ULA/ AA က ချင်းများ၏ အတွင်းရေးတွင်လည်း ပါဝင်ပတ်သက်မှု မရှိဟု ဆို
(006SV)
ချင်းပြည်နယ်၊ မရာဒေသအတွင်းရှိ မရာချင်းလက်နက်ကိုင် ၂ ဖွဲ့ဖြစ်သည့် မရာလဲန်းကာကွယ်ရေးတပ်ဖွဲ့ (MTC/ MDF) နှင့် IMC/ CDF – Mara တို့၏ စစ်ရေးပဋိပက္ခတွင် အာရက္ခတပ်တော် (ULA/ AA) အနေဖြင့် ပါဝင်ပတ်သက်ခြင်း မရှိကြောင်း ULA/ AA ၏ ပြောရေးဆိုခွင့်ရှိသူ ဦးခိုင်သုခက ပြောသည်။
ယနေ့ ဩဂုတ်လ ၁၁ ရက်တွင် အွန်းလိုင်မှ ပြုလုပ်သည့် အာရက္ခပြည်သူ့တော်လှန်ရေးအစိုးရ၏ ၁၀ ကြိမ်မြောက်သတင်းစာရှင်း လင်းပွဲတွင် ပြောဆိုခြင်းဖြစ်သည်။
“မရာနယ်မြေမှာ MDF ဘက်ကနေပြီး AA က စစ်ကူတိုက်တယ်ဆိုပြီး စွပ်စွဲတဲ့ ကိစ္စပေါ့။ ဒီဟာက လုံးဝ အခြေအမြစ်မရှိ စွပ်စွဲချက်ပဲ ဖြစ်ပါတယ်။ သူတို့ဟာ ဒီလိုစွပ်စွဲချက်တွေကို ဘာရည်ရွယ်ချက်နဲ့ ပြောနေလဲ ဆိုတာကိုတောင်မှ ကျနော်ကပြန်ပြီး မေးခွန်းထုတ်ချင်ပါတယ်။ ဘာဖြစ်လို့လဲဆိုတော့ တကယ်လို့ ကျနော်တို့ ULA/ AA သာ ဝင်ပြီး MDF ဘက်က တိုက်တယ်ဆိုရင် အခု စွပ်စွဲနေတဲ့ အဖွဲ့အစည်းရဲ့ ဌာနချုပ်လည်း ရှိတော့မှာ မဟုတ်ပါဘူး။ ဒီအချက်က လုံးဝ ကျနော်တို့ သေချာပေါက် ပြောနိုင်တာ ပါ။ အဲဒါကြောင့် ကျနော်တို့ ULA/ AA ဟာ အခု ချင်းတွေဖြစ်နေတဲ့ သူတို့ရဲ့အတွင်းရေး ကိစ္စတွေမှာ ကျနော်တို့အနေနဲ့ လုံးဝ ပါဝင် ပတ်သက်မှု မရှိပါကြောင်း ပြောကြားချင်ပါတယ်” ဟု ဦးခိုင်သုခက ပြောသည်။
မရာလဲန်းကာကွယ်ရေးတပ်ဖွဲ့ (MTC/ MDF) သည် အင်အား ၂၀၀ ဝန်းကျင်းဖြင့် စစ်ကြောင်း ၃ ကြောင်းခွဲ၍ စစ်ကြောင်းထိုး လာပြီး IMC/ CDF – Mara ဌာနချုပ်အနီးနားရှိ ကျေးရွာများကို ဝိုင်းဝန်းပိတ်ဆို့ ထားသည်ဟု IMC/ CDF – Mara ပြောရေး ဆိုခွင့်ရှိသူထံမှ သိရသည်။
ဇူလိုင်လ ၁၄ ရက်က ဆော်မှိန်တိုက်နယ်၊ ဖန်တလန်ကျေးရွာက ၃ နေရာတွင် ထိတွေ့ပစ်ခတ်မှုများ ဖြစ်ပွားခဲ့ပြီး စစ်ရေးတင်း မာလျက်ရှိကြောင်း၊ MTC/ MDF နှင့်အတူ ULA/AA တပ်ဖွဲ့ဝင်များ ပါဝင်နေသည်ဟု IMC/ CDF – မရာ ပြောရေးဆိုခွင့်ရှိသူက ခိုနူမ်းသုန်ကို ဖြေကြားထားသည်။
မရာလက်နက်ကိုင်နှစ်ဖွဲ့၏ ပဋိပက္ခတွင် MTC/ MDF သည် ၎င်းတို့ကို ထောက်ခံသော ကျေးရွာများကို လှည့်လည် ကွင်းဆင်း နေခြင်းဖြစ်ပြီး ULA/ AA တပ်ဖွဲ့ဝင်များ ပါဝင်ခြင်း မရှိကြောင်း MTC/ MDF ၏ ပြောရေးဆိုခွင့်ရှိသူ ကိုဓူဝံက ဖြေကြားထားသည်။
ချင်းပြည်နယ်က ချင်းကာကွယ်ရေးတပ်ဖွဲ့များကို ULA/ AA အနေဖြင့် စစ်ရေးအကူအညီများ ပေးအပ်နေခြင်းသည် စစ်ကောင်စီကို တိုက်ထုတ်ရန် ဖြစ်သည်ဟု ULA/ AA ပြောရေးဆိုခွင့်ရှိသူ ဦးခိုင်သုခက ပြောသည်။
“ချင်းညီအစ်ကိုတွေကို ကျနော်တို့ ULA/ AA က အကူအညီပေးနေတယ်ဆိုတာ အကြမ်းဖက် ဖက်ဆစ် စစ်ကောင်စီကို ချင်းပြည်ထဲက မောင်းထုတ်ဖို့အတွက် ကျနော်တို့ စေတနာသန့်သန့်နဲ့ အကူအညီပေးနေတာဖြစ်ပါတယ်။ ချင်းတွေရဲ့ အတွင်းရေးထဲမှာ ကျနော်တို့အနေနဲ့ လုံးဝ ပါဝင်ပတ်သက်မှု မရှိဆိုတာကို ကျနော် ဖြေကြားချင်ပါတယ်” ဟု ဦးခိုင်သုခက ယနေ့သတင်းစာရှင်းလင်းပွဲတွင် ပြောသည်။
ချင်းပြည်နယ်က ချင်းတော်လှန်ရေး အင်အားစုများဖြစ်သည့် ချင်းညီနောင်အဖွဲ့ (CB) သည် ULA/ AA နှင့် မဟာမိတ်အဖြစ် ပူးပေါင်းဆောင်ရွက်နေပြီး ULA/ AA က ချင်းညီနောင်၏ စခန်းသိမ်း၊ မြို့သိမ်းတိုက်ပွဲများတွင် စစ်ရေးအကူအညီများ ပေးခဲ့ကြောင်း သိရသည်။
