(004SS)
ချင်းပြည်နယ်၊ ဖလမ်းမြို့နယ် ဟွာလ်ငိုးရမ်းဒေသတွင် တိုက်ပွဲအတွင်းကျဆုံးသွားသော ရဲဘော်တစ်ဦး၏ ရုပ်အလောင်းရှာဖွေရန် သွားရောက်ခဲ့သော အရပ်သား ၅ ဦးကို စစ်ဆေးမေးမြန်ရန် ဖမ်းဆီးထိန်းသိမ်းပြီးနောက် ကောင်း မွန်စွာ ပြန်လွှတ်ပေးလိုက် ပြီဟု CDF-Hualngoram တာဝန်ရှိသူတစ်ဦးကပြောသည်။
ပြီးခဲ့သည့် ဇူလိုင်လဆန်းပိုင်းက ရိခေါဒါရ်မြို့တွင်ဖြစ်ပွားခဲ့သော တိုက်ပွဲအတွင်း ကျဆုံးသွားသော CNDF ရဲဘော် Uk Lian Piang ၏ ရုပ်အလောင်းကို ရှာဖွေရန် မိသားစုဝင် ၅ ဦးက ရိခေါဒါရ်မြို့ဘက်ကို လာရောက်သည့်အချိန် ဩဂုတ်လ ၁၆ ရက်နေ့ မှာ CDF- Hualngoram က လျန်နှာကျေးရွာ စစ်ဆေးရေးဂိတ်တွင် ဖမ်းဆီးခဲ့ခြင်း ဖြစ်သည်။
၎င်းတို့ ၅ ဦးကို ရိခေါဒါရ်စခန်းတွင် စစ်ဆေးမေးမြန်းပြီးနောက် တစ်ညအိပ်စေကာ နောက်တနေ့ ဩဂုတ်လ ၁၇ ရက်နေ့ တနင်္ဂနွေနေ့ မနက်ပိုင်းတွင် ပြန်လည် လွှတ်ပေးခဲ့ကြောင်း CDF-Hualngoram မှ တာဝန်ရှိသူ ကိုဗဲင်ပွီးအားက ပြောသည်။
“ကျွန်တော်တို့လောလောဆယ်မှာ CNO/CNDF နဲ့ ငြိမ်းချမ်းရေးစာချုပ်လဲ မချုပ်ဆိုနိုင်သေးဘူးပေါ့နော်၊ ဆိုတော့ ကျွန် တော်တို့ ဒေသမှာ လုံခြုံရေးအရ သူစိမ်းဖြစ်ဖြစ် အဝင်အထွက်တင်းကြပ်ထားတာရှိတယ်ပေါ့နော်။ ဒါနဲ့ သူတို့လုံခြုံရေးဂိတ် ဖြတ်လာတော့ အရက်ကလဲ တအားမူးကြတယ်။ မေးတဲ့အခါကျတော့ သူတို့ထဲက ၃ ယောက်လောက်က CNDF ပါလို့ ပြောတယ်။ နောက်လူကျတော့ CDF-Ngawn ပါ လို့ပြောပြန်တဲ့အခါကျတော့ ဗီဒီယိုပြန့်သွားတဲ့ဟာလဲ အဲဒါပဲပေါ့နော်။ ကျွန်တော်တို့ ရဲဘော်တွေကလဲ စစ်ဆေးမေးမြန်းလို့ရအောင် ထိန်းသိမ်းပြီးတော့ စခန်းကို ခေါ်သွားတယ်။ ကျွန်တော်တို့ သေချာစစ်ဆေးပြီးမှ ပြန်လွှတ်ပေးတယ်ပေါ့နော်” ကိုဗဲင်ပွီးယာကပြောသည်။
ဖမ်းဆီးခံရသူများမှာ Varung ကျေးရွာသား Val Tuan Kim (အသက် ၂၆ နှစ်)၊ Mickle (အသက် ၂၃ နှစ်) ၊ Bawi Deih Sang (အသက် ၂၆ နှစ်) နှင့် Belawi ကျေးရွာသား Lalmuansang (အသက် ၂၇ နှစ်)၊ Thang Hin Piang (အသက် ၄၃ နှစ်)တို့ဖြစ်ကြသည်။
၎င်းတို့သည် တိုက်ပွဲအတွင်းကျဆုံးခဲ့သော ၎င်းတို့၏ ညီတော်စပ်သူ CNDF ရဲဘော် Uk Lian Piang ရုပ်အလောင်းအား လာရောက်ရှာဖွေကြခြင်းဖြစ်ပြီး ရုပ်အလောင်းမတွေ့ရှိဘဲ အိမ်အပြန်လမ်းတွင် ယခုကဲ့သို့ ဖမ်းဆီးထိန်းသိမ်းခံရခြင်းဟု သိရသည်။
လက်ရှိအချိန်တွင် ပြည်သူများအနေဖြင့် Hualngoram ဒေသအတွင်း လွတ်လပ်စွာ သွားလာနိုင်ကြောင်း၊ စစ်ရေးနှင့် လုံခြုံရေးအခြေအနေများကြောင့် ပုံမှန်စစ်ဆေးမေးမြန်းမှုများ ပြုလုပ်လျက်ရှိကာ ပြည်သူများအနေဖြင့် စိုးရိမ်စရာမလိုဘဲ ကြည်ဖြူစွာဖြင့် စစ်ဆေးမှုများကို ပူးပေါင်းဆောင်ရွက်ပေးကြရန်လည်း CDF-Hualngoram တာဝန်ရှိသူက မေတ္တာရပ်ခံထားသည်။
