(006SV)
ချင်းပြည်နယ်၊ ပလက်ဝမြို့နယ်စပ်ရှိ မတူပီမြို့နယ်ထဲက ဝေးလူကျေးရွာကို စစ်ကောင်စီက တိုက်လေယာဉ် ၂ စီးဖြင့် ဗုံးကြဲတိုက်ခိုက်ရာ ကလေးငယ်တစ်ဦးအပါအဝင် အရပ်သားပြည်သူ ၁၃ ဦးထက်မနည်း သေဆုံးပြီး ဒဏ်ရာရရှိထားသူ များပြားကြောင်း CDF – Daai မှ တာဝန်ရှိသူများက ပြောသည်။
“ရွာလယ်ကောင်ကို ကွက်တိကျတဲ့အခါကြတော့ ပြည်သူလူထုက အထိအခိုက်သေဆုံးမှုတွေ အများကြီးရှိသွားတယ်။ ကျနော်တို့ တပ်ဖွဲ့ဝင်တွေ သွားစစ်ဆေးနေတာရှိတယ်။ လက်ရှိသတင်းရထားတာက ပြည်သူလူထု ၁၃ ယောက် သေတယ်လို့ ပြောတယ်။ ဒဏ်ရာ ရတဲ့ အပိုင်းတွေက အတိအကျ မသိရသေးဘူး။ ကလေးတွေနဲ့ အမျိုးသမီးတွေလည်း သေဆုံးတာပါတယ်” ဟု CDF – Daai တပ်ရင်းမှူး လေပြေက ပြောသည်။
နိုဝင်ဘာလ ၁၅ ရက် ယမန်နေ့ည ၇ နာရီတွင် စစ်ကောင်စီက တိုက်လေယာဉ် ၂ စီးဖြင့် ဝေးလူကျေးရွာကို ဗုံးကြဲတိုက်ခိုက်ခဲ့ပြီး ထိခိုက်ဒဏ်ရာရရှိခဲ့သူများလည်း ၁၀ ဦးထက်မနည်းရှိနေကာ အရပ်သားနေအိမ်အများအပြားလည်း ပျက်စီးသွားသည်ဟု သိရသည်။
သေဆုံးသူများထဲတွင် မိသားစုတစ်ခုမှာ ၅ နှစ်အရွယ် ကလေးငယ်အပါအဝင် အားလုံးနီးပါး သေဆုံးသွားသည်။
ကနေဦးတွင် သေဆုံးသူ ၁၃ ဦးအထိရှိနေပြီး သေဆုံးသူ ၂ ဦးမှာ ရခိုင်တပ်တော် (AA) တပ်ဖွဲ့မှဖြစ်သည်ဟု သတင်းတွေ ထွက်ပေါ်နေသော်လည်း အတည်မပြုနိုင်သေးကြောင်း CDF Daai တာဝန်ရှိသူများက ပြောသည်။
“မနေ့က လေယာဉ်တစ်စီးနဲ့ တလှည့်စီ လာကြဲသွားတာပါ။ ထိခိုက်ဒဏ်ရာ ပြင်းထန်တဲ့လူလည်း များတဲ့အတွက်ကြောင့် သေဆုံးတဲ့စာရင်းလည်း တိုးလာနိုင်တယ်လို့ သိရတယ်။ ဆေးရုံ ဆေးခန်းသွားဖို့တောင် အခက်အခဲဖြစ်နေတယ်” ဟု CDF – Daai အထွေထွေအတွင်းရေးမှူး ဆလိုင်းအိုင်ဘတ်စ်က ပြောသည်။
ပလက်ဝမြို့နယ်အစပ် မတူပီမြို့နယ်အတွင်းတည်ရှိသော ဝေးလူကျေးရွာသည် CDF – မတူပီ ထိန်းချုပ်ထားသော ကျေးရွာဖြစ်သည်။
အိမ်ခြေ ၆၀ နီးပါးရှိသော ကျေးရွာဖြစ်ပြီး ရွာအနေအထားမှာ အိမ်များကို နီးနီးကပ်ကပ် ထူထူထပ်ထပ် ဆောက်ထားသည့် ရွာဖြစ်ကာ လူဦးရေမှာ အတန်အသင့် အနေများသည်ဟု သိရသည်။
ဝေးလူကျေးရွာ တည်ရှိသော ဒေသမှာ လက်နက်ကိုင်များ သွားလာလှုပ်ရှားကြပြီး ဆက်သွယ်ရေးလမ်းကြောင်းနှင့် ထောက်ပို့လမ်းကြောင်းအတွက် မဟာဗျူဟာကျသည့် ကျေးရွားများဖြစ်သည်။
ရခိုင်တပ်တော် (AA) ၏ ထောက်ပို့လမ်းကြောင်းအဖြစ်လည်း အသုံးပြုသကဲ့သို့ ချင်းကာကွယ်ရေးတပ်ဖွဲ့များလည်း အသုံးပြုသော ဒေသဖြစ်သည်ဟု သိရသည်။
သို့သော် ယမန်နေ့ညက စစ်ကောင်စီတပ်ဖွဲ့သည် အရပ်သားများသာတည်ရှိနေသော ဝေးလူကျေးရွာကို မည်သည့်အတွက်ကြောင့် ပြင်းပြင်းထန်ထန်ဗုံးကြဲတိုက်ခိုက်ခဲ့သည်ကို မသိရသေးဘဲ စုံစမ်းနေဆဲဖြစ်သည်ဟု ဆလိုင်းအိုင်ဘတ်စ်က ပြောသည်။
