(005MK)
အိန္ဒိယနိုင်ငံ မီဇိုရမ်ပြည်နယ်အခြေစိုက် မီဇိုးကျောင်းသားသမဂ္ဂ(Mizo Student Union) ဥက္ကဌ Samuel Zoram thanpuia သည် ငွေကြေးအလွဲသုံးစားမှု၊ ပြန်ပေးဆွဲမှု နှင့် ခြိမ်းခြောက်ငွေညှစ်မှုဖြင့် ယမန်နေ့က ဖမ်းဆီးခံရသည်ဟု သိရသည်။
Anti-corruption Bureau(ACB) ဟုခေါ်သော အဂတိလိုက်စားမှုတိုက်ဖျက်ရေးဗျူရိုက MSU ဥက္ကဌကို အဂတိလိုက် စားမှုဖြင့် နိုဝင်ဘာလ ၈ ရက်နေ့က ဖမ်းဆီးခဲ့ပြီးနောက်၊ အိုင်ဇောလ်မြို့ရဲတပ်ဖွဲ့ကလည်း ပြန်ပေးဆွဲမှု၊ ခြိမ်းခြောက်၍ ငွေညှစ်မှုဖြင့် ထပ်မံဖမ်းဆီးခဲ့သည်ဟု မီဇိုရမ်နေ့စဉ်ထုတ် Vanglaini သတင်းစာမှာဖော်ပြထားသည်။
Samuel Zoramthanpuia ကို ယမန်နေ့က အိုင်ဇောလ်ခရိုင်တရားရုံးကိုခေါ်သွားပြီးနောက် တရားရုံး၏အမိန့်အရ ဗဟိုထောင်ကိုပို့ဆောင်လိုက်ပြီး၊ တရားစွဲဆိုသည့်အမှုများမှာ အာမခံ၍မရသောအမှု(Non Bailable) ဖြစ်သည်ဟု ဆိုသည်။
အဂတိလိုက်စားမှုတိုက်ဖျက်ရေးဗျူရို (ACB) က မီဇိုးကျောင်းသားသမဂ္ဂဥက္ကဌကို ဖမ်းဆီးသည့်အကြောင်းရင်းမှာ ၂၀၂၂ ခုနှစ်တုန်းက “Project Mizoram (Covid-19 Relief Fund)” အမည်ဖြင့် ကျန်းမာရေးနှင့် မိသားစု လူမှုဖူလုံရေးဌာန(Health and Family Welfare) မှ လက်ခံရရှိသော ရူပီးငွေသိန်း ၅၀ သုံးစွဲမှုဖြစ်သည်ဟု သိရသည်။
နောက်တစ်ခုမှာ ချင်းပြည်နယ်အတွင်းရှိ ချင်းပြည်သူလူထုနှင့် နယ်စပ်ဒေသမှ စစ်ဘေးရှောင်များကျန်းမာရေးစောင့်ရှောက်မှုပေးနေသည့် နယ်စပ်ဆေးရုံမှ Medical Equipment များဝယ်ယူရန်လက်ခံရရှိသောရူပီးငွေ ၁၅ သိန်းကျော်ကို ကြားခံဝယ်ယူပေးရာတွင် Sukarma Healthcare and Medical Devices အား ကျသင့်ငွေမပေးသည့်အတွက် Supplier မှ တရားစွဲသည့်အမှုနှင့်သက်ဆိုင်သည်ဟု သိရသည်။
အဆိုပါငွေကြေးများသုံးစွဲမှုနှင့်ပတ်သက်၍ အလွဲသုံးစားမှုရှိသည်ဟု ACB က တိုင်းကြားချက်များ လက်ခံရရှိပြီးနောက် စက်တင်ဘာလ ၉ ရက်နေ့မှာ အစိုးရထံကနေ ပဏာမစုံစမ်းစစ်ဆေးခွင့် Preliminary inquiry ရရှိခဲ့သည်ဟုသိရသည်။
ထို့နောက် ACB ၏ ပဏာမစုံစမ်းစစ်ဆေးချက်အရ MSU ဥက္ကဌသည် အဆိုပါ ငွေကြေးများသုံးစွဲရာမှာ အဂတိလိုက်စားမှုများရှိခဲ့ကြောင်း တွေ့ရှိရသည့် အတွက် အမှုဖွင့်ကာ ယခုကဲ့သို့ဖမ်းဆီးခဲ့ခြင်းဖြစ်သည်ဟု သိရသည်။
ထို့အပြင် အိုင်ဇောလ်မြို့ ရဲတပ်ဖွဲ့ကလည်း MSU ဥက္ကဌကို ဖမ်းဆီးသည့်အကြောင်းရင်းမှာ လူမျိုးခြားကုမ္ပဏီတစ်ခုမှာ အလုပ်လုပ်နေသော ဝန်ထမ်းကို MSU ရုံးခန်းမှာ ဖမ်းဆီးချုပ်နှောင်ကာ ခြိမ်းခြောက်၍ ငွေညှစ်ခဲ့သည့်အမှုဖြစ်သည်ဟု သိရသည်။
