(004SS)
တီးတိန်မြို့နယ် ကျိန်းပီးကွတ် (ခေါ် ) ကေးဇန်ရွာသား အသက် ၁၅ နှစ်အရွယ် ချင်းလူငယ်တစ်ဦးသည် မီဇိုရမ်ပြည်နယ် အိုင်ဇောလ်မြို့ ပြည်သူ့ဆေးရုံတွင် ဆေးကုသမှုခံယူနေစဉ် မတ်လ ၄ ရက်နေ့ ညနေ ၆ နာရီက မီးလောင်ဒါဏ်ကြောင့် ကွယ်လွန်သွားကြောင်း ရွာသားများထံမှ သိရသည်။
ပြီးခဲ့သည့် ဖေဖော်ဝါရီလ ၁၀ ရက်နေ့က သေဆုံးသွားသူ မောင်ဆွင်းခန်ကိမ်သည် ချင်းပြည်နယ်၊ တွန်းဇံမြို့နယ်ဘက် ခရီးသွားနေစဉ် တောမီးလောင်မှုကြောင့် မီးထဲပါသွားပြီး ခန္ဓာကိုယ်၏ ၈၅% ဝန်းကျင် မီးလောင်ခံခဲ့ရခြင်းဟု သိရသည်။
“သူတို့က တွန်ဇံနယ်ဘက်ခရီးသွားတာ တောမီးထဲ ပါသွားတာ၊ ဖြစ်ချင်တော့ မလွတ်ဘူးပေါ့နော်၊ တစ်ကိုယ်လုံးနီးပါး လောင်သွားတာလို့ ပြောတယ်။ မျက်နှာတောင်မှ မမှတ်မိနိုင်လောက်အောင် ဖြစ်သွားတယ်၊ မီးလောင်မှုက ၈၅ % တောင်ရှိတယ်လို့ပြောတာနော် သနားစရာလေး။ အိုင်ဇောလ်လဲရောက်ရော ဆေးဝါးကုသဖို့လဲ အခက်အခဲဖြစ်တော့ ကျွန်တော်တို့ ရွာသားတွေ တတ်နိုင်သလောက်ကူပေးကြဖို့ ကောက်နေတုန်းမှာ အခုလိုသေဆုံးသွားတာ” ဟု ကျိန်ပီးကွတ်ရွာသားတစ်ဦးက ပြောသည်။
မောင်ဆွင်းခန်ကိမ်သည် လူကြီး ၂ ဦး လွှဆွဲသမားနှင့်အတူ တွန်းဇံမြို့နယ်ဘက်သို့ လွှဆွဲရန် အကူလိုက်သွားရာမှ တောမီးထဲပါသွားခြင်းဖြစ်သည်ဟု သိရသည်။
ဖေဖော်ဝါရီလ ၁၁ ရက်နေ့က မီဇိုရမ်ပြည်နယ်၊ ကျမ်ဖိုင်းဆေးရုံသို့ ပို့ဆောင်ပေးခဲ့ကြသော်လည်း ဒါဏ်ရာပြင်းထန်ခြင်းကြောင့် ဖေဖော်ဝါရီလ ၂၄ ရက်နေ့တွင် အိုင်ဇောလ်မြို့ ပြည်သူ့ဆေးရုံသို့ ထပ်မံ လွှဲပြောင်းခြင်းခံခဲ့ရကြောင်း သိရသည်။
ကွယ်လွန်သွားသူ မောင်ဆွင်းခန်ကိမ်၏ အလောင်းကို ယမန်နေ့ညက ကျမ်ဖိုင်းမြို့သို့ ပို့ဆောင်ကာ ယနေ့ မတ်လ ၅ ရက်နေ့ မနက်တွင် ၎င်း၏ ဇာတိရွာ ကျိန်ပီးကွတ်သို့ ထပ်မံပို့ဆောင်မည်ဖြစ်ပြီး မတ်လ ၆ ရက်နေ့တွင် ခရစ်ယာန်ထုံးစံအတိုင်း သဂြိုလ်မည်ဟု သိရသည်။
မောင်ဆွင်းခန်ကိမ်သည် ညီအကို ၄ ယောက်ရှိသည့်အနက် အကြီးဆုံးသားဖြစ်ကာ စစ်အာဏာသိမ်းမှုကြောင့် ကျောင်းဆက်မတက်တော့ဘဲ မိသားစု စားဝတ်နေရေးအတွက် ရုန်းကန်နေရသူဖြစ်ကြောင်း သိရသည်။
လက်ရှိတွင် ၎င်း၏ မိဘနှစ်ပါး၊ အဘိုးနှင့် ညီ ၃ ယောက် ကျန်ရစ်ကြောင်း သိရသည်။
