(004SS)
မလေးရှားသို့အသွား လမ်းခုလတ်တွင် သူငယ်ချင်းဖြစ်သူ ကွယ်လွန်မှုကြောင့် ထိုင်းနိုင်ငံ၌ ထိန်းသိမ်းခံခဲ့ရသည့် ချင်းလူငယ် ၃ ဦးကို ယနေ့ ညနေပိုင်းတွင် ထိုင်းလူဝင်မှုကြီးကြပ်ရေး (Immigration) စခန်းမှတစ်ဆင့် မြန်မာနိုင်ငံဘက်သို့ ပြန်လည်ပို့ ဆောင်လိုက်ပြီဖြစ်ကြောင်း သိရသည်။
အဆိုပါ ချင်းလူငယ် ၃ ဦးသည် ပြီးခဲ့သည့် ဧပြီလ ၁၁ ရက်နေ့မှစတင်ကာ ဆောင်ခလာပြည်နယ်၊ Khuan Meed ရဲစခန်း တွင် ၁၄ ရက်ကြာထိန်းသိမ်းခံခဲ့ရပြီးနေက် ဧပြီလ ၂၄ ရက်နေ့တွင် Danok Sadoa လူဝင်မှုကြီးကြပ်ရေးစခန်းသို့ ပြောင်း ရွှေ့ခံခဲ့ရပြီး ၁ လခန့်အကြာ ယနေ့ညနေပိုင်းတွင် မြန်မာနိုင်ငံဘက်သို့ပြန်လည်ပို့ဆောင်လိုက်ပြီဟု အမှုလိုက်ပါဆောင်ရွက် ပေးသူ ဆရာအာဒမ်ကပြောသည်။
ဖြစ်စဉ်မှာ ပြီးခဲ့သည့် ဧပြီလ ၁၁ ရက်နေ့က ချင်းလူငယ် Tg. Pau Lam Kim သည် သူငယ်ချင်း ၃ ဦးနှင့်အတူ ထိုင်းနယ် စပ်မှတစ်ဆင့် မလေးရှားနိုင်ငံသို့ သွားရောက်စဉ် မြန်မာလုပ်သားများ ပြည့်ကြပ်စွာ တင်ဆောင်လာသည့် ကားပေါ်တွင် အသက်ရှူကျပ်ကာ ကွယ်လွန်သွားခဲ့ခြင်းဖြစ်သည်။
ထိုစဉ်က ကားမောင်းသမားသည် ရုပ်အလောင်းအား ပင်လယ်ထဲသို့ စွန့်ပစ်ရန် ကြိုးစားခဲ့သော်လည်း အတူပါလာသည့် သူငယ်ချင်း ၃ ဦးက အပြင်းအထန် တားဆီးခဲ့ကြသဖြင့် ရုပ်အလောင်းနှင့်အတူ ၎င်းတို့ ၃ ဦးကို ဆောင်ခလာကမ်းခြေ အနီးတွင် ချန်ထားခဲ့ခြင်းဖြစ်ပြီး၊ ရုပ်အလောင်းနှင့်အတူ ကျန်ရစ်စဉ် လမ်းသွားလမ်းလာများကို အကူအညီတောင်းခံရာမှ တစ်ဆင့် ထိုင်းအာဏာပိုင်များ၏ ဖမ်းဆီးခြင်းကို ခံခဲ့ရခြင်း ဖြစ်သည်။
ကွယ်လွန်သူ Tg. Pau Lam Kim ၏ ရုပ်အလောင်းကိုမူ ဧပြီလ ၂၃ ရက်နေ့တွင် ထိုင်းနိုင်ငံမှ မြန်မာနိုင်ငံသို့ ပြန်လည်သယ် ဆောင်နိုင်ခဲ့ပြီး၊ ဧပြီလ ၂၈ ရက်နေ့ ညနေပိုင်းတွင် ၎င်း၏ဇာတိဖြစ်သော တီးတိန်မြို့နယ် Tuivial ရွာ၌ ဂူသွင်းသဂြိုဟ်ပြီး ဖြစ်သည်။
အဆိုပါ ဖြစ်စဉ်ကြောင့် ကြုံတွေ့ခဲ့ရသည့် နစ်နာမှုများအတွက် ပွဲစားအဖွဲ့ဘက်မှ တာဝန်ယူဆောင်ရွက်ပေးမှုအချို့ ရှိကြောင်း ကြားသိရသော်လည်း ဆောင်ရွက်ပေးသည့် အသေးစိတ် အခြေအနေနှင့် ပတ်သက်၍မူ တိတိကျကျ မသိရပေ။
