ချင်းပြည်နယ် ဟားခါးမြို့အထွက် ကျောဘုတ်စစ်ဆေးရေးဂိတ်ကို CDF-Hakha တပ်ရင်း (၂) Senthang တပ်ဖွဲ့က ယနေ့ နံနက်ပိုင်းကသွားရောက်တိုက်ခိုက်ရာတွင် စစ်ကောင်စီတပ်သား ၅ ဦး သေဆုံးခဲ့သည်ဟု Senthang Council က ထုတ်ပြန်သည်။
အဆိုပါတိုက်ခိုက်မှုသည် အောက်တိုဘာ ၁၉ ရက်နေ့က စစ်ကောင်စီတပ်ဖွဲ့၏ ဒရုန်းဖြင့်တိုက်ခိုက်မှုကြောင့် သေဆုံးသွားသော ဘွန်လုံးကျေးရွာက ကလေးငယ် ၂ ဦးအတွက် လက်စားခြေခြင်းဖြစ်သည်ဟု Senthang Council က ဆိုသည်။
စစ်ကောင်စီတပ်ဖွဲ့သည် ကျောဘုတ်စစ်ဆေးရေးဂိတ်တိုက်ခိုက်မှုတွင် ကျဆုံးသွားသော ၎င်းတို့တပ်သားများ၏ အလောင်းများကို စစ်ကားကြီးနှစ်စီးနှင့် အသေး ၃ စီးဖြင့် ကောက်ယူသယ်ဆောင်သွားကြသည်ဟု ထုတ်ပြန်ချက်တွင် ဖော်ပြထားသည်။
အဆိုပါတိုက်ပွဲတွင် ချင်းပြည်သူ့ကာကွယ်ရေးတပ်ဘက်မှ အထိအခိုက်မရှိ ပြန်ဆုတ်ခွာနိုင်ခဲ့ကြသည်ဟု သိရသည်။
အောက်တိုဘာလ ၁၉ ရက်နေ့က ဟားခါးမြို့နယ် ဘွန်လုံးကျေးရွာတွင် စစ်ကောင်စီတပ်ဖွဲ့က ဒရုန်းဖြင့် ဗုံးသီးလွှတ်ချခြင်းကြောင်း အသက် ၆ နှစ်အရွယ် KG ကျောင်းသားနှစ်ဦး သေဆုံးခဲ့ပြီး တစ်ဦးမှာ ပြင်းထန်ဒဏ်ရာရရှိခဲ့သည့်အပေါ် ကလဲ့စားခြေတိုက်ခိုက်ခြင်းဖြစ်သည်ဟု Senthang Council က ထုတ်ပြန်သည်။
