(003PT)
ချင်းပြည်နယ်တောင်ပိုင်း ပလက်ဝမြို့နယ်အတွင်းက တိုက်ပွဲဖြစ်ပွားမှုကြောင့် စစ်ဘေးတိမ်းရှောင်နေကြရတဲ့ ဒေသခံပြည်သူတွေဟာ စား၀တ်နေရေးအခက်ခဲ ကြုံတွေ့နေကြရပြီး အရေးပေါ် လူသားချင်းစားနာမှုအထောက်ထား အကူညီ လိုအပ်နေတယ်လို့ ပလက်ဝ ကိုယ်ပိုင်အုပ်ချုပ်သော ခရိုင်ကောင်စီက ဒီဇင်ဘာလ ၁၈ ရက်နေ့က ထုတ်ပြန်ပါတယ်။
ပလက်ဝမြိုနယ်၊ ဆမီးမြို့က စစ်ကောင်စီ အခိုင်အမာစခန်းချထားတဲ့ “ဗျူဟာကုန်း” ကို ဒီဇင်ဘာလ (၁၄) ရက်နေ့က ရက္ခိုင့်တပ်တော် (AA) က တိုက်ခိုက်ခဲ့ပြီး စစ်ကောင်စီတပ်က လက်နက်ကြီး၊ လေကြောင်းပစ်ကူအမြောက်အမြားနဲ့ အပြင်းအထန် ခုခံစစ်သုံးခဲ့တာကြောင့် ဆမီးမြို့ဒေသခံများ အားလုံးနီးပါးဟာ ဘေးလွတ်ရာကျေးရွာတွေကို ထွက်ပြေး တိမ်းရှောင်ကြရတာလို့ ပလက်ဝ ကိုယ်ပိုင်အုပ်ချုပ်သောခရိုင်ကောင်စီ တာ၀န်ရှိသူ ဆလိုင်းမျိုးထိုက်က ပြောပါတယ်။
“ဆမီးအထက်ပိုင်းမှာက စစ်ရှောင်လူဦးရေက ရွာမှာလူဦးရေတွေထက် များများသွားတာ။ ဥပမာ ရွာက လူဦးရေ တစ်ရာ နှစ်ရာ ရှိတဲ့ရွာတွေမှာ အခုက စစ်ရှောင်တွေက နှစ်ရာ သုံးရာလောက်ရောက်တဲ့အချိန်မှာ သူတို့ရဲ့ တစ်နှစ်စာ လောင် ထားတဲ့ ဆန်ပေါ့နော်၊ စပါးတွေကတော့ တစ်လလောက်သာကျွေးရင်တော့ အမှန် ငတ်ဖို့ကိန်းရောက်တဲ့အနေထားဖြစ်ပေါ့။ အဓိကတော့ စားဝတ်နေရေးပါ။ ကျန်းမာရေးစောင့်ရှောက်မှု။ သူတို့ရဲ့နေဖို့ အမိုးအကာ တွေပေါ့နော် ဒါတွေက အခုလက်တလောမှာ အရေးပေါ်လိုအပ်ချက်တွေဖြစ်တယ်” ဟု ဆလိုင်းမျိုးထိုက်က ပြောသည်။
ဆမီးမြို့ဟာ လူဦးရေ ၅၀၀၀ ၀န်းကျင်လောက်ရှိတဲ့မြို့ဖြစ်ပြီး ယခင် ၂၀၁၈ ခုနှစ်က ရက္ခိုင့်တပ်တော် AA နဲ့ စစ်ကောင်စီတပ်တို့ကြား တိုက်ပွဲကြောင့် ပလက်၀မြို့နယ်ထဲက ဒေသခံပြည်သူ ၃၀၀၀ ၀န်းကျင်ဟာလည်း ဆမီးမြို့ပေါ်မှာ စစ်ဘေးရှောင်စခန်းမှာ ခိုလုံနေကြရတာြဖစ်ပါတယ်။
အခုခါ ဆမီးမြို့ပေါ်မှာ တိုက်ပွဲဖြစ်ပွားလာတာကြောင့် ဆမီးမြို့ကဒေသခံတွေနဲ့အတူ စစ်ဘေးရှောင်တွေကလည်း မြို့ကို အားလုံးစွန်ခွါပြီး ထွက်ပြေးတိမ်းရှောင်နေကြရလို့ အခက်အခဲတွေနဲ့ ကြုံနေကြရတာလို့ ဆလိုင်းမျိုးထိုက်က ပြောပါတယ်။
ယခုလက်ရှိ ပလက်ဝမြို့နယ်အတွင်း တော်လှန်ရေးအင်အားစု လက်နက်ကိုင်တပ်ဖွဲ့တွေနဲ့ စစ်ကောင်စီတပ်ဖွဲ့တို့အကြား တိုက်ပွဲပေါင်းများစွာ ဖြစ်ပွားမှုကြောင့် အရပ်သားပြည်သူတွေ အိုးအိမ်စွန့်ခွာကာ ဘေးလွတ်ရာ နီးစပ်ရာကျေးရွာနဲ့ အိန္ဒိယနိုင်ငံ မီဇိုရမ်ပြည်နယ် နယ်စပ်ဒေသတွေမှာ ထွက်ပြေးတိမ်းရှောင်နေကြရပြီး ပလက်၀ခရိုင်အတွင်း တိုက်ပွဲရှောင်လူဦးရေမှာ ၃၀,၀၀၀ ကျော်ခန့်အထိ မြင့်တက်လာပြီလို့ ပလက်ဝ ကိုယ်ပိုင်အုပ်ချုပ်သောခရိုင်ကောင်စီက ဆိုပါတယ်။
ဒါကြောင့် တိုက်ပွဲရှောင်အရပ်သားပြည်သူတွေအတွက် စားနပ်ရိက္ခာ၊ နေရာထိုင်ခင်းနဲ့ အခြေခံကျန်းမာရေးစောင့်ရှောက်မှုတွက် ဆေးဝါးပစ္စည်းတွေ အရေးပေါ်လိုအပ်လျှက်ရှိပြီး ပြည်တွင်း/ပြည်ပ တိုင်းရင်းသား ညီကိုမောင်နှမတွေ၊ NOG/INGO အဖွဲ့အစည်းတွေအနေနဲ့ လူသားချင်းစာနာထောက်ထားမှုဆိုင်ရာ အကူအညီတွေ ပံ့ပိုးပေးကြဖို့ ပလက်ဝ ကိုယ်ပိုင်အုပ်ချုပ်သော ခရိုင်ကောင်စီက တောင်းဆိုထားပါတယ်။
