(05MK)
အင်အားပြင်း မိုခါဆိုင်ကလုန်းမုန်တိုင်းကြောင့် ချင်းပြည်နယ်တွင် ထိခိုက်ပျက်စီးမှု ထပ်တိုးစာရင်းကို ကြားကာလ ချင်းအမျိုးသားအတိုင်ပင်ခံကောင်စီ (ICNCC) က ထပ်မံထုတ်ပြန်လိုက်ပြီး ချင်းပြည်နယ်တဝန်းလုံးတွင် လူနေအိမ်ခြေ ၃၀၀၀ နီးပါး ပျက်စီးခဲ့သည်ဟု သိရသည်။
မိုခါဆိုင်ကလုန်းမုန်တိုင်းသည် မေလ ၁၄ ရက်နေ့က ရခိုင်ကမ်းရိုးတန်းကို စစ်တွေမြို့အနီးက ဖြတ်ကျော်ဝင်ရောက်ခဲ့ကာ ချင်းပြည်နယ်ဘက်ကိုလည်း တစ်နာရီ မိုင် (၅၀) ကနေ (၇၀) အထိ ဝင်ရောက်ခဲ့ခြင်းဖြစ်သည်။
မိုခါဆိုင်ကလုန်းမုန်တိုင်းကြောင့် ချင်းပြည်နယ်တွင် မတူပီ၊ မင်းတပ်၊ ပလက်ဝနှင့် ကန်ပက်လက်မြို့နယ်တို့သည် ထိခိုက်ပျက်စီးမှုအများဆုံးရှိခဲ့သည်ဟု ICNCC ၏ မေလ ၂၃ ရက်နေ့စွဲဖြင့် ထုတ်ပြန်သောကြေညာချက်တွင် ဖော်ပြသည်။
မတူပီမြို့နယ်မှာ အိမ်ခြေ ၁၂၁၁၊ မင်းတပ်မြို့နယ်မှာ ၆၅၄ ၊ ပလက်ဝမြို့နယ်မှာ ၄၀၀၊ ကန်ပက်လက်မြို့နယ်မှာ ၂၁၁၊ ဟားခါးမြို့နယ်မှာ ၁၀၅၊ ဖလမ်းမြို့နယ်မှာ ၁၀၀၊ တီးတိန်မြို့နယ်မှာ ၅၁ နှင့် ထန်တလန်မြို့နယ်မှာ ၄၁ အိမ် စုစုပေါင်း ၂၇၇၄ အိမ်ပျက်စီးခဲ့ပြီး တွန်းဇံမြို့နယ်တွင် အပျက်အစီးမရှိကြောင်း ICNCC ၏ ထုတ်ပြန်ချက်တွင် ဖော်ပြသည်။
ထို့အပြင် ချင်းပြည်နယ်တဝန်းလုံးတွင် စာသင်ကျောင်း ၁၈၅ ကျောင်း၊ ဘာသာရေးအဆောက်အဦး ၁၀၂ ခု၊ ကျန်းမာရေးအဆောက်အဦး ၁၂ ခု၊ စပါးကျီ ၂၅၉ ခု၊ ခန်းမဆောင် ၆ ခုတို့ ပျက်စီးခဲ့ပြီး ကျွဲ၊နွား၊ နွားနောက် အကောင် ၅၀၊ ကြက်၊ဘဲ ၁၃ ကောင်နှင့် ဝက်၊ ဆိတ် ၆ ကောင်သေဆုံးခဲ့သည်ဟု သိရသည်။
မိုခါဆိုင်ကလုန်းမုန်တိုင်းဘေးသင့်မြို့နယ်များအတွက် ပျက်စီးသွားသော လူနေအိမ်နှင့် အခြားအဆောက်အဦးများ ပြန်လည်ပြုပြင်ရန် အိမ်မိုးသွပ်ပြား၊ အိမ်ရိုက်သံ၊ မိုးကာ၊ တာလပတ်၊ စပါးကျီပျက်စီးသွားသည့်ဒေသများအတွက် ဆန်ရိက္ခာ၊ အခြေခံစားသောက်ကုန် နှင့် အခြေခံအိမ်သုံးဆေးဝါးများလည်း ကူညီထောက်ပံ့ရန် အရေးပေါ်လိုအပ်သည်ဟု ICNCC က ထုတ်ပြန်ထားသည်။
