(006SV)
ချင်းပြည်နယ်၊ ပလက်ဝမြို့နယ်တွင် ချင်းအမျိုးသမီးတစ်ဦးကို မုဒိမ်းပြုကျင့်ကာ သတ်ဖြတ်ရန် ကြိုးပမ်းခဲ့သော ULA/ AA တပ်ဖွဲ့ဝင် ၂ ဦးကို လွတ်လပ်သော စုံစမ်းစစ်ဆေးမှု ပြုလုပ်ပြီး ပွင့်လင်းမြင်သာစွာ တရားစွဲ အရေးယူ အပြစ်ပေးရန် နိုင်ငံတကာ ခူမီးလူငယ်များ အသင်း (GKYA) က တောင်းဆိုသည်။
အာရက္ခတပ်တော် ULA/ AA အနေဖြင့် တပ်ဖွဲ့ဝင် ၂ ဦး ကျူးလွန်သော အမှုကို အပြစ်ပေး အရေးယူနိုင်ရေးနှင့် ပတ်သက်၍ အချက် ၅ ချက်ကို နိုင်ငံတကာ ခူမီးလူငယ်များအသင်း (GKYA) က ဧပြီလ ၂၇ ရက် ထုတ်ပြန်ချက်ထုတ်၍ တောင်းဆိုခြင်းဖြစ်သည်။
အမှုကို လျင်မြန်ပြီး လွတ်လပ်သော စုံစမ်းစစ်ဆေးမှု အမြန်ဆုံး ဖော်ဆောင်ပေးရန်၊ ကျူးလွန်သူများ၏ အမည်ကို ဖော်ထုတ်၍ ပြည်တွင်း၊ နိုင်ငံတကာ ဥပဒေများ၏ လုပ်ထုံးလုပ်နည်းများနှင့်အညီ ပွင့်လင်းမြင်သာစွာ တရားစွဲအရေးယူ အပြစ်ပေးရန် GKYA အဖွဲ့က တောင်းဆိုသည်။
ကျူးလွန်ခံရသူအတွက် လိုအပ်သော စိတ်ပိုင်း/ ရုပ်ပိုင်းဆိုင်ရာ ကျန်းမာရေး စောင့်ရှောက်မှု၊ လုံခြုံမှု၊ ဥပဒေ အကာအကွယ် နှင့် အခြားလိုအပ်သော အကူအညီများ ပံ့ပို့ဆောင်ရွက်ရန်၊ ULA/ AA အနေဖြင့် ဒေသခံပြည်သူများ၏ လုံခြုံမှုနှင့် ပတ်သက်၍ နောက် နောင်တွင် ကျူးလွန်မှု မရှိစေရေး ဆောင်ရွက်ပေးရန် စသည့်အချက်များလည်း ပါဝင်သည်။
ကျူးလွန်ခံရသူ အမျိုးသမီး၏ တရားမျှတမှု ရရှိရေးတွင် လူ့အခွင့်အရေးနှင့် အမျိုးသမီးရေး တက်ကြွလှုပ်ရှားသော လူမှုအဖွဲ့ အစည်းများ၊ အစိုးရမဟုတ်သော အစုအဖွဲ့များအနေဖြင့် ဝိုင်းဝန်းကူညီရန် GKYA က တိုက်တွန်းသည်။
ဧပြီလ ၅ ရက်က ချင်းပြည်နယ်၊ ပလက်ဝမြို့နယ်၊ စိမ်းစင်းကျေးရွာအနီးတွင် ULA/AA တပ်ဖွဲ့ဝင် ၂ ဦးသည် ဒေသခံ ချင်းအမျိုးသမီး တဦးကို မုဒိမ်းမှု ကျူးလွန်ပြီးနောက် ရေနစ်သတ်ဖြတ်ရန် ကြိုးပမ်းခဲ့သည်ဟု သိရသည်။
ပြစ်မှုကျူးလွန်သူ ၂ ဦးကို ဖြစ်ပွားသော နေ့ကပင် ဖမ်းဆီးထိန်းသိမ်းထားပြီး ယင်းအမှုကို စုံစမ်းစစ်ဆေးမှုများ ဆောင်ရွက် နေကြောင်း၊ တရားမျှတမှု ရရှိရေးအတွက် ပြစ်မှု ပြစ်ဒဏ် မျှတအောင် ပြင်းပြင်းထန်ထန် အရေးယူဆောင်ရွက်သွားမည်ဟု အာရက္ခတပ်တော် ULA/ AA ပြောရေးဆိုခွင့်ရှိသူ ဦးခိုင်သုခက ပြောသည်။
