(006SV)
စစ်ကော်မရှင်က ဦးဆောင်ကျင်းပပေးမည့် ရွေးကောက်ပွဲတွင် NLD အစိုးရခေတ်က ချင်းပြည်နယ်ဝန်ကြီးများဖြစ်သော ဦးစိုးထက် နှင့် ဦးပေါင်လွန်းမင် ထန်နှင့် လူသိများသော ချင်းနိုင်ငံရေးသမား ပူးနိုးထန်ကပ်တို့ ဝင်ရောက်ယှဉ်ပြိုင်ကြမည်ဟု သိရသည်။
ဒီဇင်ဘာလ ၂၈ ရက်တွင် ကျင်းပမည့် ရွေးကောက်ပွဲတွင် ချင်းပြည်နယ်မှ ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းစာရင်းများကို ဟားခါးခရိုင်ကော်မရှင်အဖွဲ့ခွဲ ဥက္ကဌကအတည်ပြုပြီး ယမန့်နေက လူမှုကွန်ယက်ပေါ် ထွက်ပေါ်လာမှုအရ သိရသည်။
ချင်းလူထုအသိုင်းအဝန်းကြား လူသိများသော ချင်းနိုင်ငံရေးသမား ပူနိုးထန်ကပ်သည် ချင်းပြည်သစ်ကွန်ဂရက်ပါတီမှ ချင်းပြည်နယ် အမျိုးသား လွှတ်တော် (အချိုးကျ ကိုယ်စားပြုစနစ်) မဲဆန္ဒနယ်မြေအတွက် ဝင်ရောက်ယှဉ်ပြိုင်မည်ဟု ခိုနူမ်းသုန်သတင်းဌာနကို အတည်ပြုဖြေကြားထားပြီး လက်ရှိတွင် ရွေးကောက်ပွဲကော်မရှင်၏ အတည်ပြုမှုသာ လိုတော့သည်ဟု ပြောသည်။
ချင်းအပါအဝင် နိုင်ငံတဝန်းတွင် ပြည်သူများကို နည်းမျိုးစုံဖြင့်သတ်ဖြတ်မှု ကျူးလွန်နေသော အာဏာသိမ်း စစ်တပ်က ကျင်းပမည့် ရွေးကောက်ပွဲဝင် ထင်းရှားသော ချင်းနိုင်ငံရေးသမားများ ပါဝင်ယှဉ်ပြိုင်မှုသည် ၎င်းတို့၏ နိုင်ငံရေး ရွေးချယ်မှုသာဖြစ်သည်ဟု ချင်းနိုင်ငံရေးအသိုင်းအဝိုင်းက ပြောသည်။
“ဒါကတော့ သူတို့ရဲ့ နိုင်ငံရေး ရွေးချယ်မှုပေါ့လေး၊ နိုင်ငံရေးနည်းလမ်းမှာက ဆန္ဒဖော်ထုတ်တာလည်း နိုင်ငံရေး နည်းလမ်းပဲ၊ ပါတီ တည်ထောင်တာလည်း နိုင်ငံရေး နည်းလမ်းပဲ။ ဒီနည်းလမ်းတွေ အများကြီး ရှိတဲ့ အထဲက နည်းလမ်းတစ်ခုကို ရွေးတယ်လို့ မြင်ပါ တယ်။ ဒါက သူတို့ ကိုယ်ယုံကြည်ရာ နည်းလမ်းတစ်ခုကို ရွေးချယ်လိုက်တာပါပဲ။ ဒါက ကိုယ်ပိုင်လွတ်လွတ်လပ်လပ် ရွေးချယ်ခွင့်ရှိ ပါတယ်” ဟု ဖက်ဒရယ်ရေး လေ့လာသုံးသပ်သူ ချင်းနိုင်ငံရေးသမား ဆလိုင်းရှိန်းထွန်းက ပြောသည်။
ပူနိုးထန်ကပ်နှင့် ဝန်ကြီးဟောင်း ဦးစိုးထက်သည် ချင်းပြည်သစ်ကွန်ဂရက်ပါတီကို တည်ထောင်ရာတွင် ဦးဆောင်သူများဖြစ်ပြီး ၎င်းတို့သည် ချင်းပြည်နယ် အမျိုးသား လွှတ်တော် (အချိုးကျ ကိုယ်စားပြုစနစ်) မဲဆန္ဒနယ်မြေအတွက် ဝင်ရောက်ယှဉ်ပြိုင်မည်ဟု သိရသည်။
ပူးနိုင်းထန်ကပ်သည် ချင်းအမျိုးသား ဒီမိုကရေစီအဖွဲ့ချုပ်တွင် ဥက္ကဌအဖြစ် တာဝန်ယူဖူးသူဖြစ်ပြီး ဦးစိုးထက်သည် NLD အစိုးရ လက်ထက်က ချင်းပြည်နယ် စက်မှု၊ လက်မှုနှင့် စည်ပင်ဝန်ကြီးဖြစ်ကြောင်း၊ လက်ရှိတွင် ချင်းပြည်သစ် ကွန်ဂရက်ပါတီ၏ ဥက္ကဌဖြစ်သည်ဟု သိရသည်။
NLD အစိုးရလက်ထက်တွင် လူမှုရေးဝန်ကြီးဖြစ်ခဲ့သော ဦးပေါင်လွန်းမင်ထန်သည် လာမည့်ရွေးကောက်ပွဲတွင် ဇိုမီးအမျိုး သားပါတီမှ ချင်းပြည်နယ် အမျိုးသားလွှတ်တော် မဲဆန္ဒနယ်အမှတ် ၁ မှာ ဝင်ရောက်ယှဉ်ပြိုင်မည်ဟု သိရသည်။
ဦးပေါင်လွန်းမင်ထန်သည် အာဏာသိမ်းစစ်တပ်နှင့် နီးစပ်မှု ရှိနေသော ဇိုမီးတော်လှန်ရေးတပ်ဖွဲ့ ZRA – EC အဖွဲ့တွင် ဦးဆောင်သူတစ်ဦးဖြစ်သည်ဟု ချင်းအင်အားစု အသိုင်းအဝိုင်းထံမှ သိရသည်။
၂၀၂၅ နှင့် ၂၀၂၀ ရွေးကောက်ပွဲများတွင် ZCD ပါတီက အနိုင်ရရှိခဲ့သော လွှတ်တော်ကိုယ်စားလှယ်ဟောင်း ဒေါ်ကျိန်ငိုက်မန်းသည် လက်ရှိ ရွေးကောက်ပွဲတွင် ဇိုမီးအမျိုးသားပါတီကိုယ်စားပြု၍အနေဖြင့် ချင်းပြည်နယ် အမျိုးသားလွှတ်တော် (အချိုးကျ ကိုယ်စားပြု စနစ်) မဲဆန္ဒနယ်က ဝင်ပြိုင်မည်ဟု သိရသည်။
စစ်ကော်မရှင်၏ ချင်းပြည်နယ်ရွေးကောက်ပွဲ ကော်မရှင်သည် ချင်းပြည်နယ် လွှတ်တော်ကိုယ်စားလှယ်လောင်းများ၊ ပြည်သူ့လွတ် တော်နှင့် အမျိုးသားလွှတ်တော်ကိုယ်စားလှယ်လောင်းများ၏ အမည်စာရင်းများကို အတည်ပြုထားပြီးဖြစ်ကြောင်း သိရသည်။
စစ်ကော်မရှင် ကျင်းပမည့် ရွေးကောက်ပွဲအပိုင်း ၁ တွင် ချင်းပြည်နယ်မှာ ချင်းပြည်သစ်ကွန်ဂရက်ပါတီ၊ ဇိုမီးအမျိုးသားပါတီ၊ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ ပြည်သူ့ရှေ့ဆောင်ပါတီတို့ ဝင်ရောက်ယှဉ်ပြိုင်မည်ဟု သိရသည်။
