(005MK)
ချင်းပြည်နယ် ဖလမ်းမြို့နယ် ဟွာလ်ငိုးရမ်းဒေသ ရိခေါဒါရ်မြို့က ဘိန်းဖြူအမြောက်အများဖမ်းဆီးရမိသော TPCE မူကြိုကျောင်းတွင် စိတ်ကြွဆေးပြားများ ထပ်မံဖမ်းဆီးရမိကြောင်း Hualngoram People Organization /CDF-Hualngoram က ထုတ်ပြန်သည်။
HPO/CDF Hualngoram သည် ပြီးခဲ့သော မေလ ၂၂ ရက်နေ့က ရိခေါဒါရ်မြို့အမှတ် ၂ ရပ်ကွက်(တီအိုချောင်း) က TPCE မူကြိုကျောင်းတွင် ဘိန်းဖြူ ဆပ်ပြာ ဗူး (၄၂၇) ဗူးဖမ်းဆီးခဲ့ပြီးနောက် အဆိုပါမူကြိုကျောင်းကိုလည်း ဟွာလ်ငိုးရမ်းဒေသန္တရအစိုးရက ချိတ်ပိတ်ခဲ့သည်။
အဆိုပါအမှုနှင့်ပတ်သက်သောကွင်းဆက်များဖော်ထုတ်နိုင်ရေးအတွက် ဆက်လက်ဆောင်ရွက်တွင် မေလ ၂၈ ရက်နေ့ က ကျောင်းသားမိဘတစ်ချို့၏တောင်းဆိုချက်ဖြင့် အမှုတော်ဆောင်များနှင့် အသိသက်သေများ ရှေ့မှောက်တွင် ကျောင်းအပ်နှံသည့် ငွေစာရင်းများအား ရှာဖွေဆောင်ရွက်ရာမှာ နေအိမ်အတွင်း ဝှက်ထားသော စိတ်ကြွဆေးပြား ၆၀၀၀ နှင့်အတူ မူးယစ်ဆေးရောင်းချရာတွင်အသုံးပြုသော ရူပီးငွေ ၅၁၀၀၀ နှင့် မြန်မာ ကျပ်ငွေ ၂၆၇၄၀၀၀ တို့ကို ထပ်မံဖမ်းဆီးခဲ့သည်ဟု HPO/CDF-Hualngoram က မေလ ၂၉ ရက်နေ့က ထုတ်ပြန်သည်။
လက်ရှိမှာ ထွက်ပြေးတိမ်းရှောင်နေသော မူးယစ်ဆေးဝါးများဖမ်းဆီးသည့် TPCE မူကြို ကျောင်းအုပ် ဦးငွန်ဆွီးထန်းကိုဖမ်းဆီးနိုင်ရေးအတွက် မီဇိုရမ်ပြည်နယ် ရဲတပ်ဖွဲ့၊ YMA များနှင့်လည်း ချိတ်ဆက်ဆောင်ရွက်လျက်ရှိကြောင်း HPO/CDF-Hualngoram ကပြောသည်။
TPCE မူကြို ကျောင်းအုပ် ဦးငွန်ဆွီးထန်းသည် CNO/CNDF ၏ ပညာရေးဘုတ်အဖွဲ့ဝင်ဖြစ်သည်ဟု သတင်းများ ထွက်ပေါ်ခဲ့သော်လည်း CNO ပညာ ရေးဌာနက ၎င်းတို့၏ အဖွဲ့ဝင်မဟုတ်ကြောင်းနှင့် ပတ်သက်ဆက်နွယ်မှုမရှိ ကြောင်း ထုတ်ပြန်ထားသည်။
ဟွာလ်ငိုးရမ်းဒေသတွင် မူးယစ်ဆေးဝါးရောင်းဝယ်ဖောက်ကားမှုကို တတ်နိုင်သည့်ဘက်မှ တိုက်ဖျက်သွားမှာ ဖြစ်ပြီး ပြည်သူများအနေဖြင့်လည်း မူးယစ်ဆေးဝါးတိုက်ဖျက်ရေးလုပ်ငန်းမှာ ပူးပေါင်းပါဝင် ပေးကြရန် HPO/CDF-Hualngoram က တိုက်တွန်းထားသည်။
