(006SV)
ချင်းတော်လှန်ရေးတပ်ဖွဲ့ CDF- KKG ထိန်းချုပ်နယ်မြေက ကျေးရွာတချို့မှ ပြည်သူ့ကျောင်းများတွင် ဆရာ၊ ဆရာမ လိုအပ်ချက်ကြောင့် CDF- KKG၊ တပ်ရင်း ၄ မှ ရဲဘော်များက ကူညီ၍ ပညာသင်ကြားပေးနေကြောင်း သတင်းရရှိသည်။
“ခုချိန်က ကျောင်းသား/သူ လူဦးရေလည်း တိုးလာတယ်။ ဆရာ/မ အင်အားကလည်း မမျှဘူး။ ဆရာ/မ လိုအပ်ချက်ကလည်း ရှိသေးတယ်။ CDF KKG အနေနဲ့လည်း တပ်ရင်း ၄ နယ်မြေဖြစ်တဲ့အတွက် လုပ်ပေးနိုင်တဲ့အတိုင်းအတာ ဝိုင်းကူတယ်။ တခြား အစီအစဉ်တွေလည်း လုပ်ပေးနေတယ်” ဟု CDF – KKG ၊ သတင်းနှင့် ပြန်ကြားရေးဌာနမှ တာဝန်ရှိသူက ပြောသည်။
ချင်းကာကွယ်ရေးတပ်ဖွဲ့ – ကလေး၊ ကဘော်၊ ဂန့်ဂေါ ၏ တပ်ရင်း ၄ နယ်မြေအတွင်းက ကျေးရွာတွင် မူလတန်းမှ ၉ တန်းအထိ ကျောင်းသူ၊ ကျောင်းသား ၁၀၀ ကျော်သည် လက်ရှိတွင် ပညာသင်ကြားလျက်ရှိပြီး ပညာရေးဌာန CDM အပါအဝင် ကျောင်းဆရာ၊ ဆရာမ ၈ ဦးက စာသင်ကြားပေးနေခြင်းဖြစ်သည်။
ဆရာ၊ ဆရာမအင်အားနှင့် ကျောင်းသူ၊ ကျောင်းသားအချိုး မမျှတ၍ ကျေးရွာရပ်မိ/ရပ်ဖများ၏ တောင်းဆိုမှုကြောင်း CDF- KKG မှ ရဲဘော် ၂ ဦးကို စေတနာဝန်ထမ်းအဖြစ် စေလွှတ်၍ စာသင်ကြားပေးနေခြင်းဖြစ်ကြောင်း သိရသည်။
CDF- KKG မှ ရဲဘော် ဆရာ ၂ ဦးတွင် တစ်ဦးမှာ ဘွဲ့ရဖြစ်ပြီး နောက်တစ်ဦးမှာ ပညာရေးတက္ကသိုလ် တက်ရောက်နေဆဲတွင် လက်နက်ကိုင်တော်လှန်ရေးထဲ ပါဝင်ခဲ့သူဖြစ်ကြောင်း သိရသည်။
တပ်ရင်း – ၄ နယ်မြေက ကျောင်းများတွင် ယခင်က ကျောင်းသူ၊ ကျောင်းသား အနည်းငယ်သာရှိ၍ ပညာရေးကဏ္ဍတွင် အဆင်ပြေခဲ့သော်လည်း လက်ရှိတွင် ပျူစောထီးရွာများမှ ထွက်ပြေးလာသူများ၏ ကလေးငယ်များ၊ စစ်ဘေးရှောင်ပြည်သူများ၏ ကလေးငယ်များသည် ကျောင်းသူ၊ ကျောင်းသားများအဖြစ် ထပ်မံတိုးလာကြောင်း သိရသည်။
ယင်းပြည်သူ့ကျောင်းများတွင် ဒေသအတွင်းက ကျေးရွာ ၅ ရွာမှ ကျောင်းသူ၊ ကျောင်းသားများလည်း ပညာသင်ကြားနေကြသည်။
“အကူအညီတွေ အရမ်းလိုအပ်တယ်ဆိုတဲ့အကြောင်း ဖြည့်စွက်ပြောကြားချင်တယ်။ မိဘပြည်သူက တတ်နိုင်တဲ့ဘက်က ကူညီပေးဖို့၊ ပညာရေးဆိုတာက ကျနော်တို့ ကလေးတွေအတွက် အရမ်းအရေးကြီးနေပါတယ်။ ကလေးတွေကို ပညာရေးနဲ့ မဝေးစေချင်ဘူး။ မိဘတွေကလည်း သူတို့ကလေးတွေကို ပညာတတ်စေချင်ကြတယ်။ ကျနော်တို့မှာကလည်း ခေတ်အခြေအနေ အရ လိုအပ်ချက်တွေ အများကြီး ရှိနေတယ်။ ဒါတွေကို မပံ့ပိုးနိုင်လို့ ကလေးတွေ ကျောင်းမတက်ရမှာကို အရမ်းစိုးရိမ်ပါတယ်” ဟု CDF – KKG ၊ သတင်းနှင့် ပြန်ကြားရေးဌာနမှ တာဝန်ရှိသူက ပြောသည်။
ယင်းကျောင်းသူ၊ ကျောင်းသားများအတွက် တိုးချဲ့ဆောင်များ ဆောက်လုပ်ရန် လိုအပ်နေပြီး ယင်းမှာ တာဝန်ရှိသူများအတွက် ကြီးမားသော စိန်ခေါ်မှု အခက်အခဲဖြစ်နေကြောင်း သိရသည်။
ကျောင်းသုံးပစ္စည်းများဖြစ်သည့် ပုံနှိပ်စာအုပ်များ၊ စာရေးကိရိယာများ၊ ဗလာစာအုပ်များလည်း လိုအပ်နေပြီး ပျူစောထီးရွာမှ ပြေးလာသူနှင့် စစ်ဘေးရှောင်များ၏ ကျောင်းသား၊ ကျောင်းသူများမှာ ပိုမိုခက်ခဲနေ၍ အကူအညီများ အရေးပေါ် လိုအပ်နေကြောင်း သိရသည်။
