(006SV)
ချင်းပြည်နယ်၊ ဟားခါးမြို့နယ်အတွင်း CDF – ဟားခါးမှ ဖမ်းဆီးရမိသော မူးယစ်ဆေးဝါးများသည် မိမိတို့အဖွဲ့အစည်း နှင့် ပတ်သက်မှု မရှိဘဲ ယင်းဖြစ်စဉ်ကို စုံစမ်းစစ်ဆေးရေး လုပ်ငန်းစဉ်များ စတင်ဆောင်ရွက်နေကြောင်း ယင်းမာပင် ခရိုင်အမှတ် ၁၅ တပ်ရင်းက ထုတ်ပြန်သည်။
ဇူလိုင်လ ၈ ရက်က CDF – ဟားခါးမှ မူးယစ်ဆေးဝါးနှင့်အတူ ဖမ်းဆီးရမိသော ယင်းမာပင်ခရိုင်တပ်ရင်း ၁၄နှင့် ၁၅ မှ ရဲဘော်များကို မိမိတို့ အဖွဲ့အစည်းမှ အပြည့်အဝ တာဝန်ယူဖြေရှင်းပေးသွားမည်ဟု ယနေ့ ဇူလိုင်လ ၁၀ ရက်မှာ ယင်းမာပင်ခရိုင်အမှတ် ၁၅ တပ်ရင်းက ထုတ်ပြန်သည်။
ဟားခါးမြို့နယ်အတွင်း ယင်းမာပင်ခရိုင်အမှတ် ၁၅ တပ်ရင်းမှူး ထောက်ခံစာဖြင့် တော်လှန်ရေးရဲဘော် ၃ ဦး၊ ကား သမား ၂ ဦးတို့သည် စိတ်ကြွဆေးပြား ၃ သန်းခန့်နှင့် ဘိန်းဖြူ ကီလို ၁၀၀ ကျော်ကို ကား ၂စီး၊ မောင်းပြန်သေနတ် ၂ လက်၊ Mini Starlink ၂ ခုတို့ဖြင့် ဖမ်းဆီးရမိကြောင်း CDF – Hakha Central Council က ယနေ့မှာ ထုတ်ပြန်သည်။
အထက်ပါဖြစ်စဉ်သည် တပ်ရင်း ၁၅ မှ တပ်ရင်းမှူး ဖိုးသောင်းက ၎င်း၏ လက်မှတ်ဖြင့် ရဲဘော် ၄ ဦး၊ သေနတ် ၂ လက်၊ ကား ၂စီးဖြင့် ဖောက်ခွဲရေးယမ်းများ သယ်ယူရန် ထောက်ခံစာ ပေးအပ်ခဲ့သည်မှာ မှန်ကန်ခြင်းရှိပါသည်ဟု ယင်းမာပင်ခရိုင် အမှတ် ၁၅ တပ်ရင်းက အသိပေးထုတ်ပြန်လာသည်။
သို့သော် မူးယစ်ဆေးဝါး ယူဆောင်ခဲ့ကြသည်မှာ ရဲဘော်များ၏ ပုဂ္ဂလိက လုပ်ရပ်သာဖြစ်ပြီး အဖွဲ့အစည်းနှင့် စိုးစဉ်းမျှ ပတ်သက်မှု မရှိမကြောင်း ယင်းမာပင်ခရိုင် အမှတ် ၁၅ တပ်ရင်းက ထုတ်ပြန်သည်။
ယင်းဖြစ်စဉ်ကို စုံစမ်းစစ်ဆေးရေးလုပ်ငန်းစဉ်များလည်း စတင်ဆောင်ရွက်နေပြီး ထွက်ပြေးလွတ်မြောက်နေသော ရဲဘော် ကိုဇော်လတ် (အမည်ရင်း ဝင်းမော်)၊ ကိုပုတီး (အမည်ရင်း ကျော်မင်းဇော်) တို့ကို လိုက်လံ ဖမ်းဆီးကာ ထိရောက်သော ပြစ်ဒဏ်ပေးအပ်မည်ဟု သိရသည်။
NUG အစိုးရ၊ ကာကွယ်ရေးဝန်ကြီးဌာန၏ စစ်ဆေးမှုများကိုလည်း ကျေနပ်စွာ ခံယူမည်ဖြစ်ပြီး လွတ်မြောက်နေသူ ၂ ဦးကို လိုက်လံဖမ်းဆီးကာ ကာကွယ်ရေးဝန်ကြီးဌာနထံ အပ်နှံပေးမည်ဟု သိရသည်။
အဖွဲ့အစည်းနာမည် အသုံးချကာ ကျူးလွန်သော ဒုစရိုက်မှုများကို မိမိတို့အဖွဲ့အစည်းအနေဖြင့် လက်မခံကြောင်း၊ နောက်နောင် ယင်းကဲ့သို့ ဖြစ်ရပ်များ ထပ်မံ ဖြစ်ပွားခြင်း မရှိစေရန် လုပ်ဆောင်သွားမည်ဟု ယင်းမာပင်ခရိုင်တပ်ရင်း ၁၅ က ထုတ်ပြန်သည်။
စစ်ကိုင်းတိုင်း၊ ယင်းမာပင်ခရိုင် တပ်ရင်း ၁၄ မှ ရဲဘော် ကိုဇော်နောင်ကမူ ၎င်းတို့ တပ်ခွဲမှူး ကိုပုတီးထံမှ သယ်လာခြင်း ဖြစ်ပြီး ချင်းပြည်နယ်ကို ဖြတ်၍ မူးယစ်ဆေးဝါး သယ်ဆောင်ခြင်းသည် ၄ ခေါက်မြောက်ဖြစ်သည်ဟု ပြောဆိုထားသည်။
မူးယစ်ဆေးဝါးများကို စလင်းကြီးမြို့နယ်၊ ငွေသာရွာအနားက သယ်ဆောင်လာခြင်းဖြစ်သည်ဟု ဖမ်းဆီးခံရသူများက ပြောသည်။ ဖမ်းဆီးရမိသူများကို တရားဥပဒေအတိုင်း အရေးယူဆောင်ရွက်သွားမည်ဟု CDF – Hakha Central Council ထံမှ သိရသည်။
