စစ်ကောင်စီက တစ်နိုင်ငံလုံးမှာ တက္ကသိုလ်ဝင်တန်းစာမေးပွဲကို မတ်လ ၃၁ ရက်မှ ဧပြီလ ၉ ရက်နေ့အထိ ကျင်းပရန်စီစဉ်နေပြီး ချင်းပြည်နယ်မှာလည်း ကျောင်းသား/ ကျောင်းသူ ၃ ထောင်ဝန်းကျင်ခန့်က ဝင်ရောက်ဖြေ ဆိုကြမည်ဟု သိရသည်။
မြို့နယ် ၉ မြို့နယ်ရှိသည့် ချင်းပြည်နယ်တွင် တက္ကသိုလ်ဝင်တန်းစာမေးပွဲကို ဖလမ်း၊ တီးတိန်၊ တွန်းဇံ၊ မတူပီ၊ ပလက်ဝမြို့နယ်နှင့် ကျီခါးမြို့နယ်ခွဲတို့ရှိ စာစစ်ဌာန ၉ ခုတွင် ကျောင်းသားကျောင်းသူ ၂၉၅၀ ယောက်က ဖြေဆိုကြမည်ဟု ချင်းပြည်နယ်၊ ပညာရေးမှုဌာနမှ တာဝန်ရှိသူ တစ်ဦးက ပြောသည်။
“စာစစ်ဌာနကတော့ တွန်းဇံ ၂ခု၊ တီးတိန် ၁ ခု၊ ဖလမ်း ၁ခု၊ မတူပီ ၁ ခု၊ ပလက်ဝ ၄ ခုဆိုတော့ စုစုပေါင်း ကြတော့ ကျွန်တော်တို့မှာ ကိုးခုရှိတယ် စာစစ်ဌာနက။ ဖြေဆိုသူစုစုပေါင်းတော့ ၂၉၅၀ ပေါ့ စာရင်းတင်ထားတာ” ဟု ပညာရေးမှုဌာနမှ တာဝန်ရှိသူ တစ်ဦးက ပြောသည်။
တက္ကသိုလ်ဝင်တန်းစာမေးပွဲဖြေဆိုကြမည့် မြို့နယ်အလိုက်စာရင်းမှာ ဖလမ်းမြို့နယ်တွင် ကျောင်းသူ၊ ကျောင်း သား ၃၀၉ ဦး၊ တွန်းဇံမြို့နယ်တွင် ၂၂၉ ဦး၊ ကျီခါးမြို့နယ်တွင် ၂၀၈ ဦး၊ တီးတိန်းမြို့နယ်တွင် ၂၈၆ ဦး၊ မတူပီမြို့နယ်တွင် ၁၀၇ ဦး၊ ပလက်ဝမြို့နယ်တွင် ၁၈၁၁ ဦး တို့ဖြစ်ကြသည်။
ချင်းပြည်နယ် ဟားခါး၊ ထန်တလန်၊ မင်းတပ်၊ ကန်ပက်လက်မြို့နယ်တို့တွင် စာမေးပွဲဖြေဆိုရန် လျှောက်လွှာတင်ထားသူ မရှိသည့်အတွက် တက္ကသိုလ်ဝင်တန်းစာမေးပွဲကျင်းပမည်မဟုတ်ကြောင်း ၎င်းကပြောသည်။
“ကျောင်းလည်းမဖွင့်ဘူး လျှောက်လွာတင်တဲ့သူမရှိလို့လေ၊ ကလေးတွေလျှောက်လွှာတင်မှ ဖြေလို့ရတာလေ ကျောင်းက မဖွင့်ရင်လည်း လျှောက်လွှာတင်ခွင့်တော့ရှိတယ်။ ဒါပေမယ့် အဲဒီမှာပညာရေးမှုးတွေမရှိတဲ့ အခါ ကျတော့ လျှောက်လွှာ မတင်ကြတာနေမှာ။ အခုက တယောက်မှ တင်ကြဘူး။” ဟု မြို့နယ်ပညာရေးမှုဌာနမှ တာဝန်ရှိသူက ပြောသည်။
စစ်အာဏာမသိမ်းခင် ယခင်ပညာသင်နှစ်များတွင် ချင်းပြည်နယ်တွင် တက္ကသိုလ်ဝင်တန်းစာမေးပွဲဖြေဆိုသည့် ကျောင်းသား/ကျောင်းသူ တစ်သောင်းကျော်ပုံမှန်ရှိခဲ့သော်လည်း လက်ရှိ စစ်ကောင်စီလက်ထက်တွင် ကျောင်းသူ၊ ကျောင်းသား ၂၉၅၀ ဦးသာ ဖြေဆိုကြမည်ဖြစ်သည်။
မြန်မာတစ်နိုင်ငံလုံးတွင် ၂၀၂၂ ခုနှစ် တက္ကသိုလ်ဝင်စာမေးပွဲကို ကျောင်းသား/ကျောင်းသူ စုစုပေါင်း ၃၁၂၂၉၉ တို့က ဖြေဆိုကြမည်ဟု သိရသည်။
