(006SV)
အမျိုးသားညီညွတ်ရေးအစိုးရ (NUG) ပညာရေးဝန်ကြီး ဦးဆောင်သောအဖွဲ့နှင့် ချင်းပြည်အစိုးရ၏ ဝန်ကြီးချုပ်ဦးဆောင်သည့် အဖွဲ့တို့ကြား ပညာရေးလုပ်ငန်းများ ပူးပေါင်းဆောင်ရွက်သွားရန် တွေ့ဆုံဆွေးနွေးသဘာတူခဲ့ကြောင်း သိရသည်။
အောက်တိုဘာလ ၈ ရက် အမျိုးသားညီညွတ်ရေးအစိုးရ၊ ပညာရေးဝန်ကြီးဌာနနှင့် ချင်းပြည်အစိုးရ၊ ပညာရေးဝန်ကြီးဌာနတို့ ပညားရေးလုပ်ငန်းများ ပူးပေါင်းဆောင်ရွက်နိုင်ရန် ညှိနှိုးအစည်းအဝေးတခု ပြုလုပ်ခဲ့ကြောင်း ချင်းပြည်ကောင်စီ၊ ချင်းပြည်အစိုးရ၊ ပညာရေးဝန်ကြီးဌာနက ထုတ်ပြန်သည်။
ဖက်ဒရယ်ဒီမိုကရေစီစနစ် ကိုယ်ပိုင်ပြဌာန်းခွင့်အရ ချင်းပြည် ဖက်ဒရယ်ဒီမိုကရေစီ ပညာရေးစနစ် အကောင်အထည်ပေါ်လာနိုင်စေရန်နှင့် အခြေခံပညာပြီးဆုံးကြောင်း စစ်ဆေးအကဲဖြတ်ခြင်း (BECA)၊ ဆရာအတတ်ပညာကဏ္ဍ၊ အဆင့်မြင့်ပညာကဏ္ဍနှင့် သက်မွေးပညာကဏ္ဍတို့ ပူးပေါင်းဆောင်ရွက်သွားရန် သဘောတူညီခဲ့ကြကြောင်း သိရသည်။
ဖက်ဒရယ်ဒီမိုကရေစီပညာရေစနစ်ကို ပူးပေါင်းအကောင်အထည်ဖော် ဆောင်ရွက်သွားမည်ဖြစ်ကြောင်း ချင်းပညာရေးဝန်ကြီးဌာနထံမှ သိရသည်။
အစည်းအဝေးကို NUG အစိုးရ၊ ပညာရေးနှင့် ကျန်းမာရေးဝန်ကြီးဌာန ဝန်ကြီး ဒေါက်တာဇော်ဝေစိုး၊ ပညာရေးဝန်ကြီးဌာန ဒုတိယဝန်ကြီး ဒေါ်ဂျာထွယ်ပန်း၊ အခြေခံပညာကဏ္ဍ တာဝန်ရှိသူများ၊ အဆင့်မြင့်ပညာကဏ္ဍ တာဝန်ရှိသူများ၊ သက်မွေးပညာကဏ္ဍ တာဝန်ရှိသူများ၊ ဆရာအတတ်ပညာကဏ္ဍ တာဝန်ရှိသူများ တက်ရောက်ခဲ့သည်။
ချင်းပြည်အစိုးရအဖွဲ့မှ ဝန်ကြီးချုပ် ဦးပါထန်း၊ ကျန်းမာရေးနှင့် အားကစာဝန်ကြီးဌာန ဝန်ကြီး ဒေါက်တာရှရွန်ပါရ်၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဝန်ကြီး ဆလိုင်းဂျိုးဇက်လားလ်ရမ်လောင်မ်မာ၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန ဝန်ကြီး ဦးမောင်ဦး၊ လူသားချင်စာနာထောက်ထားရေးနှင့် ပြန်လည်ထူထောင်ရေး ဝန်ကြီးဌာန ဝန်ကြီး ဆလိုင်းမနားကီး၊ ပညာရေးဝန်ကြီးဌာန ဝန်ကြီး ဆလိုင်းရောစ့်ထန်၊ အခြေခံပညာကဏ္ဍ တာဝန်ရှိသူများ၊ အဆင့်မြင့်ပညာကဏ္ဍ တာဝန်ရှိသူများ၊ သက်မွေးပညာကဏ္ဍ တာဝန်ရှိသူများ၊ ဆရာအတတ်ပညာကဏ္ဍ တာဝန်ရှိသူများနှင့် မြို့နယ်/ဒေသ ပညာရေးခေါင်းဆောင်များ တက်ရောက်ခဲ့ကြသည်။
ပညာရေးဗျူရိုကရေစီယန္တရား စနစ်တကျ လည်ပတ်နိုင်ရန် လိုအပ်သည့် ပညာရေးခေါင်းဆောင်မှုနှင့် စီမံခန့်ခွဲမှုဆိုင်ရာ အလုပ်ရုံးဆွေးနွေးပွဲများကိုလည်း ကျင်းပလျက်ရှိပြီး လိုအပ်သော မူဝါဒနှင့် လုပ်ထုံးလုပ်နည်းများကို ဆက်လက်ရေးဆွဲ ပြဌာန်းသွားမည်ဖြစ်ကြောင်း ချင်းပညာရေးဝန်ကြီးဌာနက ထုတ်ပြန်ထားသည်။
