ချင်းပြည်နယ်အတွင်းဖြစ်ပွားသည့် တိုက်ပွဲများကြောင့် မီဇိုရမ်ပြည်နယ် ကျန်ဖိုင်းခရိုင်အတွင်း ထွက်ပြေးတိမ်းရှောင်လာကြသော မြန်မာစစ်ဘေးရှောင်ပြည်သူများအတွက် မီဇိုရမ်ပြည်နယ် အားကစားဝန်ကြီး Pu Robert Romawia Royte မိသားစုက လိုအပ်သောစားနပ်ရိက္ခာများကို ဇွန်လ ၂၁ ရက်နေ့က ကူညီထောက်ပံ့ခဲ့သည်။
အိန္ဒိယ-မြန်မာနယ်စပ် မီဇိုရမ်ပြည်နယ် ကျန်ဖိုင်းခရိုင်အတွင်းရှိ မြန်မာစစ်ဘေးရှောင်ပြည်သူများအတွက် Pu Robert Romawia Royte မိသားစုမှ ထောက်ပံ့သော ဆန်အိတ် ၃၀၊ အာလူး အိတ် ၃၀၊ သကြား အိတ် ၁၀၊ ပဲ အိတ် ၂၀ နှင့် ကြက်သွန်နီ ၅ အိတ် ကို ဇွန်လ ၂၁ ရက်နေ့မနက်က အိုက်ဇောလ်မြို့ကနေ ကုန်တင်ကားဖြင့် ကျန်းဖိုင်းခရိုင်ဘက်ကို ထွက်ခွာခဲ့ကြောင်း သိရသည်။
အလားတူ ပြီးခဲ့သည့်ရက်ပိုင်းအနည်းငယ်က Mizo Students’ Union (MSU) နှင့် Myanmar Refugee Relief Committee (MRRC) အဖွဲ့တို့ ပူးပေါင်းပြီး အိန္ဒိယ-မြန်မာနယ်စပ်ဒေသတလျောက်တွင် ရောက်ရှိနေထိုင်ကြသော စစ်ဘေးရှောင်များထံ သွားရောက်ပြီး ကူညီထောက်ပံ့ခဲ့ကြသည်။
ပြီးခဲ့သည့်ရက်ပိုင်းအတွင်း ချင်းဒေသကာကွယ်ရေးအဖွဲ့ CDF နှင့် အာဏာသိမ်းစစ်ကောင်စီတို့ ချင်းပြည်နယ် ထန်တလန်မြို့နယ်တွင် တိုက်ပွဲဖြစ်ပြီးနောက် မီဇိုရမ်ပြည်နယ်တွင်တိမ်းရှောင်လာကြသူ စစ်ဘေးရှောင် ရာနဲ့ချီ ယခုရက်ပိုင်းအတွင်း ရှိနေပြီဖြစ်ကြောင်းသိရပြီး မီဇိုရမ်ပြည်နယ်အတွင်း ဝင်လို့မရဘဲ နယ်စပ်ဒေသတွင် သောင်တင်နေကြသောသူများစွာလည်းရှိနေကြောင်း သိရသည်။
ဖေဖော်ဝါရီလ ၁ ရက်နေ့တွင် မြန်မာစစ်တပ်က ပြည်သူ့အစိုးရထံ အာဏာသိမ်းယူခဲ့ပြီးနောက် ယခုလက်ရှိအခြေအနေအထိ မီဇိုရမ်ပြည်နယ်တွင် ထွက်ပြေးတိမ်းရှောင်လာသော မြန်မာစစ်ဘေးဒုက္ခသည် တစ်သောင်းကျော်ရှိနေပြီဖြစ်သည်။ RC
