အိန္ဒိယရောက်ဒုက္ခသည်များ တတိယနိုင်ငံရှိ မိသားစုဝင်များနှင့် ပြန်လည်ပေါင်းစည်းရေး လမ်းညွှန်မှုအကူအညီများ လျှောက်ထားနိုင်

(004SS)

အိန္ဒိယနိုင်ငံအတွင်း ခိုလှုံနေကြသော ဒုက္ခသည်များနှင့် ခိုလှုံခွင့်တောင်းခံထားသူများသည် “မိသားစုပြန်လည်ပေါင်းစည်းရေး လမ်းညွှန်မှုအကူအညီပေးရေးအစီအစဉ် (FRUN)”ကို လျှောက်ထားနိုင်သည်ဟု ကုလသမဂ္ဂဒုက္ခသည်များဆိုင်ရာ မဟာ မင်းကြီးရုံး (UNHCR India) က ထုတ်ပြန်သည်။

အဆိုပါ အစီအစဉ်ကို UNHCR India နှင့် ADRA India တို့ ပူးပေါင်းကာ အကောင်အထည်ဖော် ဆောင်ရွက်နေခြင်းဖြစ်ပြီး တတိယနိုင်ငံရောက် မိသားစုဝင်များနှင့် ပြန်လည်ပေါင်းစည်းနိုင်ရန် လိုအပ်သော ဥပဒေကြောင်းအရ အကြံဉာဏ်နှင့် လမ်းညွှန်မှုများကို အခမဲ့ ပံ့ပိုးပေးသွားမည် ဖြစ်သည်။

ယင်းအစီအစဉ်တွင် ဇနီး သို့မဟုတ် ခင်ပွန်း၊ အသက် ၁၈ နှစ်အောက် ကလေးငယ်များ (အချို့နိုင်ငံများတွင် ၂၁ နှစ်အထိ) နှင့် တတိယနိုင်ငံရှိ အရွယ်မရောက်သေးသည့် ကလေး၏ မိဘ သို့မဟုတ် တရားဝင်အုပ်ထိန်းသူများ အဓိက အကျုံးဝင်မည် ဖြစ်ကာ အချို့နိုင်ငံများ၏ စည်းမျဉ်းအရ အရွယ်ရောက်ပြီးသား သားသမီး၊ မိဘနှင့် မောင်နှမအရင်းများလည်း ပါဝင်နိုင် သော်လည်း လုပ်ငန်းစဉ် ကြာမြင့်နိုင်ကြောင်း သိရသည်။

မိသားစုပြန်လည်ပေါင်းစည်းရေးအတွက် အကူအညီတောင်းခံလိုသူများသည် မိမိ၏ အမည်၊ UNHCR နံပါတ်၊ လက်ရှိ နေရပ်၊ ဖုန်းနံပါတ်၊ တတိယနိုင်ငံရှိ မိသားစုဝင်၏ အချက်အလက်နှင့် တော်စပ်မှုအထောက်အထားများဖြစ်သည့် မွေးစာရင်း သို့မဟုတ် အိမ်ထောင်စုစာရင်းတို့ကို ပြည့်စုံစွာဖော်ပြ၍ ADRA India ၏ အီးမေးလ် frindia@adraindia.org သို့ ပေးပို့ရ မည်ဖြစ်ပြီး UNHCR ၏ အီးမေးလ် indnecpt@unhcr.org ကိုလည်း မိတ္တူ (CC) တွဲ၍ ပေးပို့ရမည်ဖြစ်သည်။ ဖုန်းဖြင့် စုံစမ်းလိုပါက 011-45705611 သို့ ဆက်သွယ်နိုင်ပါသည်။

သို့သော် ဤအစီအစဉ်သည် လမ်းကြောင်းသစ်တစ်ခု ဖန်တီးပေးခြင်းမဟုတ်ဘဲ နိုင်ငံအသီးသီး၏ ရှိရင်းစွဲ ဗီဇာဥပဒေများ အတွင်းမှသာ လမ်းညွှန်ပေးခြင်းဖြစ်ပြီး ဗီဇာထုတ်ပေးရန် ဆုံးဖြတ်ချက်ကို သက်ဆိုင်ရာ နိုင်ငံအစိုးရများကသာ ချမှတ်မည် ဖြစ်ကြောင်း သိရသည်။

လုပ်ငန်းစဉ်ကြာမြင့်ချိန်မှာ လပေါင်းများစွာမှ နှစ်ပေါင်းများစွာအထိ ကြာမြင့်နိုင်ပြီး ဗီဇာကြေး၊ ဆေးစစ်ခ၊ DNA စစ်ဆေးခနှင့် လေယာဉ်လက်မှတ်ခ စသည့် ငွေကြေးကုန်ကျစရိတ်များကို UNHCR က တာဝန်ယူမည်မဟုတ်ဘဲ လျှောက်ထားသူ မိသားစုကသာ တာဝန်ယူရမည် ဖြစ်သည်။

ထို့အပြင် UNHCR နှင့် ADRA တို့၏ ဝန်ဆောင်မှုအားလုံးသည် လုံးဝအခမဲ့ဖြစ်ပြီး မည်သည့်ဝန်ထမ်း သို့မဟုတ် အဖွဲ့ အစည်းကမျှ ငွေကြေးတောင်းခံပိုင်ခွင့်မရှိကြောင်း အထူးသတိပေးထားသည်။ အကယ်၍ ငွေကြေးတောင်းခံခြင်း သို့မဟုတ် အကျင့်ပျက်ခြစားမှုတစ်စုံတစ်ရာ ကြုံတွေ့ရပါက UNHCR ၏ လုံခြုံစိတ်ချရသော အီးမေးလ်ဖြစ်သည့် indneconfidenti@unhcr.org သို့ တိုင်ကြားနိုင်ကြောင်း ထုတ်ပြန်ထားသည်။