(006SV)
ချင်းပြည်နယ်တောင်ပိုင်း၊ မတူပီမြို့နယ်တွင် ဝင်ရောက်လုပ်ကိုင် ဆောင်ရွက်ကြမည့် NGO၊ INGO နှင့် အရပ်ဖက် အဖွဲ့အစည်း များအနေဖြင့် နိုင်ငံရေးများ စွက်ဖက်ပါဝင်ပတ်သက်ခြင်း မပြုလုပ်ရန် CDF – မတူပီ၊ တပ်မဟာ – ၂ က ကြိုတင်သတိပေး တားမြစ်လိုက်သည်။
CDF – မတူပီ၊ တပ်မဟာ – ၂ နယ်မြေအတွင်း အရပ်ဖက်အဖွဲ့အစည်းများသည် ပြည်သူ့ဝန်ဆောင်မှု ပေးရာတွင် ချင်းပြည်ကောင်စီ – CC ဟူ၍ ဖြစ်စေ၊ ချင်းညီနောင်အဖွဲ့ – CB ဟူ၍ ဖြစ်စေ ပြောဆိုခြင်း၊ မိမိဆန္ဒမပါဘဲ CC ကိုဖြစ်စေ၊ CB ကိုဖြစ်စေ အတင်းအဓမ္မ ထောက်ခံစေခြင်းများ မပြုလုပ်ရန် မတ်လ ၂၀ ရက် ထုတ်ပြန်၍ တားမြစ်သည်။
ဒေသခံပြည်သူများကို အခွင့်အရေးပေး၍ စည်းရုံးစည်းဝေးခြင်း၊ စည်းလုံးနေသော ရပ်ရွာများကို အဖွဲ့ကွဲစေခြင်းများကိုလည်း မပြုလုပ်ကြရန် သတိပေးထုတ်ပြန်သည်။
အဆိုပါအချက်များကို ပြုလုပ်သော NGO၊ INGO နှင့် အခြားမည်သည့် အဖွဲ့အစည်းမဆို ၊ လူပုဂ္ဂိုလ်မဆို ကြီးလေးသော ပြစ်ဒဏ်ကို ခံရမည်ဖြစ်ကြောင်း တပ်မဟာ – ၂ က ဆိုသည်။
မတူပီမြို့နယ်အတွင်း ဝင်ရောက်ပြီး လုပ်ငန်းဆောင်ရွက်လိုသော NGO၊ INGO များ နှင့် အဖွဲ့အစည်းများအနေဖြင့် CDF – မတူပီ၊ တပ်မဟာ ၂ ၏ တပ်မဟာရုံးတွင် ကြိုတင်အကြောင်းကြားပြီး ခွင့်ပြုချက် ရယူပြီးမှသာ လုပ်ငန်းဆောင်ရွက်ခွင့်ပြုမည်ဟု သိရသည်။
မတူပီမြို့နယ် စစ်ဘေးရှောင်ပြည်သူများ နေရပ်သို့ လွတ်လပ်စွာ ပြန်နိုင်ရေးကို ဦးစာပေး ဆောင်ရွက်လျက်ရှိရာ မိမိတို့ ကျေးရွာ၊ တောတောင်များတွင် ပေါက်ကွဲတတ်သော ပစ္စည်းများ တွေ့ရှိပါက သက်ဆိုင်ရာ တပ်ရင်းတပ်ဖွဲ့များထံ ချက်ချင်းအကြောင်းကြားရန်လည်း မေတ္တာရပ်ခံထားသည်။
မတူပီမြို့နယ်တွင် ချင်းညီနောင်အဖွဲ့နှင့်အတူ စစ်ရေး၊ နိုင်ငံရေး ပူးပေါင်းဆောင်ရွက်သည့် CDF – မတူပီ၊ တပ်မဟာ – ၁ နှင့် ချင်း ပြည်ကောင်စီနှင့်အတူ စစ်ရေး၊ နိုင်ငံရေး ပူးပေါင်းဆောင်ရွက်သည့် CDF – မတူပီ၊ တပ်မဟာ ၂ ဟူ၍ တည်ရှိနေပြီး နှစ်ဖွဲ့သည် မိမိတို့ ထိန်းချုပ်ရာဒေသတွင် အုပ်ချုပ်ရေးယန္တရားများ လည်ပတ်နေကြသည်။
