ချင်းပြည်နယ်၊ ဟားခါးမြို့အနီး ချွန်ကျုံးရွာကို စစ်ကောင်စီက ယနေ့မနက်ပိုင်း ၂ နာရီခန့်မှာ လေကြောင်းဖြင့် ဗုံးကြဲတိုက်ခိုက်မှုကြောင့် အသက်မပြည့် ကလေးတစ်ဦးအပါအဝင် မိသားစုဝင် ၄ ဦး သေဆုံးခဲ့သည်ဟု သိရသည်။
ယနေ့ ဒီဇင်ဘာလ ၁၀ ရက် မနက် ၂ နာရီခန့်တွင် မြေပြင်တိုက်ပွဲ ဖြစ်ပွားခြင်းမရှိဘဲ စစ်ကောင်စီက ချွန်ကျုံးကျေးရွာကို ဗုံးကြဲတိုက်ခိုက်ခဲ့ခြင်းဖြစ်ပြီး မိသားစုဝင် ၄ ယောက်သေဆုံးကာ ၉ ယောက် ဒဏ်ရာရရှိခဲ့သည်ဟု သိရသည်။
ဗုံးကြဲတိုက်ခိုက်မှုကြောင့် သေဆုံးသူများမှာ Pu Ram Cung (၆၆ နှစ်)၊ ဇနီးဖြစ်သူ Pi Tial Pum (၆၅ နှစ်) ၊ သမီးဖြစ်သူ Pi Sui Len (၄၇ နှစ်) နှင့် Mai Biak Tha Tin Cuai (၁၃ နှစ်) တို့ဖြစ်သည်ဟု VOC ချင်းသတင်းဌာနက ဖော်ပြသည်။
ထို့အပြင် နေအိမ် ၂ လုံး ပျက်စီးသွားပြီး အရပ်သားပြည်သူ ၉ ယောက် ထိခိုက်ဒဏ်ရာရရှိခဲ့သည်ဟု သိရသည်။
ချွန်ကျုံးကျေးရွာသည် ဟားခါးမြို့မရောက်ခင် ၁၀ မိုင်ခန့်အကွာ ဖလမ်း-ဟားခါး လမ်းမပေါ်တွင်တည်ရှိသော ကျေးရွာဖြစ်သည်။
