(006SV)
ချင်းပြည်နယ်၊ မင်းတပ်မြို့ပေါ်ကို အာဏာသိမ်းစစ်တပ်က ဂျက်ဖိုက်တာ ၃ စီးဖြင့် လေကြောင်းတိုက်ခိုက်မှုများ ပြုလုပ်ရာ အရပ်သားနေအိမ် အပါအဝင် အဆောက်အဦး ၂၀ ကျော် ထိခိုက်ပျက်စီးကြောင်း မင်းတပ်မြို့ဒေသခံများထံမှ သိရသည်။
ဧပြီလ ၁၁ ရက် ယမန်နေ့ညနက်ပိုင်း ၁၀ နာရီဝန်းကျင်က မင်းတပ်မြို့ပေါ် နေရာများကို အာဏာသိမ်းစစ်တပ်က ဂျက်ဖိုက်တာ ၃ စီး အသုံးပြု၍ မီးလောင်ဗုံးများအပါအဝင် ဗုံး ၈ ကြိမ်ခန့် ကြဲချတိုက်ခိုက်သွားသည်ဟု မင်းတပ်မြို့ခံ ကိုဟာကလေးထံမှ သိရသည်။
လေကြောင်းတိုက်ခိုက်မှုများကြောင့် မင်းတပ်မြို့ပေါ် အရပ်သားနေအိမ်နှင့် အဆောက်အဦးများ ၂၀ ကျော် ထိခိုက်ပျက်စီးသွားကြောင်း၊ အိမ်စီးကား ၄ စီးလည်း ထိခိုက်ပျက်စီးသွားကြောင်း သိရသည်။
ယင်းတိုက်ခိုက်မှုအတွင်း ဒေသခံပြည်သူတချို့ ထိခိုက်သေဆုံးမှု ရှိသည်ဟု ကနဦး သတင်းများ ထွက်ပေါ်နေပြီး ခေါ်နုသုမ်းအနေဖြင့် ဆက်လက်စုံစမ်းနေဆဲဖြစ်သည်။
ချင်းကာကွယ်ရေးတပ်ဖွဲ့ – မင်းတပ်က သိမ်းပိုက်ထိန်းချုပ်ပြီး အုပ်ချုပ်ရေးလုပ်ငန်းများ အကောင်အထည်ဖော် လည်ပတ်နေသည့် မင်းတပ်မြို့ပေါ်နှင့် မြို့နယ်ဒေသများကို အာဏာသိမ်းစစ်တပ်က လေကြောင်းတိုက်ခိုက်မှုများ မကြာခဏ ပြုလုပ်နေကြောင်း သိရသည်။
