(006SV)
မလေးရှားနိုင်ငံတွင် နိုဝင်ဘာလအတွင်း မြန်မာနိုင်ငံသား ၇၀၀ နီးပါး ဖမ်းဆီးခံရရာမှာ ၁၄၀ ထက်မနည်းသည် ချင်းလူမျိုးများဖြစ်ကြောင်း Malaysia Myanmar Association – MMA ထံမှ သိရသည်။
“ချင်းတိုင်းရင်သား ၁၄၀ က မလေးရှား တနိုင်ငံလုံးပေါ့နော်၊ ကျနော်တို့ MMA ဆီမှာ အကူအညီတောင်းတဲ့ ဟာတွေ၊ ရတဲ့အချက်အလက်အရ ၁၄၀ ကျော် ပါဝင်တယ်။ တချို့နေရာဒေသမှာတော့ အယောက် ၄၀ လောက်တော့ ပြန်ထွက်လာနိုင်တယ်။ ကျန်တဲ့ ဟာက ဘာမှ အထောက်အထား မရှိတဲ့ အခါကြတော့ သူတို့ကို တရားမဝင် နေထိုင်မှုနဲ့ လူဝင်မှုကြီးကြပ်ရေး ဥပဒေနဲ့ တရားရုံး တင်တယ်။ တရားရုံး တင်ပြီးတော့ ထောင်ဒဏ် ကျမယ်၊၊ ထောင်ကျပြီး ကမ့်ရောက်ပြီးမှပဲ မြန်မာပြည် ပြန်လို့ ရမယ်ဆိုတဲ့ဟာ တချက်ရှိတယ်” ဟု MMA မှ ပြောရေးဆိုခွင့်ရှိသူ ဦးအိုက်လွင်က ပြောသည်။
နိုဝင်ဘာလအတွင်း မလေးရှားနိုင်ငံတွင် ဖမ်းဆီးခံရသူ နိုင်ငံခြားသား ၂၈၀၉ ဦး ရှိခဲ့ရာ မြန်မာနိုင်ငံသား ၆၉၃ ဦး ပါဝင်ကြောင်း၊ ၎င်းတို့ထဲ ချင်းတိုင်းရင်းသား ၁၄၀ ကျော် ပါဝင်ခဲ့ရာမှာ ၄၀ ခန့်သာ အထောက်အထားများ ရှိနေပြီး အများစုမှာ အထောက်အထား မရှိဖြစ်နေကြောင်း သိရသည်။
ကင်မရွန်းဟိုက်လန်းတွင် ၂၃၇ ဦး၊ ဂျူဟိုးတွင် ၇၁ ဦး၊ ကလန်တန်တွင် ၆၂ ဦး၊ ဆရန်ဘန်းပြည်နယ်၊ နီလှိုင်းမြို့တွင် ၅၈ ဦး၊ ဆလန်ဂေါတွင် ၃၉ ဦးတို့ဖြင့် နိုဝင်ဘာလအတွင်း ယင်းဒေသများတွင် ချင်းလူမျိုးများ အများဆုံးဖမ်းဆီးခံရသည်ဟု MMA ၏ ဒီဇင်ဘာလ ၃ ရက်ထုတ်ပြန်သော စာရင်းအရ သိရသည်။
မြန်မာနိုင်ငံသား ဖမ်းဆီးခံရသူများတွင် တချို့ကို မလေးရှား အာဏာပိုင်များက တရားရုံးတင် စွဲဆိုမှု မပြုလုပ်ဘဲ ကမ့်စခန်းသို့ ပို့ပြီး မြန်မာသံရုံးက မြန်မာနိုင်ငံသား မှန်ကန်ကြောင်း အတည်ပြုပေးပါက တိုက်ရိုက် ပြန်ပို့ရန် ဆောင်ရွက်မှုလည်း ရှိသည်ဟု သိရသည်။
လက်ရှိ မြန်မာလူမျိုးများ ဖမ်းဆီးခံရမှု စာရင်းသည် MMA အဖွဲ့က စုဆောင်းရသလောက်သာ ဖြစ်ပြီး မြေပြင်မှာ ယခုထက် ပိုများနိုင်သည်ဟု သိရသည်။
မလေးရှားတွင် အဖမ်းအဆီးခံရချိန် အခက်အခဲ ရောက်နေသူများ၊ တရားရုံး ရင်ဆိုင်နေသူများ၊ ရှေ့နေအခက်အခဲ ရှိသူများ၊ ထောင်ဝင်စာသွားတွေ့ရန် အခက်အခဲရှိသူများ၊ လူဝင်မှုကြီးကြပ်ရေးစခန်းတွင် လူတွေ့ချင်သူများအနေဖြင့် MMA အဖွဲ့ထံ အကူညီတောင်းခံနိုင်သည်ဟု သိရသည်။
