(006SV)
မလေးရှားနိုင်ငံမှ ချင်းဒုက္ခသည်များသည် ဒုက္ခသည်များအဖြစ် ရပ်ဆဲခြင်းကာလအတွင်း UNHCR ကတ်များ အသိမ်းခံ ရပြီးနောက် ယနေ့အထိ ကတ်ပြန်လည်ရရှိခြင်း မရှိသူများအနေဖြင့် ဇူလိုင်လ ၃၁ ရက်နောက်ဆုံးထား၍ ICC အဖွဲ့ဝင် ချင်းအဖွဲ့အစည်းတစ်ခုထံတွင် အမည်စာရင်း ပြန်လည်ပေးအပ်ကြရန် ကြေညာထားသည်။
၂၀၁၇၊ ၂၀၁၈၊ ၂၀၁၉ ခုနှစ်များ၏ UNHCR ချင်းဒုက္ခသည်များ ဒုက္ခသည်အဖြစ်မှ ရပ်ဆဲခြင်းကာလ (Chin Cessation policy) အတွင်း UNHCR ကတ် မတရားအသိမ်းခံရပြီးနောက် ကတ်ပြန်ပေးရန် မိမိတို့အဖွဲ့အစည်းမှာ အသနားခံစား ပြန်လည်တင် ထားသော်လည်း ယနေ့အထိ UNHCR ကတ်ဒ် ပြန်လည်ရရှိခြင်း မရှိသူများ အမည်စာရင်း ပြန်လည်ပေးအပ်ရန် ICC က ဇူလိုင်လ ၈ ရက်မှာ ထုတ်ပြန်သည်။
13C – UNHCR ကတ်ကိုင်ဆောင်ထားသည့် မလေးရှားရောက်ချင်းဒုက္ခသည်များအနေဖြင့် Independent Chin Communities – ICC အဖွဲ့ဝင်များဖြစ်သော Alliance Of Chin Refugees (ACR)၊ Chin Refugees Committee (CRC)၊ DAI Community Malaysia (DCM)၊ Falam Refugees Organization (FRO) နှင့် Zomi Association of Malaysia (ZAM) ထံသို့ စာရင်းပေး ကြရန် အသိပေးထုတ်ပြန်သည်။
ICC အဖွဲ့ဝင်ထားသော ချင်းအဖွဲ့အစည်းများထဲက မိမိအဖွဲ့အစည်း သို့မဟုတ် အသနားခံစာ တင်ခဲ့သော အဖွဲ့အစည်းထံသို့ တကြိမ်သာ အမည်စာရင်း ပေးသွင်းရန် ထုတ်ပြန်သည်။
လိုအပ်သောအချက်လက်များမှာ အမည်၊ မွေးသကရာဇ်၊ UNHCR ဖိုင်နံပါတ် ၊ UNHCR ကိုယ်ပိုင်နံပါတ်၊ အသနားခံ စာတင်ခဲ့သည့်ရက်စွဲ၊ လက်ရှိဖုန်းနံပါတ်၊ မိသားစုလူဦးရေ၊ အခြားအရာများတို့ဖြစ်သည်ဟု သိရသည်။
လက်ရှိ ICC မှ ကောက်ယူမှုသည် UNHCR မှ စေခိုင်းခြင်း မဟုတ်ဘဲ ချင်းလူမျိုးများအတွင်း ကျန်ရှိနေသေးသည့် စာရင်းများကို သိရှိလိုခြင်းနှင့် အထောက်အထားများ ရရှိနိုင်ရန်အတွက်ဖြစ်သည်ဟု သိရသည်။
