှိသည်ဟု သိရသည်။
အဆိုပါပစ်ခတ်မှုဖြစ်ပွားပြီးနောက် မင်းတပ်မြို့ပေါ်အခြေစိုက် (၂၇၄) တပ်နှင့် ကျောက်ထုအမြောက်တပ်တို့မှ လက်နက်ကြီးဖြင့် ၉ ကြိမ်ခန့်ပစ်ကူကြရာ ၂ လုံးမှာ ဘောင်ထဲကျေးရွာအနီး တောင်ယာတဝိုက်တွင် ကျရောက်ခဲ့ပြီး အပျက်အစီးရှိ/မရှိ စုံစမ်းလျှက်ရှိကြောင်း CDF-မင်းတပ်က ထုတ်ပြန်သည်။
