(006SV)
ချင်းပြည်နယ်၊ မတူပီမြို့နယ်၊ CDF – မတူပီ တပ်ရင်း – ၃ နယ်မြေတွင် ဒေသခံပြည်သူများသည် အခြေခံစားနပ် ရိက္ခာများနှင့် ကုန်ပစ္စည်းများ သယ်ဆောင်ခွင့်ကို CDF – မတူပီ၊ တပ်မဟာ – ၁ က ပိတ်ပင်ထားကြောင်း ဒေသခံများက ပြောသည်။
CDF – မတူပီ တပ်မဟာ – ၁ က မတူပီမြို့နယ် ပြည်သူ့အုပ်ချုပ်ရေး လုပ်ငန်းများအတွက် အစည်းအဝေး ခေါ်ယူရာတွင် တပ်ရင်း – ၃ နယ်မြေမှ တာဝန်ရှိသူများသည် တက်ရောက်ခြင်း မရှိသကဲ့သို့ ပူးပေါင်းဆောင်ရွက်ခြင်း မရှိခြင်းကြောင့် စက်တင်ဘာလအတွင်း အခြေခံစားနပ်ရိက္ခာနှင့် ကုန်ပစ္စည်းများကို တပ်ရင်း – ၃ နယ်မြေသို့ သယ်ဆောင်ရန် အခက်အခဲများ ဖြစ်ပေါ်လာခြင်းဖြစ်ကြောင်း ဒေသခံတချို့က ပြောသည်။
“တပ်မဟာ – ၁ ကနေပြီးမှ အုပ်ချုပ်ရေးကို အစည်းအဝေးခေါ်ပြီးမှ အမျိုးမျိုးလုပ်ချင်တာ ၊ တပ်မဟာ – ၂ ဘက်က တပ်ရင်း ၃ က မြေပြင်က အုပ်ချုပ်ရေးအဖွဲ့တွေရော လူတွေရော တစ်ယောက်မှ အစည်းအဝေးကို မတက်ဘူး။ မတက်တော့ သူတို့ စိတ်တိုပြီးမှ ကန့်သတ်မှုလုပ်တာပါ” ဟု မတူပီ ဒေသခံတစ်ဦးက ပြောသည်။
တပ်ရင်း ၃ နယ်မြေက ဒေသခံများသည် အခြေခံစားသောက်ကုန်များ ဒေသအတွင်း အလွယ်တကူ ဝယ်၍မရသောကြောင့် ဆီ၊ ဆား၊ ငါးပိကဲ့သို့ အခြေခံကုန်ပစ္စည်းဝယ်ယူရန်ပင် ၁ ရက်ခရီးကို ခရီးစရိတ် သောင်းချီ အကုန်အကျခံပြီး သွားဝယ်နေရကြောင်း သိရသည်။
တပ်ရင်း ၃ နယ်မြေက တချို့နေရာတွင် ဓါတ်ဆီ တစ်လီတာလျှင် တစ်သောင်းခန့်ပေး၍ ဝယ်ယူနေရကြောင်း သိရသည်။
ပြည်သူများ ကုန်စည်ဝယ်ယူရေး စနစ်တကျဖြစ်ဖို့အပါအဝင် အစည်းအဝေးတက်ရန် CDF- မတူပီ ၊ တပ်မဟာ – ၁ က စာပို့၍ ဖိတ်ကြားထားသည်မှာ တစ်ပတ်ခန့် ရှိသော်လည်း တပ်ရင်း ၃ နယ်မြေက အုပ်ချုပ်ရေးအဖွဲ့ တာဝန်ရှိသူများသည် အကြောင်းပြန်ကြားခြင်းမရှိသေးကြောင်း CDF – မတူပီ၊ တပ်မဟာ -၁ ပြောရေးဆိုခွင့်ရှိသူ ကိုဘွေအုပ်က ပြောသည်။
“ပြည်သူတွေ စားဝတ်နေရေး အဆင်ပြေဖို့ကို ရှေးရှုပြီး သက်ဆိုင်ရာ အုပ်ချုပ်ရေးမှူးတွေကလည်း အမြန်ဆုံး စကားပြောသင့်ပါ တယ်။ ပြည်သူ့အရေးကို နှုတ်ဆိတ်ပြီး ငြိမ်နေမယ်၊ လက်တွေ့ကျကျ မြေမြင်မှာ လုပ်နေတဲ့ သူတွေ အချင်းချင်း ထိတွေ့ဆက်ဆံမှူတော့ မလုပ်ဘူး၊ အွန်လိုင်း မီဒီယာပေါ်မှာ ပြည်သူတွေကို လိုက်အော်ခိုင်းတာနဲ့ ပြဿနာ မပြေလည်နိုင်ပါဘူး။ လက်တွေ့ တွေ့ဆုံဆက်ဆံမှုနဲ့ အဖြေရှာသင့်ပါတယ်” ဟု ကိုဘွေအုပ်က ပြောသည်။
တပ်ရင်း – ၃ နယ်မြေအတွင်း ဒေသခံပြည်သူများ၊ မတူပီမြို့ပေါ်က စစ်ဘေးရှောင် ပြည်သူများ၊ တခြားဒေသဘက်မှ စစ်ဘေးရှောင်ပြည်သူများ စုစုပေါင်း ပြည်သူ ၁၅၀၀ ကျော်ခန့် နေထိုင်ကြကြောင်း ဒေသခံတချို့က ပြောသည်။
စစ်ဘေးရှောင်ပြည်သူများသည် အခြေခံစားနပ်ရိက္ခာများ၊ ဆေးဝါးများလည်း အကူအညီ လိုအပ်နေကြောင်း သိရသည်။
CDF- မတူပီ၊ တပ်ရင်း – ၃ သည် ချင်းပြည်ကောင်စီတွင် ပါဝင်ထားသည့် CDF – မတူပီ၊ တပ်မဟာ – ၂ ကို ထောက်ခံသည့် တပ်ရင်းဖြစ်ကြောင်း သိရသည်။
မတူပီမြို့ကို CDF – မတူပီ၊ တပ်မဟာ – ၁ က အာရက္ခတပ်တော် AA ၏ စစ်ရေးအကူအညီဖြင့် ချင်းညီနောင်စစ်ဆင်ရေးအဖြစ် ဖော်ဆောင်၍ တိုက်ခိုက်သိမ်းပိုက်ထားသည်။
