MDF ရဲဘော်နှင့် ဒေသခံ ၄ ဦး သေဆုံးဟုဆို
(006SV)
အိန္ဒိယ- မြန်မာနယ်စပ်၊ ပလက်ဝမြို့နယ်၊ မရာဒေသ၊ ရွှေလိုက်ဝကျေးရွာအနီးရှိ မရာလဲန်းကာကွယ်ရေးတပ်ဖွဲ့ (MTC/ MDF) ၏ စခန်းတစ်ခုကို အာဏာသိမ်းစစ်တပ်က လေကြောင်းတိုက်ခိုက်မှု ပြုလုပ်ခဲ့ရာ ရဲဘော်အပါအဝင် ဒေသခံ ၄ ဦး သေဆုံးပြီး ထိခိုက်ဒဏ်ရာရရှိသူများလည်း ရှိနေကြောင်း ဒေသခံတချို့ထံ သိရသည်။
ယမန်နေ့ ဩဂုတ်လ ၂၅ ရက် ည ၁၁ နာရီခန့်မှာ ချင်းပြည်နယ်၊ မရာဒေသရှိ MTC/ MDF ၏ စခန်းတစ်ခုကို စစ်တပ်က ဂျက်ဖိုက်တာဖြင့် ဗုံး ၂လုံး ကြဲချသွားသည်ဟု သိရသည်။
“နယ်စပ်က ရွှေလိုက်ဝရွာအနီးမှာ ရှိတဲ့ MDF စခန်းကုန်းကို ကြဲတာလို့တော့ သိရတယ်။ ဒါပေမယ့် သေဆုံးသွားတဲ့ ၄ ဦးမှာ ၂ ဦးကတော့ ဒေသခံတွေလို့တော့ ပြောကြတယ်။ ထိခိုက်ဒဏ်ရာရရှိသူ ၅ ယောက်လောက် ရှိတယ်လို့ လောလောဆယ် သိထားရတယ်” ဟု ဒေသခံတစ်ဦးက ပြောသည်။
MTC/ MDF တပ်ဖွဲ့၏ လေ့ကျင့်ရေးစခန်းတစ်ခုကို စစ်တပ်က လေကြောင်းမှ ဗုံးကြဲတိုက်ခိုက်သည့်အတွက် Hrala ရွာသား ၂ ဦး၊ Patheitlâh ရွာသား ၁ ဦးနဲ့ Tido ရွာသား ၁ ဦး စသည့် ရဲဘော် ၄ ဦး ကျဆုံးခဲ့သည်ဟု ဒေသတွင်း သတင်းများကို ဖော်ပြပေးနေ သော The Maraland Times ကလည်း ရေးသားသည်။
အိန္ဒိယ – မြန်မာနယ်စပ်၊ မရာဒေသ၊ ရှင်းလက်ချောင်းဖျားမှာ တည်ရှိနေသော ရွှေလိုက်ဝကျေးရွာကို MTC/ MDF အပြင် အာရက္ခ တပ်တော် ULA/ AA ကလည်း ပူးတွဲထိန်းချုပ်ထားသည်ဟု သိရသည်။
ရွှေလိုက်ဝဖြစ်စဉ်နှင့်ပတ်သက်၍ MTC/ MDF ထံ ဆက်သွယ်မေးမြန်းထားသော်လည်း မရသေးပါ။
ဩဂုတ်လ ၂၄ ရက်က ပလက်ဝမြို့နယ် စိမ်းညင်းဝကျေးရွာကို စစ်တပ်က ဂျက်ဖိုက်တာ ၂ စီးဖြင့် လေကြောင်း တိုက်ခိုက်မှု ပြုလုပ်ခဲ့ရာ ကလေးငယ် ၁ဦး အပါအဝင် ဒေသခံ ၅ ဦး သေဆုံးပြီး ၁၀ နှစ်အောက် ကလေးငယ် ၈ ဦးအပါအဝင် ဒေသခံပြည်သူ ၁၇ ဦး ထိခိုက်ဒဏ်ရာများ ရရှိခဲ့သည်ဟု သိရသည်။
ဩဂုတ်လ ၁၁ ရက်နှင့် ၁၂ ရက်နေ့များမှာလည်း ပလက်ဝမြို့နှင့် ဆမီးမြို့များကို စစ်တပ်က လေကြောင်းတိုက်ခိုက်မှုများ ပြုလုပ်ခဲ့ရာ ကလေးငယ်များအပါအဝင် ဒေသခံပြည်သူတချို့ သေဆုံးမှု၊ ထိခိုက်မှုများ ရှိခဲ့သည်ဟု သိရသည်။
