(004SS)
ရန်ကုန်မြို့၊ အရှေ့ဒဂုံမြို့နယ်ရှိ New Life Mission Church အဆောက်အဦးတစ်ခုတွင် တစ်ဦးတည်းနေထိုင်နေသော ချင်းလူမျိုး ဓမ္မဆရာမတစ်ဦးအား ရင်းနှီးကျွမ်းဝင်သူ အမျိုးသမီးတစ်ဦး၏ ဝင်ရောက်ရိုက်နှက်မှုကြောင့် ပြင်းထန်ဒဏ်ရာရရှိပြီး ဆေးရုံတွင် အရေးပေါ် ဆေးကုသမှုခံယူနေရကြောင်း သိရသည်။
ဖြစ်စဉ်မှာ ဩဂုတ်လ ၂၀ ရက်နေ့ ညနေ ၆ နာရီခန့်က ဒေါ်မိငယ်ဆိုသူ အမျိုးသမီးတစ်ဦးသည် ဘုရားကျောင်းသို့ သွားရောက်လည်ပတ်ခဲ့ပြီး ချင်းဓမ္မဆရာမ ညောင်ဒိတ်လျန်း (ခေါ်) ညောင်နူး (၂၅ နှစ်) ထံ ငွေကြေးချေးငှါးရန် ပြောဆိုရာမှ မရသည့်အတွက် ရုတ်တရက် ရန်ပြုမှုစတင်ခဲ့ခြင်းဟု သိရသည်။
“ကျွန်တော့ တူမလေးပါ။ သူနဲ့ ခင်တဲ့ အမျိုးသမီးတစ်ဦး သူနေတဲ့အိမ်ကို ရောက်လာပြီး စကားစမြည်ပြောနေရာကနေ အိမ်တံခါးတွေကို ဂျက်ချပြီးတော့ တူမ ဦးခေါင်းကို မသေမချင်း အုတ်ခဲနဲ့ရော၊ ငရုတ်ကျည်ပွေ့နဲ့ရော ထုရိုက်တာ။ ကျွန်တော့တူမ ခမျာ ဦးခေါင်းမှာ ပေါက်ပြဲဒဏ်ရာတေနဲ့ ပြည့်နှက်နေခဲ့တယ်။ ကျွန်တော်တူမကို သေပြီထင်ပြီး အဲဒီကျူးလွန်သူက အခန်းထဲဝင်၊ ပစ္စည်းဥစ္စာတွေယူနေချိန် အဲလောက်အခြေအနေဆိုးကြားကနေ ဒယိမ်းဒယိုင်နဲ့ လွတ်မြောက်စေခဲ့တဲ့လမ်းစကို ဘုရားသခင်ပြင်ဆင်ပေးတယ်။ လက်ရှိမှာတော့ ဆေးကုသမှု ခံယူနေပါတယ်။ ဆက်လက်ဆုတောင်းပေးကြပါ” ဟု ရိုက်နှက်ခံရသူ၏ ဆွေမျိုး အမျိုးသားတစ်ဦးက ၎င်း၏လူမှုစာမျက်နှာပေါ်တွင် ဖော်ပြထားသည်။
ထို့သို့ ရိုက်နှက်ခဲ့ပြီးနောက် သတိလစ်မေ့မြောသွားချိန် ဒေါ်မိငယ်သည် အိမ်ခန်းထဲဝင်ကာ ပစ္စည်းများ ရှာဖွေလုယက်ခဲ့စဉ် ဆရာမညောင်နူးသည် တံခါးဖွင့်ကာ အိမ်နီးချင်းထံ ထွက်ပြေးခိုဝင်နိုင်ခဲ့ပြီး အိမ်နီးချင်းများ၏ အကူအညီဖြင့် ချက်ချင်း လူနာတင်ယာဉ်ခေါ်ယူကာ မြောက်ဥက္ကလာပ ပြည်သူ့ဆေးရုံသို့ အရေးပေါ် ပို့ဆောင်ခံခဲ့ရကြောင်း ချင်းဝေါလ်မီဒီယာက ဖော်ပြသည်။
ဆေးရုံစစ်ဆေးမှုအရ ဆရာမညောင်နူး၏ ဦးခေါင်းတွင် ဒဏ်ရာ ၂၅ ချက်ထက်မနည်း ရှိသော်လည်း အသက်အန္တရာယ်ရှိသည့် ဦးနှောက်ထိခိုက်မှုမရှိကြောင်း၊ လက်ရှိတွင် သတိရလာပြီဖြစ်ကာ ဆက်လက်ကုသမှု ခံယူလျက်ရှိနေကြောင်း သိရသည်။
လက်ရှိတွင် ကျူးလွန်သူ ဒေါ်မိငယ်မှာ ဖြစ်စဉ်ဖြစ်ပွားပြီးနောက် ထွက်ပြေးသွားခြင်းကြောင့် ဖမ်းဆီးခြင်းမရှိနိုင်သေးကြောင်းနှင့် ၎င်း၏မိသားစုဝင်များအား စစ်ဆေးမေးမြန်းရန် ရဲတပ်ဖွဲ့မှ ခေါ်ဆောင်သွားကြောင်းလည်း သိရသည်။
