|| တိုက်ပွဲအတွင်း ဒေသခံ အမျိုးသမီး ၁ ဦး ထိခိုက်ဒဏ်ရာရ
(006SV)
ချင်းပြည်နယ်၊ ဖလမ်းမြို့ပေါ်တွင် ခလရ – ၂၆၈ တပ်ရင်းမှ စစ်ကောင်စီတပ်ဖွဲ့နှင့် ချင်းကာကွယ်ရေးတပ်ဖွဲ့ CNDF ပူးပေါင်းတပ်တို့ကြား ၂ နာရီကျော်ကြာ တိုက်ပွဲဖြစ်ပွားခဲ့ပြီး တိုက်ပွဲအတွင်း ဒေသခံအမျိုးသမီး ၁ ဦး ထိခိုက်ဒဏ်ရာရရှိခဲ့ကြောင်း CNDF ပြောရေးဆိုခွင့်ရှိသူထံမှ သိရသည်။
ယနေ့ အောက်တိုဘာလ ၂၅ ရက် မနက် ၉ နာရီခန့်တွင် ဖလမ်းမြို့ပေါ် အထက – ၁ တွင် တပ်စွဲရန်အတွက် ခလရ – ၂၆၈ မှ စစ်ကြောင်းထိုးလာသည့် စစ်ကောင်စီတပ်နှင့် CNDF ၊ ချင်းပူးပေါင်းတပ်တို့ ၂ နာရီကျော်ကြာ ထိတွေ့တိုက်ပွဲဖြစ်ပွားခဲ့ခြင်းဖြစ်ကြောင်း သိရသည်။
“နှစ်ဖက်ထိတွေ့မှုရှိတယ်။ အချိန်ကတော့ ၂ နာရီ၊ ၃ နာရီဝန်းကျင်ကြာတယ်။ ကျနော်တို့ဘက်က ဘာမှ ထိခိုက်မှုမရှိပါဘူး။ တိုက်ပွဲဖြစ်တဲ့အချိန်မှာ မိုးက အတော်အုပ်ဆိုင်းနေတော့ သူတို့ဘက်က အခြေအနေကိုက စုံစမ်းဆဲပါပဲ။ ပြည်သူဘက်က သက်လတ်ပိုင်းအမျိုးသမီး ၁ ယောက်တော့ ဒဏ်ရာရတယ်လို့ ကြားတယ်။ ထိတွေ့မှုကြောင့် ကျည်ဆန်ထိတာပေါ့လေ” ဟု CNDF ပြောရေးဆိုခွင့်ရှိသူ ဆလိုင်းတင်မီက ပြောသည်။
တိုက်ပွဲဖြစ်ပွားပြီးနောက် လက်ရှိစစ်ရေးအခြေအနေမှာ ပြန်လည်ငြိမ်သွားပြီး အထက – ၁ တွင် တပ်စွဲရန်လာသော စစ်ကောင်စီ တပ်သည် ခြေကုတ်မယူနိုင်ခဲ့ကြောင်း သိရသည်။
လက်ရှိတွင် ဖလမ်းမြို့သိမ်းစစ်ဆင်ရေးကို ပြင်ဆင်ဆောင်ရွက်နေသည့်ကာလဖြစ်သောကြောင့် ဖလမ်းမြို့ပေါ်တွင် ထိတွေ့တိုက်ပွများ မကြာခဏဖြစ်ပွားနေကြောင်း ဆလိုင်းတင်မီက ပြောသည်။
စစ်ကောင်စီတပ်သည် ဖလမ်းမြို့ပေါ်တွင် ခလရ – ၂၆၈ တပ်ကုန်းတွင်သာမက မြို့ပေါ်ကနေရာများတွင် တပ်ဖွဲ့ဝင် ၂၀ ခန့်၊ ၃၀ ခန့်တွင် တပ်စွဲနေရာယူ၊ ဖြန့်ကျက်ထားမှုများ ပိုမိုပြုလုပ်လာနေကြောင်း ဆလိုင်းတင်မီက ပြောသည်။
