(006SV)
မလေးရှားနိုင်ငံ၊ ကလန်တန် (KELANTAN) ပြည်နယ်၊ ဂျလီ (JELI) ခရိုင်ထဲက စိုက်ပျိုးရေးလုပ်ငန်းတနေရာတွင် ကျားဆွဲခံရသည့် ချင်းတိုင်းရင်းသား ၁ ဦး၏ ရုပ်အလောင်းကို ပြန်တွေ့ပြီး ၎င်း၏ မိသားစုဆွေမျိုးများနှင့်လည်း အဆက်အသွယ်ရပြီဖြစ်ကြောင်း ၎င်းနှင့် နီးစပ်သူများထံမှ သိရသည်။
အောက်တိုဘာလ ၁၆ ရက်၊ မလေးရှားစံတော်ချိန်ည ၈ နာရီ ၁၅ ခန့်မှာ မလေးရှားနိုင်ငံတွင် သွားရောက်လုပ်ကိုင်နေသည့် အသက် ၂၈ နှစ်ခန့်အရွယ် မင်းတပ်မြို့နယ်သား ကိုဟုန်းရှိန်ဖေသည် အလုပ်သိမ်းချိန် ညစာချက်ပြုတ်ရန် ပြင်ဆင်နေစဉ် ကျားဆွဲခံလိုက်ရခြင်းဖြစ်ကြောင်း ၎င်းနှင့်နီးစပ်သူများက ပြောသည်။
“မနေ့က အလုပ်သိမ်းချိန်မှာ ထမင်းချက်နေကြတာပေါ့။ သူဌေးကလည်း လစာထုတ်ပေးတယ်။ အဲအချိန်မှာ သူကလည်း ရေစင်မှာ သွားပြီး ကြက်သားခုတ်တဲ့အချိန် ကျားက လာဆွဲသွားတာ။ သူ့အခန်းရဲ့ကပ်ရပ်မှာ နေတဲ့လူက လာပြောတော့ ကျနော်တို့ သွားရှာတယ်။ မတွေ့ဘူး။ သူဌေးကလည်း တဖက်ကပတ်ပြီး ထပ်ရှာတယ်။ မတွေ့ဘူး။ ဒီနေ့ မနက်ပိုင်းမှာ ပြန်သွားရှာတော့ ကျနော်တို့နေတဲ့နေရာရဲ့ တမိုင်နီးပါးမှာ သူကို ပြန်တွေ့တယ်။ ပြန်တွေ့ချိန်မှာ ပေါင်တစ်ဖက်က ဘာမှမရှိတော့ဘူး” ဟု ၎င်းနှင့် နီးစပ်သူတစ်ဦးက ပြောသည်။
ကိုဟုန်းရှိန်ဖေသည် မင်းတပ်မြို့နယ်၊ စွန်တောင်ကျေးရွာသားဖြစ်ပြီး မလေးရှားနိုင်ငံတွင် အလုပ်လုပ်ကိုင်နေသည်မှာ နှစ်ဆယ်ချီရှိနေပြီဖြစ်ကြောင်း သိရသည်။
လက်ရှိတွင် ကိုဟုန်းရှိန်ဖေ၏ မိဘများ၊ ဆွေမျိုးအသိုင်းအဝိုင်းများနှင့် အဆက်အသွယ်ရရှိထားပြီးဖြစ်ကြောင်း သိရသည်။
“မနေ့ညက ကိုဟုန်းရှိန်ဖေရဲ့ အဒေါ်ရဲ့သားနဲ့လည်း အဆက်အသွယ်ရတယ်။ မလေးစံတော်ချိန်ည ၂ နာရီခွဲလောက်မှာ သူရဲ့ညီလေးနဲ့လည်း အဆက်အသွယ်ရတယ်။ သူ့မိဘတွေက ဓါတ်ပုံပို့ပေးဖို့တောင်းတာနဲ့ ဒီနေ့ ရထားတဲ့ပုံတွေ ပို့ပေးထားပါတယ်” ဟု ကူညီဆောင်ရွက်ပေးနေသူတစ်ဦးက ပြောသည်။
ယနေ့တွင် မလေးရှားရဲတပ်ဖွဲ့မှ တာဝန်ရှိသူများနှင့် သစ်တောဌာနမှ တာဝန်ရှိသူများ ရောက်ရှိလာပြီး အလောင်းကို စစ်ဆေးမှုများ ပြုလုပ်ရန် သယ်သွားကြကြောင်း၊ သဂြိုလ်မည့်ကိစ္စများကို စီစဉ်နေကြဆဲဖြစ်ပြီး ကိုဟုန်းရှိန်ဖေ နေထိုင်ခဲ့သည့် စိုက်ပျိုးရေးခြံတွင် ဆုတောင်းပွဲပြုလုပ်ရန်လည်း ပြင်ဆင်နေကြောင်း သိရသည်။
ဂျလီ (JELI) ခရိုင်ထဲက ကိုဟုန်းရှိန်ဖေ၏ စိုက်ပျိုးရေးလုပ်ငန်းနေရာသည် ဆင်ရိုင်း၊ ကျားများ ပေါများသည့်ဒေသဖြစ်ကြောင်း သိရသည်။
