(005MK)
မီဇိုရမ်ပြည်နယ်က အရပ်ဖက်အဖွဲ့အစည်းတစ်ခုဖြစ်သော Zo Reunification Organization (ZORO) ၏ ဦးဆောင်စီစဉ်မှုဖြင့် ချင်းအမျိုးသားတပ်ဦး CNF/CNA နှင့် ဇိုမီးပြန်လည်ပေါင်းစည်းညီညွတ်ရေးအဖွဲ့ (ZRO/ZRA) တို့ တွေ့ဆုံဆွေးနွေး ကြမည်ဟု မီဇိုရမ်အခြေစိုက်သတင်းဌာန Bengvarna က ဖော်ပြသည်။
Zo Reunification Organization (ZORO) အဖွဲ့သည် CNF/CNA နှင့် ZRO/ ZRA တို့အကြားဖြစ်ပွားနေသော စစ်ရေး ပဋိပက္ခများအား အဖြေရှာရန် ငြိမ်းချမ်းရေးအကျိုးဆောင်ကိုယ်စားလှယ်ဖြစ်ဆောင်ရွက်ကာ နှစ်ဖက်အဖွဲ့အစည်းမှ တာဝန်ရှိသူများကိုပြီးခဲ့သည့်လက တွေ့ဆုံခဲ့ကြသည်။
ထိုကဲ့သို့ တွေ့ဆုံပြီးနောက် နှစ်ဖက်အဖွဲ့အစည်းမှတာဝန်ရှိသူများကလည်း အချင်းချင်းကြားဖြစ်ပွားနေသော စစ်ရေး ပဋိပက္ခကို ငြိမ်းချမ်းစွာအဖြေရှာကြရန် ဆန္ဒရှိကြသည့်အတွက် ZORO အဖွဲ့၏ ကမကထပြု ဦးဆောင်စီစဉ်မှုဖြင့် ဇူလိုင်လ ၂၇ ရက်နေ့တွင် အိုင်ဇောလ်မြို့တနေရာ၌ တွေ့ဆုံဆွေးနွေးကြမည်ဟု သိရသည်။
ယခုကိစ္စနှင့်ပတ်သက်၍ ZORO အဖွဲ့ဝင်တစ်ဦးကိုဆက်သွယ်မေးမြန်းကြည့်ရာမှာ ယင်းဖြစ်စဉ်မှာ မှန်ကန်ကြောင်းနှင့် အသေးစိတ်ပြောဆိုခြင်းမရှိပေ။
ဇိုမီးတော်လှန်ရေးတပ်မတော် ZRO/ZRA တပ်ဖွဲ့သည် အိန္ဒိယနိုင်ငံအရှေ့မြောက်ဒေသ မဏိပူရ်ပြည်နယ်မှာ ဖြစ်ပွားသော လူမျိူးရေးပဋိပက္ခများကြောင့် ၁၉၉၃ ခုနှစ်နောက်ပိုင်းမှာပေါ်ပေါက်လာသော ချင်းလက်နက်ကိုင်တပ်ဖွဲ့ဖြစ်သည်။
၂၀၀၅ ခုနှစ်နောက်ပိုင်းမှာ ZRO/ZRA တပ်ဖွဲ့သည် အိန္ဒိယအစိုးရနှင့် သဘောတူစာချုပ်ချုပ်ဆိုပြီး နယ်ခြားစောင့် တပ်ပုံစံ ဖြင့် မဏိပူရ်ပြည်နယ် ချူရချမ်ပူရ်ဒေသမှာအခြေစိုက်ကာ မြန်မာ့နိုင်ငံရေးမှာ ယခင်ကတည်းက ထဲထဲဝင်ဝင်ပါဝင်ခြင်း မရှိခဲ့ပေ။
သို့သော်လည် မြန်မာနိုင်ငံမှာ စစ်အာဏာသိမ်းမှုဖြစ်ပွားခဲ့သော ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်းမှာ ZRO/ ZRA လက်အောက်ခံ အရှေ့ပိုင်းတိုင်းစစ်ဌာန ZRA-Eastern Command တပ်ဖွဲ့က ချင်းပြည်နယ်က စစ်ကောင်စီတပ် ဖွဲ့ကို ဆန့်ကျင်တော်လှန်တိုက်ခိုက်ကြသော ချင်းတော်လှန်ရေးတပ်ဖွဲ့ CDFs များကို စတင်တိုက်ခိုက်လာခဲ့သည်။
တီးတိန်၊ တွန်းဇံ နှင့် ကျီခါးမြို့နယ်တို့မှာ အခြေစိုက်တပ်စွဲထားကြသော ချင်းတော်လှန်ရေးတပ်ဖွဲ့များ၏ စခန်းများကို ဝင်ရောက်စီးနင်းတိုက်ခိုက်သိမ်းပိုက်ခဲ့ကြသည့်အပြင် ချင်းအမျိုးသားတပ်မတော် CNF/CNA နှင့်လည်း အကြိမ်ကြိမ်ထိ တွေ့တိုက်ပွဲများဖြစ်ပွားခဲ့သည်။
ပြီးခဲ့သည့် မေလတုန်းက ချင်းပြည်အစိုးရ၊ ကာကွယ်ရေးဝန်ကြီးဌာနက ပထမဦးဆုံးအကြိမ်ဖော်ဆောင်သော တွန်းဇံမြို့ သိမ်းစစ်ဆင်ရေးမှာလည်း ZRA-EC တပ်ဖွဲ့သည် စစ်ကောင်စီနှင့်ပူးပေါင်း၍ စစ်ကူတိုက်ခိုက်ခဲ့ကြောင်း သိရသည်။
ယခုကဲ့သို့ ချင်းမျိုးနွယ်စုညီအကိုများအကြား စစ်ရေးပဋိပက္ခဖြစ်ပေါ်နေသည့်အပေါ် ZORO အဖွဲ့အနေဖြင့် စိတ်မကောင်း ဖြစ်ရပြီး ပြန်လည်စည်းလုံးညီညွတ်ရေးအတွက် ငြိမ်းချမ်းရေးအကျိုးဆောင်အဖြစ် ခြေလှမ်းစတင်လှမ်းလာခဲ့ကြခြင်း ဖြစ်သည်။
Zo Reunification Organization (ZORO) အဖွဲ့သည် ဗြိတိသျှအစိုးရ၏ နယ်နိမိတ်ပိုင်းခြားသတ်မှတ်မှုကြောင့် အိန္ဒိယ-မြန်မာ-ဘဂ်လား ဒေရှ့် စသည့် ၃ နိုင်ငံတွင် ပြန့်နှံ့နေထိုင်ခဲ့ကြသော ချင်း-လူရှိုင်း-ကူကီး မျိုးနွယ်စုများအားလုံး အုပ်ချုပ်မှု တစ်ခုအောက် တွင်ပြန်လည်ပေါင်းစည်းနေထိုင်နိုင်ရေးအတွက် လှုပ်ရှားဆောင်ရွက်နေသော အဖွဲ့အစည်းဖြစ်သည်။
