ချင်းပြည်နယ် ဟားခါးမြို့တွင် တိုက်ပွဲများကြောင့် နေအိမ် စွန့်ခွာနေရသည့် ပြည်သူများအတွက် ချင်းခရစ်ယာန်တက္ကသိုလ်တွင် စစ်ဘေးရှောင်စခန်း (IDPs camp) ကို စက်တင်ဘာ ၂ရ ရက်နေ့မှစပြီး ဖွင့်လှစ်ခဲ့ကြောင်း သိရသည်။
“အခုကျွန်တော်တို့ IDP Camp လုပ်ရတဲ့အကြောင်းရင်းကတော့ မြို့တွင်းမှာ အပစ်အခတ်နဲနဲပါးပါးရှိလာတယ်၊ တစ်ချို့ အိမ်တွေမှာ ဆိုရင်တော့ ကျည်မှန်တယ် လက်နက်ကြီးတွေ ကျတယ်၊ တစ်ချို့မှာဆိုရင်တော့ ဒဏ်ရာရတဲ့သူတွေလည်းရှိတယ်၊ အဲ့လိုမျိုးဖြစ်လာတဲ့ခါမှာ ကျွန်တော်တို့အနေနဲ့ IDP camp ကို CCU မှာ လုပ်ရခြင်းဖြစ်ပါတယ်၊ စစ်ဒဏ်ကြောင့်နေလို့ မရတော့တဲ့ အိမ်တွေ ရှိတော့ ရပ်ကွက်မှာ ပစ်ခတ်မှုတွေရှိတဲ့ နေရာတွေလည်း ရှိတော့ နေထိုင်လို့အဆင်မပြေတဲ့သူတွေ၊ အထူးသဖြင့် နေအိမ်စွန့်ခွာတဲ့ သူတွေအတွက် ကျွန်တော်တို့ လုပ်ဆောင်နေရဖြင်းဖြစ်ပါတယ်။ အဲ့နေရာမှာတော့ ပြည်သူလူထု အားလုံးအတွက်ဖြစ်ပါတယ်” ဟု စခန်းတာဝန်ခံ ပါစတာ ရွှေမန်းကပြောသည်။
ဟားခါးစစ်ဘေးရှောင်စခန်းသည် ပြည်သူလူထုလုံခြုံမှုရှိစေရေးအတွက်ဖွင့်လှစ်ခြင်းဖြစ်ကာ မည်သူမဆို လူမျိူးဘာသာမရွေးလာရောက်ခိုလုံနိုင်ပြီး လက်ရှိတွင် စစ်ဘေးရှောင်ပြည်သူ ၃ ယောက်ခိုလုံလျှက်ရှိကြသည်ဟု ၎င်းက ဆက်ပြောသည်။
“ကျွန်တော်တို့အနေနဲ့တော့ အထူးသဖြင့် ပြည်သူတွေ လုံခြုံဖို့ အတွက် ဟားခါးမြို့နယ်မက ပေါ့နော် နေထိုင်စရာ မရှိတဲ့ သူတွေအားလုံး၊ လူမျိုးအားလုံး၊ လူမျိုးဘာသာ မခွဲခြားပဲနဲ့ အဲ့မှာ ခိုလှုံချင်တဲ့သူတွေအတွက် ကျွန်တော်တို့ တံခါးအကြီးကြီး ဖွင့်ထားပါတယ်” ဟု ပါစတာရွှေမန်းကဆက်ပြောသည်။
စက်တင်ဘာ ၁၄ ရက်ကစပြီး စစ်ကောင်စီတပ်များက ဟားခါးမြို့တွင် ညတိုင်း လက်နက်ကြီးများရမ်းသမ်းပစ်ခတ်မှုကြောင့် ပြည်သူ ၂ ဦးဒဏ်ရာရခဲ့ပြီး နေအိမ်အချိူ့မှာလည်း ပျက်စီးမှုများရှိခဲ့သည်။
ထို့အပြင် စက်တင်ဘာ ၁၈ရက်နေ့က စစ်ကောင်စီတပ်များမှ လက်နက်ကြီးများ မြို့တွင်းသို့ပစ်ခတ်မှုကြောင့် ဟားခါးမြို့ရှိလူနေအိမ် ၂ လုံးမီးလောင်ကျွမ်းခဲ့ ပြီးနောက် ပြည်သူအချိူ့မှာလည်း နေအိမ်စွန့်ခွာကာ တောရွာများသို့ ထွက်ပြေးတိမ်းရှောင်သူများလည်းရှိခဲ့သည်။
