(004SS)
မန္တလေးတိုင်း၊ ညောင်ဦးခရိုင်၊ ကျောက်ပတောင်းမြို့မရဲစခန်းမှ အမျိုးသမီး ဒုရဲအုပ်တစ်ဦးသည် သူမ၏မိသားစုနှင့်အတူ CDF – KKG ထံ အလင်းဝင်ရောက်လာကြောင်း ယနေ့ သြဂုတ်လ ၂၃ ရက်နေ့တွင် CDF- KKG သတင်းနှင့် ပြန်ကြားရေးဌာနက ထုတ်ပြန်သည်။
အဆိုပါအမျိုးသမီး ဒုရဲအုပ်သည် သူမ၏ အမျိုးသားနှင့် ကလေး စုစုပေါင်း ၃ ဦးတို့သည် ဩဂုတ်လ ၁၆ ရက်နေ့က CDF- KKG ထံရောက်ရှိလာခြင်းဖြစ်ပြီး လွတ်မြောက်နယ်မြေသို့ ပို့ဆောင်ခဲ့ပြီးဖြစ်ကြောင်း CDF- KKG သတင်းနှင့် ပြန်ကြားရေးတာဝန်ခံက ပြောသည်။
“ပြီးခဲ့တဲ့ ၁၆ ရက်နေ့က ကျွန်တော်တို့ဆီရောက်လာတာ၊ သူရဲ့ အသိဆီကနေ ကျွန်တော်တို့ဆီရောက်လာတာပေါ့နော်။ သူတို့လာရတဲ့ခရီးကဝေးတယ်ဆိုတော့၊ လက်နက်ခဲယမ်းတော့ မပါဘူး၊ သူရယ်၊ သူ့ယောကျ်ားရယ် ကလေးတစ်ယောက်ရယ် ၃ ယောက်ပေါ့” ဟု ပြန်ကြားရေးတာဝန်ခံက ပြောသည်။
ယခုနှစ် ၂၀၂၄ ခုနှစ်အတွင်း ဒုရဲအုပ် ၂ ဦးအပါအဝင် ရဲ ၆ ဦးသည် CDF-KKG ထံ လက်နက်ခဲယမ်းနှင့် အလင်းဝင်ရောက်လာကြသည်ဟု CDF-KKG ပြန်ကြားရေးတာဝန်ခံထံမှ သိရသည်။
ထို့အပြင် သုံးပွင့်ဗိုလ်အပါအဝင် စစ်သားနှင့် ပျူစောထီးများ၊ ကျောင်းဆရာ၊ ဆရာမ များနှင့် အခြားဝန်ထမ်းများလည်း CDF-KKG ထံ အလင်းဝင်ကြသည်ဟု သိရသည်။
“ကျွန်တော်တို့ဆီမှာ မှတ်မှတ်ရရ သုံးပွင့်ဗိုလ်ရယ် စစ်သားတွေရော ပျူစောထီးတွေ၊ ကျောင်းဆရာ၊ ဆရာမတွေရော အခြားသူတွေကောပေါ့ အလင်းဝင်လာကြတယ် အဲထဲမှာ ရဲကတော်တော်နည်းတယ်။ ပြောချင်တာက တစ်ခု လိုချင်ရင် တစ်ခုစွန့်လွှတ်ရမယ်ပေါ့နော်။ ဆိုတော့ တော်လှန်ရေးကာလကလဲ ကြာလာပြီ ဆိုတော့ အမြန်ဆုံး အလင်းဝင်လာကြပါလို့ ဖိတ်ခေါ်ချင်ပါတယ်” ဟု CDF-KKG သတင်းနှင့် ပြန်ကြားရေးဌာန တာဝန်ခံက ပြောသည်။
CDF – KKG သည် ကလေး၊ ကဘော်၊ ဂန့်ဂေါဒေသအတွင်းက လူမျိုး၊ ဘာသာ မတူညီကွဲပြားကြသော တိုင်းရင်းသားညီအစ်ကိုမောင်နှမများထံမှ ပေါက်ဖွားလာသော တော်လှန်ရေးအဖွဲ့အစည်းဖြစ်ပြီး စစ်ကောင်စီ ကျဆုံးရေးကို ရှေးရှူ၍ နေရာဒေသမရွေး စစ်ရေးဖော်ဆောင်လျက်ရှိသော ချင်းလက်နက်ကိုင်တပ်ဖွဲ့ဖြစ်သည်။
