(006SV)
ချင်းပြည်နယ်၊ ပလက်ဝမြို့နယ်၊ မီးဇာကျေးရွာနှင့် အနီးဝန်းကျင်ကို အာဏာသိမ်းစစ်တပ်က ဂျက်ဖိုက်တာအုပ်စုဖြင့် ဗုံးကြဲ တိုက်ခိုက်သွားသည်ဟု ဒေသခံတချို့ထံမှ သိရသည်။
ဩဂုတ်လ ၂၆ ရက် ညနေ ၄ နာရီကျော်ခန့်က ပလက်ဝမြို့နယ်၊ ကုလာတန်မြစ်ကမ်းဘေးရှိ မီးဇာ ကျေးရွာနှင့် အနီးဝန်းကျင်ကို ဂျက်ဖိုက်တာ ၅ စီးဖြင့် အုပ်စုလိုက် ဗုံးကြဲတိုက်ခိုက်သွားသည်ဟု သိရသည်။
“လောလောဆယ် ကြားသိရတာက အရပ်သားပြည်သူ အထိအခိုက်မရှိဘူးဆိုတာရယ်၊ ဗုံးကြဲတဲ့ နေရာလည်း AA ဂိတ်နဲ့ ဗျုဟာကုန်းလို့ သိရတယ်၊၊ ရွာနဲ့ နဲနဲဝေးတယ်၊၊ ဒါပေမဲ့ ဗုံးအပိုင်းအစတွေက ရွာထဲရောက်နိုင်တဲ့ အနေအထားပါ” ဟု ပလက်ဝဒေသခံတစ်ဦးက ပြောသည်။
စစ်တပ်က ဂျက်ဖိုက်တာများဖြင့် လေကြောင်းတိုက်ခိုက်မှု ပြုလုပ်ပြီးနောက် Y – 12 လေယာဉ် ၂ စီးဖြင့်လည်း ပျံဝဲနေမှုများ ပြုလုပ်ခဲ့သည်ဟု သိရသည်။
ပလက်ဝမြို့နယ်အခြေစိုက် သတင်းဌာနတချို့တွင် မီးဇာကျေးရွာအနီးကို ဂျက်ဖိုက်တာ အုပ်စုဖြင့် ဗုံးကြဲတိုက်ခိုက်မှုကြောင့် လူသေဆုံး ထိခိုက်မှုနှင့် အပျက်အစီးများ ရှိနေသည်ဟု ရေးသားကြသော်လည်း ခိုနူမ်းသုန်သတင်းအနေဖြင့် သီးခြားအတည်ပြုနိုင်ခြင်း မရှိသေးပါ။
မီးဇာကျေးရွာနှင့် အနီးဝန်းကျင်ကို ဂျက်ဖိုက်တာ ၅ စီးဖြင့် ဗုံးအလုံး ၅၀ ခန့် ကြဲချတိုက်ခိုက်ခဲ့ရာ မီးဇာရွာမှ အိမ်ပေါ်ကို ဗုံးကျ၍ သားအမိ ၂ ဦး သေဆုံးပြီး ၆ ဦးထက်မနည်း ထိခိုက်ဒဏ်ရာ ရရှိသည်ဟု ဒေသခံအခြေစိုက် ULA/ AA နှင့် နီးစပ်သော Paletwa Times က ရေးသားသည်။
မီးဇာရွာနှင့် အနီးဝန်းကျင်ကို စစ်တပ်က အုပ်စုဖွဲ့ လေကြောင်းတိုက်ခိုက်မှုနှင့်ပတ်သက်၍ ခိုနူမ်းသုန်သတင်းအနေဖြင့် ထပ်မံ စုံစမ်းနေဆဲဖြစ်သည်။
ဩဂုတ်လ ၂၅ ရက် ရွှေလိုက်ဝကျေးရွာရှိ MDF ၏ စစ်သင်တန်းကျောင်းကို စစ်တပ်က လေကြောင်းတိုက်ခိုက်မှု ပြုလုပ်ခဲ့ရာ MTC/ MDF တပ်ဖွဲ့ဝင် ၁ ဦး၊ CNDF တပ်ဖွဲ့ဝင် ၂ ဦး၊ PDF – Zoland တပ်ဖွဲ့ဝင် ၂ ဦး စုစုပေါင်း ၅ ဦး ကျဆုံးပြီး ၇ ဦးထက်မနည်း ပြင်းထန်စွာ ဒဏ်ရာ ရရှိသည်ဟု သိရသည်။
လတ်တလောတွင် စစ်တပ်သည် ပလက်ဝမြို့နယ်အတွင်း ပလက်ဝမြို့၊ ဆမီးမြို့အပါအဝင် ကျေးရွာများကို လေကြောင်းတိုက်ခိုက်မှုများ ပိုမိုပြုလုပ်လာသည့်အတွက် ကလေးငယ်များအပါအဝင် ဒေသခံပြည်သူများ သေဆုံးမှု မြှင့်တက်လာနေသည်ဟု သိရသည်။
