မြန်မာ-အိန္ဒိယနယ်စပ်တလျှောက်က မူးယစ်ဆေးဝါးရောင်းဝယ်မှုများကို တားဆီးနှိမ်နှင်းရေး အလေးထားဆောင်ရွက်မည်ဟု ချင်းလဲန်းကောင်စီ ဆို

(006SV)

ချင်းပြည်နှင့် အိန္ဒိယနယ်စပ်တစ်လျောက် တရားမဝင်မူးယစ်ဆေးဝါး ရောင်းဝယ်ဖောက်ကားမှုများကို တားဆီးနှိမ်နှင်းရေး အလေးထားဆောင်ရွက်သွားရန် ဆုံးဖြတ်ထားကြောင်း ချင်းလဲန်းကောင်စီက သတင်းထုတ်ပြန်သည်။

တရားမဝင်မူးယစ်ဆေးဝါးများနှင့် ပတ်သက်၍ စိုက်ပျိုးသူများ၊ အရောင်းအဝယ်ပြုသူများ၊ မူးယစ်ဆေးဝါး လက်ဝယ်ထားရှိသူ များကို စုံစမ်းဖော်ထုတ်ကာ တရားဥပဒေအရ အရေးယူဆောင်ရွက်သွားမည်ဖြစ်ကြောင်း မတ်လ ၁၈ ရက်က ချင်းပြည်ကောင်စီက ထုတ်ပြန်သည်။

မူးယစ်ဆေးဝါးရောင်းဝယ်သူများသည် အာဏာမသိမ်းမှီကပင် ပုံစံမျိုးစုံဖြင့် ရောင်းဝယ်ဖောက်ကား နေသူများဖြစ်ပြီး လက်ရှိမှာ နယ်စပ်တလျှောက် မငြိမ်သက်မှုများနှင့် စစ်ရေးတင်းမာမှုများကို အခွင့်ကောင်းယူ၍ မြန်မာ စစ်ဘေးရှောင်များကို အသုံးချကာ ယခင်ကထက် ရောင်းဝယ်မှုများကို ပိုမိုပြုလုပ်လာကြောင်း ချင်းလဲန်း ကောင်စီက ဆိုသည်။

မြန်မာစစ်ဘေးရှောင်များအနေဖြင့် အိန္ဒိယနိုင်ငံ၏ ဥပဒေများကို လေးစားလိုက်နာပြီး မူးယစ်ဆေးဝါး ရောင်းဝယ်သူများ၏ အမည်ခံ၊ အသုံးချခံအဖြစ် မပါဝင်ကြရန် နှင့် မူးယစ်ဆေးဝါးရောင်းဝယ်မှု သတင်းများကို သက်ဆိုင်ရာ မြို့နယ်နှင့် ဒေသအုပ်ချုပ်ရေးအဖွဲ့သို့ သတင်းပေး တိုင်ကြားကြရန် ချင်းလဲန်းကောင်စီက တိုက်တွန်းထားသည်။

မြန်မာနိုင်ငံတွင် စစ်အာဏာသိမ်းမှုဖြစ်ပွားသည့်နောက်ပိုင်းတွင် အိန္ဒိယ-မြန်မာနယ်စပ်အမှတ် ၂ ကုန်သွယ်ရေးစခန်း ရိမြို့ ကတဆင့် အိန္ဒိယနိုင်ငံ မီဇိုရမ်ပြည်နယ်သို မူးယစ်ဆေး၀ါး ဘိန်းဖြူနှင့် စိတ်ကြွဆေးပြားမှောင်ခိုတင်သွင်းမှုပိုမိုများပြားလာခဲ့သည်။

မီဇိုရမ်ပြည်နယ် ရဲတပ်ဖွဲ့အနေဖြင့် ၂၀၂၃ ခုနှစ်ထဲမှာ ဘိန်းဖြူ ၆၈.၀၅၅ ကီလိုဂရမ်၊ Methamphetamine စိတ်ကြွ ဆေးပြား ၁၅၄.၁၇၂ ကီလိုဂရမ်၊ Crystal Meth ၄၉.၀၀၅ ကီလိုဂရမ်ကျော်ဖမ်းဆီးရမိခဲ့ပြီး မူးယစ်ဆေး၀ါးများနှင့် ပတ်သက်ဆက်နွယ်သူ အယောက် ၃၈၅ ဦးကို ဖမ်းဆီးခဲ့သည့်အနက် မြန်မာနိုင်ငံသား ၅၅ ယောက် ပါ၀င်သည်ဟု သိရသည်။

ချင်းပြည်နယ်မြောက်ပိုင်း တွန်းဇံမြို့နယ်၊ တွန်းဇံ- ကျီးခါး ကားလမ်းမများဘေးမှာလည်း ဘိန်းစိုက်ခင်းများ ယခင်နှစ်များထက် ပိုမိုများပြားလာနေကြောင်း သိရသည်။