(005MK)
အိန္ဒိယ-မြန်မာ နှစ်နိုင်ငံကြား နယ်စပ်ဖြတ်ကျော် ဝင်/ထွက်သွားခွင့်ပိတ်ပင်မှုကို အိန္ဒိယဗဟိုအစိုးရက ပြန်လည်ရုပ်သိမ်းလိုက်ပြီး ယနေ့မွန်းလွဲပိုင်းကစ၍ ရိ-ဇိုခေါထာရ် ချစ်ကြည်ရေးတံတားကိုလည်း ပြန်လည်ဖွင့်ပေးလိုက်ပြီဟု သိရသည်။
အိန္ဒိယနိုင်ငံမှာ ပြည်သူ့လွှတ်တော်ရွေးကောက်ပွဲကျင်းပမှုကို အကြောင်းပြကာ အိန္ဒိယ-မြန်မာ အမှတ် ၂ နယ်စပ်ကုန် သွယ်ရေးစခန်း တည်ရှိရာ ရိဒ်-ဇိုခေါထာရ် ချစ်ကြည်ရေး တံတားကို ဧပြီလ ၁၇ ရက်မှ ၁၉ ရက်နေ့အထိ ပိတ်ပင်ခဲ့သည်။
ရွေးကောက်ပွဲ ကျင်းပပြီးစီး၍ ဧပြီလ ၂၀ ရက်နေ့ မွန်းလွဲပိုင်းမှာ ရိဒ်-ဇိုခေါထာရ် ချစ်ကြည်ရေး တံတားကို ပြန်ဖွင့်ခဲ့ သော်လည်း အိန္ဒိယပြည်ထဲရေးဝန်ကြီးဌာန၏ အမိန့်အရဟုဆိုကာ အာသံရိုင်ဖယ်တပ်ဖွဲ့က နှစ်နိုင်ငံဝင်ထွက်သွား လာခွင့်ကို တင်းကြပ်လိုက်ပြီး မြန်မာဘက်ခြမ်းက ကျောင်းသူ၊ ကျောင်းသားနှင့် ကျန်းမာရေးဆိုင်ရာ အရေးပေါ် အခြေအနေများကိုသာ ခြွင်းချက်အဖြစ် နယ်စပ်ဖြတ်ကျော်ခွင့်ပြုထားခဲ့ခြင်းဖြစ်သည်။
အာသံရိုင်ဖယ်တပ်ဖွဲ့က မီဇိုရမ်ပြည်နယ် ကျန်ဖိုင်းခရိုင်ထဲက နယ်စပ်အနီးကျေးရွာများမှ ရပ်ရွာလူကြီးများ၊ အုပ်ချုပ်ရေးအဖွဲ့များအား ခေါ်ယူတွေ့ဆုံကာ အိန္ဒိယ-မြန်မာနယ်စပ်ကို ဧပြီလ ၂၀ ရက်မှ ၃၀ ရက်နေ့အထိ နားလည်မှု ကာလအဖြစ်သတ်မှတ်ကာ ဝင်ထွက်သွားလာခွင့်ပြုထားမည်ဖြစ်သော်လည်း မေလ ၁ ရက်နေ့ကစ၍ ပိတ်ပင်သွားမည်ဟု ပြောဆိုခဲ့သည်။
သို့သော်လည်း ယနေ့ဧပြီလ ၂၅ ရက်နေ့မွန်းလွဲပိုင်းတွင် အိန္ဒိယ-မြန်မာနယ်စပ်ကုန်သွယ်ရေးစခန်း ချင်းပြည်နယ် ဖလမ်း မြို့နယ်က ရိခေါဒါရ်မြို့နှင့် မီဇိုရမ်ပြည်နယ် ကျန်ဖိုင်းခရိုင် ဇိုခေါထာရ်ကျေးရွာကြား ရိ-ဇိုခေါထာရ် နယ်စပ်ဂိတ် တံတား ကို အိန္ဒိယဘက်က ပြန်လည်ဖွင့်လှစ်ပေးခဲ့သည်ဟု မီဇိုရမ်ရုပ်သံသတင်းဌာန Zonet က ကြေညာသည်။
ယနေ့မွန်းလွဲပိုင်းကစ၍ ရိ-ဇိုခေါထာရ် နယ်စပ်ဂိတ်တံတားမှတဆင့် နှစ်နိုင်ငံပြည်သူများနှင့် ကုန်ပစ္စည်းများလည်း ယခင်အတိုင်းပြန်လည်ဝင်ထွက်ခွင့်ရှိပြီဟု သိရသည်။
ထို့အပြင် မေလ ၁ ရက်နေ့ကစ၍ နယ်စပ်ကုန်သွယ်ရေးစခန်းနှင့် နှစ်နိုင်ငံဝင်ထွက်သွားလာ၍ရသော နယ်စပ် လမ်း ကြောင်းအားလုံးကို ပိတ်ပင်သွားမည်ဟု ပြောဆိုမှုကိုလည်း အိန္ဒိယဗဟိုအစိုးရက ပြန်လည်ရုပ်သိမ်းခဲ့သည်ဟု သိရသည်။
အိန္ဒိယ-မြန်မာနယ်စပ်ကို ပိတ်ပင်မည်ဆိုပါက မီဇိုရမ်ပြည်နယ်နှင့် ချင်းပြည်နယ်က နယ်စပ်အနီးတွင်တည်ရှိသော ဒေသခံပြည်သူများ၏ နေ့စဉ်စားဝတ်နေရေးရှာဖွေမှုအပေါ် အကြီးအကျယ် ရိုက်ခတ်နိုင်သည့်အတွက် ဒေသခံပြည်သူများနှင့် ရပ်ရွာအဖွဲ့အစည်းများက ကန့်ကွက်ခဲ့ကြသည်။
မီဇိုရမ်ပြည်နယ် ကျန်ဖိုင်းမြို့ မီဇိုးလူငယ်အသင်း (YMA) ကလည်း အိန္ဒိယဗဟိုအစိုးရ၏ နယ်စပ်ခြံစည်းရိုးခတ်မည့်အစီစဉ်ကို ကန့်ကွက်ထားပြီး ယင်းကိစ္စကို မေလ ၄ ရက်နေ့တွင် ၎င်းတို့အဖွဲ့အတွင်း ဆွေးနွေးကြမည်ဟု သိရသည်။
မီဇိုးကျောင်းသားသမဂ္ဂ (MZP) ကလည်း နယ်စပ်ပိတ်ပင်မှုကို မလိုလားကြောင်း အာသံရိုင်ဖယ်တပ်ဖွဲ့ထံ တင်ပြခဲ့ကြသည်ဟု သိရသည်။
