လက်နက်အင်အားမမျှမှုနှင့် သာလွန်အင်အားဖြင့်ထိုးစစ်ဆင်ခံရသည့်အခြေနေကြောင့် CDF-Kanpetlet တပ်မဟာဌာနချုပ်ကို ယာယီစွန့်လွှတ်လိုက်ရ

ချင်းပြည်နယ်တောင်ပိုင်း ကန်ပက်လက်မြို့နယ်တွင် စစ်ကောင်စီတပ်ဖွဲ့က အင်အားအလုံးအရင်းဖြင့်ထိုးစစ်ဆင်လာ သည့်အတွက် ပြီးခဲ့သည့်ဖေဖော်ဝါရီလ ၇ ရက်နေ့ကစပြီး ယနေ့ချိန်ထိ CDF-Kanpetlet တပ်ဖွဲ့နှင့် တိုက်ပွဲတောက် လျှောက်ဖြစ်ပွားနေပြီး လက်နက်အင်အားမမျှမှုကြောင့် တပ်မဟာဌာနချုပ်ကို ယာယီစွန့်လွှတ်လိုက်ရသည်ဟု CDF-Kanpetlet က ယနေ့ထုတ်ပြန်လိုက်သည်။

“မိမိတို့ CDF-Kanpetlet ဖက်မှ ကျည်မလုံလောက်ခြင်း၊ လက်နက်အင်အားမမျှခြင်း၊ ကျေးရွာအတွင်းရှိပြည်သူများ ထိခိုက်ဒဏ်ရာရမည့်အရေးကိုရှေ့ရှုခြင်းနှင့် သာလွန်အင်အားဖြင့်ထိုးစစ်ဆင်ခံရသည့် အခြေနေများကြောင့် တပ်မ ဟာဌာနချုပ်ကို ယာယီစွန့်လွှတ်လိုက်ရသည်’’ ဟု CDF-Kanpetlet ၏ ထုတ်ပြန်ချက်တွင် ဖော်ပြထားသည်။

အင်အား ၂၀၀ ခန့်ရှိသည့် စစ်ကောင်စီတပ်ဖွဲ့သည် မတ်လ ၁၁ ရက်နေ့က CDF-Kanpetlet တပ်မဟာဌာနချုပ်ရှိရာဖက်သို့ ဦးတည်ကာ စစ်ကြောင်းထိုးလာရာ CDF-Kanpetlet တပ်ဖွဲ့နှင့် ရဲလောင်းပန်းရွာအထက်နား ပန်းတောင်ကျော တွင်ထိ တွေ့တိုက်ပွဲဖြစ်ပွားခဲ့ရာ စစ်ကောင်စီဘက်မှ ၃ ဦးသေဆုံးခဲ့သည်ဟုသိရသည်။

ထို့နောက် မတ်လ ၁၃ ရက်နေ့တွင် ငုံလောင်းရွာမြောက်ဖက် အမ်ပုံရွာ အထက်ပိုင်းတွင် တပ်ဖျောက်ထားသော စစ်ကောင်စီတပ်ဖွဲ့ကို CDF – Kanpetlet ၊ CDF Mindat ၊ ယောဒေသကာကွယ်ရေးတပ်ဖွဲ့ The Youth Force နှင့် Saw- PDF တို့မှ တောနင်းရှာဖွေရာမှထိတွေ့တိုက်ပွဲထပ်မံဖြစ်ပွားကာ စစ်ကောင်စီဖက်မှ ၂ ဦး သေဆုံးခဲ့ပြီး မတ်လ ၁၄ ရက်တွင်လည်း ထိတွေ့တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီဘက်မှအထိအခိုက်အကျအဆုံးမသိရကြောင်း CDF-Kanpetlet ကထုတ်ပြန်သည်။

CDF-Kanpetlet ၊ CDF-Mindat ၊ ယောဒေသကာကွယ်ရေးတပ်ဖွဲ့ The Youth Force နှင့် Saw – PDF ပူးပေါင်းတပ်နှင့် စစ်ကောင်စီတပ်တို့သည် မတ်လ ၁၅ ရက်နေ့ နံနက် ၈းဝဝ နာရီမှ ညနေ ၃းဝဝနာရီ အထိ စမ္မသားရွာဟောင်း အတွင်း တိုက်ပွဲပြင်းထန်စွာဖြစ်ပွားခဲ့ပြီး CDF-Kanpetlet ဖက်မှ ရဲဘော်တစ်ဦး ကျဆုံးကာ နှစ်ဦးထိခိုက်ဒဏ်ရာရရှိခဲ့သည်ဟု သိရသည်။

ယမန်နေ့တိုက်ပွဲတွင် မင်းတပ်မြို့တွင်အထိုင်ချသော ခလရ ၂၇၄ တပ်ရင်း နှင့် ကျောက်ထု အမြောက်တပ်တို့ ဖက်မှ လက်နက်ကြီးပစ်ကူပေးခဲ့ပြီး စမ္မသားရွာဟောင်းရှိ လူနေအိမ် ၉ လုံး လက်နက်ကြီးထိမှန် မီးလောင်ပျက်စီးခဲ့သည်ဟု CDF-Kanpetlet ၏ ထုတ်ပြန်ချက်တွင်ဖော်ပြထားသည်။

နောက်ထပ်သတင်းရင်းမြစ်တစ်ခု၏ အဆိုအရ မတ်လ ၁၅ ရက်နေ့ကဖြစ်ပွားသည့် တိုက်ပွဲတွင် စစ်ကောင်စီ၏ လက်နက်ကြီးပစ်ခတ်မှုကြောင့် အသက် ၄၀ အရွယ်အမျိုးသားပြည်သူတစ်ဦး လက်နက်ကြီးထိမှန်သေဆုံးခဲ့ရပြီး ဒေသခံပြည်သူအချို့လည်းပျောက်ဆုံးမှုရှိနေသည်ဟု သိရသည်။

ယခုလက်ရှိတွင် ကန်ပက်လက်မြို့နယ်ထဲမှ လူဦးရေ ၁၂၀၀ ဝန်းကျင်ခန့်ရှိသော စမ္မသား၊ စံအိမ်နူး ခီတော် မကြား ကျေးရွာမှဒေသခံရွာသားများသည် တောတောင်ထဲသို့ထွက်ပြေးတိမ်းရှောင်နေကြရသည်ဟုလည်းသိရသည်။

ကန်ပက်လက်မြို့နယ်တွင် စစ်ကောင်စီတပ်က အင်အားအလုံးအရင်းဖြင့် တောက်လျှောက်ထိုးစစ်ဆင်လာနေသည့် အတွက် ပြည်တွင်း၊ပြည်ပ ရှိမိဘပြည်သူများနှင့်တော်လှန်ရေးထောက်ပို့ တပ်များအနေဖြင့် လက်နက်အင်အား၊ ကျည်အင်အား ဖြည့်တင်းနိုင်ရေး အထူးအာရုံစိုက် ကူညီထောက်ပံ့ပေးကြရန် CDF-Kanpetlet က တောင်းဆိုထားသည်။