စစ်ကိုင်းတိုင်း၊ ကလေးမြို့နယ်တောင်ပိုင်းတွင် ဧပြီလ ၁၀ ရက်နှင့် ၁၁ ရက်နေ့က စစ်ကောင်စီတပ်ဖွဲ့နှင့် ပြည်သူ့ကာကွယ်ရေးပူးပေါင်းတပ်ဖွဲ့ကြားဖြစ်ပွားသည့် ၂ ရက်တာတိုက်ပွဲအတွင်း စစ်ကောင်စီတပ်သားအနည်းဆုံး ၃၅ ဦးသေဆုံးခဲ့သည်ဟု ကလေးမြို့ ပြည်သူ့ကာကွယ်ရေးတပ်ဖွဲ့ (PDF-Kalay) က ထုတ်ပြန်ထားသည်။
အဆိုပါ နှစ်ရက်အတွင်း တိုက်ပွဲတွင် PDF-Kalay, CNDF, CDF-KKG, ပ.က.ဖ ပူးပေါင်းတပ်ဖွဲ့တို့မှ ပဒေသာမိုင်းများဖြင့် အကြိမ်ကြိမ် မိုင်းခွဲတိုက်ခိုက်ခြင်းကြောင့် စစ်ကောင်စီတပ်ဖွဲ့များ အကျအဆုံးများခဲ့ခြင်းဖြစ်သည်။
ဧပြီလ ၁၀ ရက်နေ့က ရန်ကြီးအောင်ကျေးရွာဘက်မှ စစ်ကောင်စီတပ်အင်အား ၁၅၀ နှင့် ရိက္ခာများတင်ဆောင်လာသော ကုန်တင်ကား ၂၀ စီးတို့သည် ချောင်းခွရွာနှင့် နတ်ချောင်းကျေးရွာဘက်သို့ ဦးတည်စစ်ကြောင်းထိုးလာကာ ပန်းမွန်းချောင်းတံတားအနီးတွင် မိုင်းဆွဲတိုက်ခိုက်ခံရသည့်အပြင် ပြည်သူ့ကာကွယ်ရေး ပူးပေါင်းတပ်ဖွဲ့နှင့် ညနေပိုင်း ၆ နာရီခွဲတွင် ထပ်မံတိုက်ပွဲဖြစ်ပွားခဲ့သည်။
ဧပြီလ ၁၁ ရက်တွင်လည်း စစ်ကောင်စီတပ်ဖွဲ့နှင့် ပြည်သူ့ကာကွယ်ရေးပူးပေါင်းတပ်ဖွဲ့တို့ တိုက်ပွဲထပ်မံဖြစ်ပွားခဲ့ပြီး စစ်ကောင်စီတပ်သား ၆ ဦးထပ်မံသေဆုံးကာ ပူးပေါင်းတပ်ဖွဲ့များဘက်မှ CNDF တပ်ဖွဲ့ဝင်နှစ်ဦးတွင် တစ်ဦးမှာ ပြင်းထန်စွာ ဒဏ်ရာရရှိခဲ့သည်။
ကလေးမြို့၊ ဖွဲ့စက်ဘက်မှ ကလေးနည်းပညာတက္ကသိုလ်ဘက်သို့ ဦးတည်ကာ စစ်ကူတက်လာသော စစ်ကောင်စီတပ်ဖွဲ့ကို ဇင်းကလင်းရွာနှင့် နည်းပညာတက္ကသိုလ်ကြားတွင် PDF-Kalay တပ်ဖွဲ့များက မိုင်းခွဲတိုခိုက်ခဲ့ရာ စစ်ကောင်စီတပ်သား ၃ ဦး ထိမှန်သေဆုံးခဲ့သည့်အပြင် ညနေ ၃ နာရီအချိန်တွင် နတ်မြောင်းရွာမှ စည်သာရွာဘက်သို့ ခြေလျင်စစ်ကြောင်းထွက်လာစဉ် ထပ်မံမိုင်းခွဲတိုက်ခိုက်ခံရပြီး စစ်ကောင်စီတပ်သား ၁၀ ဦးသေဆုံးကြောင်း ကလေးမြို့ ပြည်သူ့ကာကွယ်ရေးတပ်ဖွဲ့၏ ထုတ်ပြန်ချက်တွင် ဖော်ပြသည်။
၎င်းအပြင် စစ်ကောင်စီစစ်ကြောင်းများနှင့် ယာဉ်တန်းကို စည်သာရွာနှင့်ကြားအင်ရွာအကြား၊ ချင်းဆိုင်ရွာနှင့် ဇင်းကလင်းရွာအကြား တို့တွင် မိုင်းအရေအတွက် ၄၁ လုံးဖြင့် ထပ်မံဖောက်ခွဲတိုက်ခိုက်ခဲ့ရာ စစ်ကောင်စီတပ်သား ၁၄ ဦး ထပ်မံသေဆုံးခဲ့ကြောင့် Kalay PDF ကဆိုသည်။
ကလေးမြို့နယ်တောင်ပိုင်းတွင် လက်ရှိဖြစ်ပေါ်နေသည့် စစ်ရေးတင်းမာမှု အခြေအနေများကြောင့် ကလေး-ဂန့်ဂေါ လမ်းမကြီးအား ဖြတ်သန်းသွားလာခြင်းလုံးဝမပြုလုပ်ကြပါရန် PDF-Kalay မှ သတိပေးထုတ်ပြန်ထားသည်။
ယနေ့မနက်ပိုင်း ၁၀ နာရီဝန်းကျင်ခန့်ကလည်း ကလေးမြို့မြောက်ဘက်ဒေသ တာဟန်း-လက်ပံချောင်းလမ်း ပြည်တော်သာကျေးရွာနှင့် မိုင်နွဲကျေးရွာအနီးဘက်မှာ စစ်ကောင်စီတပ်ဖွဲ့နဲ့ ပြည်သူ့ကာကွယ်ရေးတပ်ဖွဲ့အကြား ထိတွေ့မှုဖြစ်ပွားကာ စစ်ကောင်စီတပ်က လက်နက်ကြီးအကြိမ်ကြိမ် ပစ်ခတ်ခဲ့သည်။
