စစ်ကိုင်းတိုင်း ကလေးခရိုင်အတွင်းရှိ စစ်ကောင်စီအခြေစိုက်စခန်းများကို ပြည်သူ့ကာကွယ်ရေးကာကွယ်ရေးပူးပေါင်းတပ်ဖွဲ့များက ၃ ရက်တာတိုက်ခိုက်မှုတွင် ဗိုလ်ကြီးတစ်ဦးအပါအ၀င် စစ်ကောင်စီတပ်သား ၁၅ ဦးသေဆုံးခဲ့သည်ဟု အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန လက်အောက်ခံ အမှတ် ၁ စစ်ဒေသက ယနေ့ (ဖေဖော်ဝါရီ ၂၅ ) ရက်တွင် ထုတ်ပြန်သည်။
ကလေးခရိုင်အတွင်းရှိ စစ်ကောင်စီ အခြေပြုစခန်းများဖြစ်ကြသော စက္ကန့်ရွာ၊ ကံကြီးရွာနှင့် ကံသာရွာတို့ကို ကလေးခရိုင် တပ်ရင်းများ၊ အထူးလှုပ်ရှား တပ်ရင်းများ၊ ကလေးခရိုင် မိုင်းတပ်ဖွဲ့၊ ကလေးခရိုင်/မြို့နယ် ပကဖ၊ ကလေးမြို့ပြစီမံချက် (UG) တပ်ဖွဲ့၊ VOKOK(PDF) တပ်ရင်း၊ CNDF TZ Vapual၊ RKDF၊ CDF (KKG)၊ HNB၊ GRF၊ S2UG၊ EFDF၊ TCDF၊ CDF-CDM siyin ပူးပေါင်းအဖွဲ့တို့မှ ဖေဖော်ဝါရီလ ၂၁ ရက်မှ ၂၃ ရက်ထိ တိုက်ခိုက်ခဲ့ခြင်းဖြစ်သည်။
ဗိုလ်ကြီး မင်းခန့်ဇင် ဦးစီးသော ဒကစ (ကလေး) လက်အောက်ရှိ စက္ကန့်ရွာ၊ ကံကြီးရွာနှင့် ကံသာရွာတို့မှ စစ်ကောင်စီ အခြေပြုစခန်းများကို တိုက်ခိုက်သိမ်းပိုက်နိုင်ခဲ့ကြပြီး စစ်ကောင်စီဘက်မှ ဗိုလ်ကြီး (၁) ဦးအပါအဝင် (၁၅) ဦး သေဆုံးပြီး (၁၀) ဦး ထိခိုက်ဒဏ်ရာရသည်။
ပြည်သူ့ကာကွယ်ရေးပူးပေါင်းတပ်ဖွဲ့ဘက်က ရဲဘော် (၂) ဦး ကျဆုံးခဲ့သည်။
တိုက်ပွဲအတွင်း လက်နက်ငယ် (၁၀) လက်၊ RPG-7 (၁) လက်၊ ၆၀ မမ ပြောင်းတို (၁) လက်၊ ဗုံးမျိုးစုံ (၉) လုံး၊ 7.62 ကျည် (၃၈၈) တောင့်၊ 5.56 ကျည် (၆၄၁) တောင့်၊ ကျည်အိမ် (၄) ခု သိမ်းဆည်းရသည်ဟု အမှတ် ၁ စစ်ဒေသက ထုတ်ပြန်သည်။
