(006SV)
ချင်းပြည်နယ်မြောက်ပိုင်း၊ တီးတိန်မြို့မှ သိုင်းငင်းရွာကို စစ်ကြောင်းထိုးဝင်ရောက်လာသည့် စစ်ကော်မရှင်တပ်နှင့် ချင်းပူးပေါင်း တပ်တို့ တိုက်ပွဲများ ဆက်လက်ဖြစ်ပွားနေရာ ယမန်နေ့က တိုက်ပွဲတွင် စစ်ကော်မရှင်တပ်က အထိအခိုက်အကျဆုံး များသည်ဟု သိရသည်။
နိုဝင်ဘာလ ၉ ရက်က စစ်ကော်မရှင်တပ် စစ်ကြောင်းသည် သိုင်းငင်ရွာကို ရောက်ရှိလာချိန်တွင် ချင်းပူးပေါင်း တပ်က မိုင်းထောင် တိုက်ခိုက်ခြင်းဖြစ်ပြီး စစ်ကော်မရှင်တပ်က ၂၀ ခန့် သေဆုံးပြီး ၇ ဦး အပြင်းအထန် ရရှိကြောင်း CDF CDM Siyin ပြောရေးဆိုခွင့်ရှိ သူ ဆလိုင်း ဒီကီက ပြောသည်။
“မနေ့က တိုက်ပွဲက ပြင်းထန်တယ်လို့ ပြောရမယ်။ မနေ့က ကျနော်တို့က သိုင်းငင်းကို ဆုတ်လိုက်ရတော့ အထွက်လမ်းတွေရော အဲဒီမှာက မိုင်းတွေ တော်တော်ထောင်ခဲ့ပါတယ်။ အဲဒီမှာ သူတို့က အတော်လေး အထိနာသွားတဲ့ သဘောရှိတယ်။ ကျနော်တို့ မြင်တွေ့ရတာက ၇ ဦးက ပွဲချင်းပြီး သေတယ်။ ပြီးတော့ ၂၀ ကျော်က အပြင်းအထန် ဒဏ်ရာ ရတယ်လို့ ကျနော်တို့ သိထားတယ်။ ဒါပေမယ့် ဒီမနက် (နိုဝင်ဘာလ ၁၀ရက်) အတွင်းသတင်းကနေ ပြန်ကြားတာက သေတာက အယောက် ၂၀ တဲ့၊ ၇ ဦးကတော့ အပြင်းအထန် ဒဏ်ရာ ရတာဆိုပြီးတော့ ပြောတယ်” ဟု ဆလိုင်း ဒီကီက ပြောသည်။
နိုဝင်ဘာလ ၇ ရက်ကလည်း လေထန်ကုန်း ခေါ် Fort White တွင် စစ်တပ်စစ်ကြောင်းနှင့် CDF CDM Siyin ချင်းပူးပေါင်းတပ်တို့ ထိတွေ့မှုဖြစ်ပွားပြီး စစ်တပ်ဘက်က ၄ ဦး သေဆုံးကြောင်း သိရသည်။
အထိနာသော စစ်တပ်သည် လေထန်ကုန်းတွင် ညအိပ်ပြီးနောက် နိုဝင်ဘာလ ၈ ရက်တွင် တီးတိန်- သိုင်းငင်း လမ်းမအတိုင်း မလာဘဲ တာဝါတိုင်းလမ်းမှ စစ်ကြောင်းထိုးကာ နိုဝင်ဘာလ ၉ ရက်တွင် သိုင်းငင်းကို ပြန်လည်ထိန်းချုပ်ခြင်းဖြစ်သည်ဟု သိရသည်။
တီးတိန်မြို့မှ သိုင်းငင်းသို့ အင်အား ၄၀၀ ခန့်ဖြင့် စစ်ကြောင်းထိုးလာသော စစ်တပ်နှင့် ချင်းညီနောင်တပ်တို့ အောက်တိုဘာလ ၂၉ ရက်မှ နိုဝင်ဘာလ ၇ ရက်အထိ နေ့စဉ်တိုက်ပွဲ ဖြစ်ပွားရာမှာ စစ်တပ်ဘက်မှ ၄၀ ထက်မနည်း သေဆုံးကာ စစ်သုံ့ပန်းတချို့ကိုလည်း ဖမ်းဆီးရမိကြောင်း၊ လူသားဒိုင်းအဖြစ် ဖမ်းဆီးအသုံးပြုနေသော ဒေသခံ ၁၄ ဦးကိုလည်း ကယ်တင်နိုင်ခဲ့သည်ဟု ချင်းညီနောင် တပ်ဖွဲ့က ထုတ်ပြန်ထားသည်။
ချင်းညီနောင်တပ်ဖွဲ့နှင့် စစ်ကော်မရှင်တပ်တို့ကြား တိုက်ပွဲများ ဖြစ်ပွားပြီးနောက် နိုဝင်ဘာလ ၇ ရက်မှစတင်၍ ယနေ့အထိ စစ်ကော်မရှင်တပ်နှင့် ချင်းလဲန်းကောင်စီ ပူးပေါင်းတပ်တို့ တိုက်ပွဲများ ဆက်လက်ဖြစ်ပွားနေသည်ဟု ဆိုသည်။
လက်ရှိတွင် သိုင်းငင်းကို အင်အား ၃၀၀ ကျော်ဖြင့် ရောက်ရှိနေပြီးဖြစ်သည့် စစ်ကော်မရှင်တပ်၏ အခြေအနေကို စောင့်ကြည် နေဆဲသာဖြစ်ပြီး ပြည်သူများအနေဖြင့် ခရီးသွားလာမည်ဆိုပါက စစ်ရေးသတင်းကို အရင်ဆုံး စုံစမ်း၍ သွားလာရန် သတိပေး ထားသည်။
“သူတို့ရဲ့ စခန်းကုန်းကို ပြန်ပြင်မလား၊ မပြင်ဘူးလား၊ ထိုင်မလား၊ မထိုင်းဘူးလားဆိုတာ ကျနော်တို့လည်း စောင့်ကြည့်နေတုန်းပဲ၊၊ အခုလောလောဆယ်ကတော့ စောင့်ကြည့်နေတဲ့ အခြေအနေပဲ သိုင်းငင်းမှာပဲ ထိုင်းမလား၊ ကလေးဘက်ကို ဆင်းမလား၊ တီးတိန်ဘက်ကို ပြန်လှည့်မလား၊ ဖလမ်းဘက်ကို ဆင်းမလားဆိုတာ မသိရသေးတော့ အထူးသဖြင့် ပြည်သူတွေက တနေရာရာကို သွားမယ်ဆိုရင် စစ်ရေးသတင်းကို အရင်းဆုံးစုံစမ်းပြီးမှ သေချာမှ သွားဖို့ လာဖို့ အဲဒါကို သတိပေးပြောချင်ပါတယ်” ဟု CDF CDM Siyin ပြောရေးဆိုခွင့်ရှိသူ ဆလိုင်း ဒီကီက ပြောသည်။
ကလေး မှ သိုင်းငင်းသို့ တက်လာသော စစ်ကြောင်းမှာလည်း ချင်းတော်လှန်ရေးတပ်ဖွဲ့နှင့် တိုက်ပွဲ ဖြစ်ပွားပြီး အထိနာသောကြောင့် မွှာလ်ပီးရွာတွင် ယနေ့အထိ ရပ်တန့်ထားသည်ဟု သိရသည်။
ယင်းစစ်ကြောင်းသည် ၁၂ ဘီးကား ၁စီး နှင့် အိမ်းစီးကား ၂ စီးတို့ဖြင့် စစ်တပ်အင်အားတချို့ကို ကလေးမြို့ဘက်သို့ တပ်ပြန်ဆုတ်ထားသည်ဟု ဒေသခံတချိုက ပြောသည်။
ကလေး- တီးတိန် – ဖလမ်း ကားလမ်းမပေါ်တွင် တည်ရှိပြီး စစ်ရေးအရ အချက်အချာ ကျသော သိုင်းငင်းရွာကို စစ်ကော်မရှင် တပ်သည် ကလေးမြို့နှင့် တီးတိန်မြို့မှ နှစ်ဖက်ညှပ်၍ အင်အားရာချီဖြင့် စစ်ကြောင်းထိုးလာ၍ ချင်းတော်လှန်ရေး တပ်ဖွဲ့များနှင့် တိုက်ပွဲပြင်းထန်နေခြင်းဖြစ်သည်။
လက်ရှိ စစ်ကော်မရှင်တပ်၏ စစ်ကြောင်းထိုးမှုတွင် စစ်ရေးအရ အချက်အချာကျသော ကနေဒီတောင် စစ်စခန်းနှင့် သိုင်းငင်းရွာ စခန်းတို့ကို ချင်းတော်လှန်ရေးတပ်များ လက်လွှတ်ထားရသည်ဟု သိရသည်။
