(006SV)
ချင်းပြည်နယ်၊ ပလက်ဝမြို့နယ်၊ စိမ်းစင်းကျေးရွာတွင် ဒေသခံချင်းအမျိုးသမီးတဦးကို ULA/AA တပ်ဖွဲ့ဝင် ၂ဦးက မုဒိမ်းကျင့်၍ သတ်ဖြတ်ရန် ကြိုးပမ်းမှု ဖြစ်ပေါ်ပြီးနောက် ULA/AA အနေဖြင့် နောက်နောင်တွင် ချင်းပြည်သူများအပေါ် လူမဆန်သော အကြမ်းဖက်မှုများ မပြုလုပ်ရန် ပြင်းထန်စွာ သတိပေးကြောင်း ချင်းပြည်အစိုးရက ထုတ်ပြန်သည်။
ချင်းပြည်နယ်၊ ပလက်ဝကောင်စီနယ်မြေ၊ စိမ်းစင်းကျေးရွာတွင် ဧပြီလ ၅ ရက်က အာရက္ခတပ်တော် ULA/AA တပ်ဖွဲ့ဝင် ၂ ဦးသည် ချင်းအမျိုးသမီး ၁ ဦးကို ရည်ရွယ်ချက် ရှိရှိ အတင်းအဓမ္မပြုကျင့်မှုအပေါ် ချင်းပြည်အစိုးရ၊ အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာမှ ပြင်းထန်စွာ ရှုတ်ချသည်ဟု ယနေ့ မေလ ၂ ရက်နေ့တွင် ထုတ်ပြန်သည်။
ယခုကဲ့သို့ ချင်းအမျိုးသမီး ၁ ဦးအပေါ် အဓမ္မပြုကျင့်ခြင်းသည် တိုင်းရင်းသား အချင်းချင်းကြား စိတ်ဝမ်းကွဲမှုနှင့် လူမျိုးရေး မုန်းတီးမှုကို ဖြစ်ပေါ်စေနိုင်သည်ဟု အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာနက ဆိုသည်။
ပြစ်မှုကျူးလွန်သည့် ULA/AA တပ်ဖွဲ့ဝင် ၂ ဦးကို ထိုက်သင့်သော ပြစ်ဒဏ်ပေးရန် ပွင့်လင်းမြင်သာမှု ရှိစွာ တရားစီရင်ခြင်း၊ ကျူးလွန်ခံရသူအတွက် စိတ်ပိုင်းနှင့် ရုပ်ပိုင်းဆိုင်ရာ ကျန်းမာရေး စောင့်ရှောက်မှု ပေးခြင်း၊ လုံခြုံမှုနှင့် ဥပဒေအကာအကွယ် ဆောင်ရွက်မှု ပေးခြင်း၊ လိုအပ်သော အကူအညီ ပံ့ပိုးပေးခြင်းများ ဆောင်ရွက်ရန် ချင်းအစိုးရ၊ ဝန်ကြီးဌာနက တောင်း ဆိုထားသည်။
ULA/AA အနေဖြင့် နောက်နောင် ယခုကဲ့သို့ ချင်းပြည်သူများ အပေါ် လူမဆန်သည့် အကြမ်းဖက်မှုများ လုံးဝ (လုံးဝ) မပြုလုပ်ရန် ပြင်းထန်စွာ သတိပေးထုတ်ပြန်ကြောင်း ချင်းပြည်အစိုးရအဖွဲ့၊ အမျိုးသမီး၊ လူငယ်နှင့် ကလေးသူငယ်ရေးရာ ဝန်ကြီးဌာနက ဆိုသည်။
ULA/ AA သည် စစ်အာဏာရှင် တော်လှန်ရေးကို အကြောင်းပြပြီး ချင်းပြည်အတွင်းရှိ ပလက်ဝ ဒေသတွင် ဒေသခံပြည်သူများ၏ သဘောတူညီမှု မရှိဘဲ တပ်စခန်းများ ချခြင်း၊ စစ်ရေးဖော်ဆောင်ခြင်းများ ပြုလုပ်သောကြောင့် ပြည်သူများ ဒုက္ခရောက်ရ သည့်အပြင် အကြမ်းဖက်ခြင်း၊ ဖမ်းဆီးနှိပ်စက်ခြင်း၊ ပြည်သူလူထု၏ အသက်အိုးအိမ်များကို မကြာခဏ ခြိမ်းခြောက်နေသည်ဟု ထုတ်ပြန်ချက်တွင် ဖော်ပြထားသည်။
ဧပြီလ ၅ ရက်က ဖြစ်ပွားခဲ့သော ပလက်ဝမြို့နယ်၊ စိမ်းစင်းကျေးရွာမှ ဒေသခံအမျိုးသမီးအမှု ဖြစ်စဉ်သည် လက်ရှိ မေလ ၂ ရက်တွင် တစ်လနီးပါး ရှိလာချိန်တွင် ချင်းပြည်အစိုးရ၏ ဝန်ကြီးဌာနဘက်မှ ထုတ်ပြန်လာခြင်းဖြစ်သည်။
ပြစ်မှုကျူးလွန်သူ ၂ ဦးကို ဖြစ်ပွားသော နေ့ကပင် ဖမ်းဆီးထိန်းသိမ်းထားပြီး ယင်းအမှုကို စုံစမ်းစစ်ဆေးမှုများ ဆောင်ရွက်နေကြောင်း၊ တရားမျှတမှု ရရှိရေးအတွက် ပြစ်မှု ပြစ်ဒဏ် မျှတအောင် ပြင်းပြင်းထန်ထန် အရေးယူဆောင်ရွက်သွားမည်ဟု အာရက္ခတပ်တော် ULA/ AA ပြောရေးဆိုခွင့်ရှိသူ ဦးခိုင်သုခက ရခိုင်ဒေသတွင်း သတင်းဌာနတချို့ကို ဖြေကြားထားသည်။
