(006SV)
မလေးရှားနိုင်ငံမှာ မလေးရှား လူဝင်မှုကြီးကြပ်ရေးဌာနက စီးနင်းရှာဖွေမှုကြောင့် ယခုနှစ် ဇန်နဝါရီလ နှစ်ပတ်အတွင်း ချင်းလူမျိုုး ၆၀ ဝန်းကျင် ဖမ်းဆီးခံထားကြောင်း Chin Refugee Committee မှ တာဝန်ရှိသူက ပြောသည်။
“မနေ့က တနေ့က ရာဝမ်ဘက်မှာ အယောက် ၃၀ ကျော် ဖမ်းခံထိတယ်။ ပြောရမယ်ဆိုရင် (ချင်း)တောင်ပိုင်းက တော်တော် များ များပါတယ်။ ခုချိန်ထိ UN အနေနဲ့က ဘာမှ ဆောင်ရွက်ပေးနိုင်တာ မရှိသေးဘူး။ UN Online လျှောက်ထားတဲ့ဟာကို လူဝင်မူကြီး ကြပ်ရေးက လက်မခံဘူး။ ကျနော်မှတ်တမ်းထဲမှာ အယောက် ၆၀ လောက်ရှိပြီ” ဟု Chin Refugee Committee မှ ဥပဒေပိုင်း ဆိုင်ရာတာဝန်ရှိသူ ကိုပါကုလ်က ပြောသည်။
ဇန်နဝါရီလ ၁ ရက်မှ ယနေ့ ၁၅ ရက်အထိ မလေးရှားနိုင်ငံရောက် ချင်းလူမျိုးများ ၆၀ ခန့် ဖမ်းဆီးခံထားရခြင်းဖြစ်ပြီး ယင်းအထဲတွင် ကလေးငယ်များလည်း ပါဝင်နေသည်ဟု သိရသည်။
ဖမ်းဆီးခံရမှု အများစုမှာ မလေးရှားနိုင်ငံသားများက သက်ဆိုင်ရာအာဏာပိုင်များထံသို့ တိုင်ကြားမှုများ ပြုလုပ်ခဲ့ခြင်းကြောင့်ဖြစ်သည်ဟု သိရသည်။
၂၀၂၃ ခုနှစ် အောက်တိုဘာလမှ ဒီဇင်ဘာလအတွင်းမှာလည်း မလေးရှားနိုင်ငံတွင် ချင်းလူမျိုး ၃၀၀ ကျော် ဖမ်းဆီးခံရပြီး အထောက်အထားရှိသူများမှာ ပြန်လည်လွတ်မြောက်လာသော်လည်း အထောက်အထား မရှိသူများမှာ ဖမ်းဆီးထောင်ချခံရကာ ပြန်လည်ပို့ဆောင်ခံရသည်ဟု သိရသည်။
ဖမ်းဆီးခံရသော ချင်းလူမျိုးများတွင် တချို့မှာ မိဘများက ဖမ်းဆီးထောင်ချခံရ၍ ပြန်လည်ပို့ခံရမှုများ၊ သားသမီးအဖမ်းခံရ၍ မိဘများသာ မလေးရှားနိုင်ငံတွင် ကျန်ရှိမှုများစသဖြင့် မိသားစု တကွဲတပြားများလည်း ဖြစ်ပွားနေသည်ဟု သိရသည်။
မလေးရှားနိုင်ငံတွင် အာဏာပိုင်များသည် အထောက်အထားမဲ့ နိုင်ငံခြားသားများကို စီးနင်းရှာဖွေမှုများ ပြုလုပ်နေရာ မြန်မာနိုင်ငံသားများအပါအဝင် ပြည်ပနိုင်ငံသားအများအပြား ဖမ်းဆီးခံနေရသည်ဟု သိရသည်။
ဖမ်းဆီးခံရသော ချင်းလူမျိုးများအပါအဝင် မြန်မာနိုင်ငံသားများသည် အချုပ်ထောင်ထဲတွင် စားဝတ်နေရေးမှစ၍ အခက်အခဲ အများအပြား ရင်ဆိုင်နေရသည်ဟု သိရသည်။
မလေးရှားနိုင်ငံတွင် ဖမ်းဆီးခံရသော နိုင်ငံခြားသားများကို အမျိုးသားဖြစ်ပါက ထောင် ၃ လနှင့် အမျိုးသမီးများကို ထောင် ၂ လ ချမှတ်၍ သက်ဆိုင်ရာ နိုင်ငံများသို့ ပြန်လည်ပို့ဆောင်လေ့ရှိကြောင်း သိရသည်။
